Skip to content

Skip to table of contents

Alerjia no intoleránsia ba hahán—Tanbasá mak la hanesan?

Alerjia no intoleránsia ba hahán—Tanbasá mak la hanesan?

Emily: “Tolan tiha hahán, haʼu komesa kedas atu sente ladiʼak. Haʼu-nia ibun laran katar no haʼu-nia nanál bubu. Tuirmai, haʼu mós sente oin-halai no susar atu dada iis. Haʼu-nia liman no kakorok sai katar makaʼas. Haʼu hakaʼas an atu kalma nafatin, maibé haʼu hatene haʼu tenke bá ospitál lalais!”

BA EMA barak, han mak tempu neʼebé lori kontente iha sira-nia moris. Maibé ema balu tenke kuidadu tebes atu la han hahán balu tanba sira iha alerjia, hanesan ho Emily. Sintoma neʼebé Emily hetan mak anafilaxia, neʼe mak kondisaun ida neʼebé perigu tebes. Maibé kondisaun aat hanesan neʼe la kona ema hotu neʼebé iha alerjia ba hahán.

Ohin loron, ema neʼebé iha alerjia no intoleránsia ba hahán aumenta ba beibeik. Maibé tuir peskiza neʼebé doutór sira halo, maski ema barak hanoin katak sira iha alerjia, tuir loloos laʼós ema hotu mak iha alerjia duni.

Alerjia ba hahán katak sá?

Doutór Jennifer J. Schneider Chafen ho ninia grupu sientista sira fó sai katak, “ideia kona-ba ‘alerjia ba hahán’ iha rai ida-idak la hanesan”. (The Journal of the American Medical Association) Maibé sientista no doutór sira fiar katak alerjia mak problema kona-ba ema nia sistema imunolójiku, ka sistema atu defende an husi moras oioin neʼebé ataka ema nia isin.

Baibain, buat neʼebé hamosu sintoma alerjia nian mak proteína husi ai-han ruma. Ema neʼebé iha alerjia nia sistema imunolójiku identifika sala katak proteína neʼe mak inimigu. Tan neʼe, sistema neʼe kria antikorpu oin ida neʼebé bolu IgE atubele defende an. Depois, bainhira isin hasoru fali proteína neʼe ba dala segundu, antikorpu neʼebé kria nanis ona sei hasai kímika oioin, inklui mós histamina.

Baibain, histamina mak buat neʼebé diʼak ba ema nia isin. Maibé kuandu ema neʼebé iha alerjia mak han proteína oin ida, histamina neʼebé sai husi antikorpu IgE mak provoka makaʼas sira-nia isin no hamosu sintoma oioin. Doutór sira seidauk komprende ho loloos tanbasá mak ida-neʼe akontese ba ema balu.

Maibé neʼe mak razaun tansá ita la sai moras bainhira ita foin han buat foun, maibé bainhira ita han fali buat neʼebé hanesan ba dala segundu, ita bele hetan alerjia.

Saida mak intoleránsia ba hahán?

Ema neʼebé iha intoleránsia ba hahán mós bele hetan sintoma oioin hanesan ho ema neʼebé iha alerjia. Maibé la hanesan ho alerjia, neʼe mak problema iha sistema dijestivu nian, ka sistema atu xupa hahán iha estómagu no intestinu. Tan neʼe, ema ida neʼebé  iha intoleránsia, susar ba ninia isin atu xupa hahán balu, karik tanba ninia estómagu ka aten la hasai enzima neʼebé natoon atu simu hahán neʼe, ka tanba kímika balu neʼebé iha hahán ruma. Porezemplu, ema neʼebé iha intoleránsia ba laktoze neʼebé baibain iha susu-been, ninia isin la bele prodús enzima neʼebé natoon atu xupa laktoze.

La hanesan ho alerjia, ema ida bele hetan kedas sintoma ba intoleránsia bainhira nia foin han buat foun ruma. Se ema neʼebé iha intoleránsia han barak beibeik hahán neʼebé la diʼak ba nia, sintoma bele mosu, maibé se nia han uitoan ka dala ruma deʼit, sintoma sei la mosu. Neʼe la hanesan duni ho alerjia, neʼebé maski han uitoan deʼit mós bele hamosu sintoma oioin neʼebé bele lori perigu ba ninia moris.

Sintoma saida deʼit mak bele mosu?

Se Ita iha alerjia ba hahán ruma, Ita bele hetan sintoma hanesan isin-katar, matan bubu, kakorok no nanál mós bubu, laran-saʼe, muta, ka tee-been. Karik Ita mós bele hetan sintoma balu neʼebé aat liután, hanesan oin-halai, dezmaia, tensaun tun makaʼas, no ataka fuan. Se ema ida hetan anafilaxia, ninia kondisaun bele sai aat lalais no dala ruma neʼe bele halo nia mate.

Ema bele sai alerjia ba hahán naran deʼit. Maibé baibain hahán neʼebé bele hamosu sintoma aat oioin mak susu-been, manu-tolun, ikan, fore-rai, fore-keli, kastaña, trigu, boek no kadiuk sira. Atu kona alerjia, neʼe la haree ba tinan. Estudu sira hatudu sai katak bainhira inan-aman ka sira ida mak iha alerjia, sira-nia oan mós iha posibilidade boot liu atu hetan alerjia. Dala barak labarik neʼebé iha alerjia bele sai diʼak fali nuʼudar sira sai boot daudaun.

Intoleránsia ba hahán ruma ladún lori perigu boot hanesan alerjia neʼebé makaʼas. Sintoma ba intoleránsia mak hanesan kabun-moras no bubu, ulun-moras, isin-katar no isin-kole. No hahán sira neʼebé baibain hamosu sintoma hirak-neʼe mak susu-been, trigu, tua no fermentu.

Konsulta no tratamentu

Se Ita hanoin katak Ita iha alerjia ka intoleránsia ba hahán ruma, diʼak atu bá konsulta doutór espesialista. Tanba se Ita deside rasik katak Ita iha alerjia no la han ona buat balu, neʼe bele estraga Ita-nia saúde, no karik Ita sei falta nutrisaun ruma neʼebé tuir loloos Ita-nia isin presiza duni.

Se Ita iha alerjia ba hahán ruma no hetan ona sintoma aat, Ita tenkesér kuidadu atu la han duni ida-neʼe, tanba toʼo agora seidauk iha tratamentu neʼebé diʼak. * Maibé se Ita-nia alerjia neʼe ladún makaʼas ka Ita-nia problema mak intoleránsia ba hahán ruma, karik diʼak ba Ita atu hamenus deʼit hahán neʼe ka dala ruma deʼit mak han ida-neʼe. Maibé, ba ema balu neʼebé iha intoleránsia ba hahán ruma, han uitoan deʼit mós labele, ka balu tan tenke sees husi hahán neʼe ba tempu balu, neʼe depende ba ema ida-idak nia kondisaun.

Entaun, se Ita mós iha alerjia ka intoleránsia ba hahán ruma, hanoin-hetan bá, katak iha ema barak neʼebé iha situasaun hanesan ho Ita. No sira barak aprende ona atu goza moris hodi han buat oioin neʼebé gostu tebes no diʼak ba sira-nia isin.

^ par. 19 Doutór barak anima ema neʼebé iha alerjia makaʼas atu sempre lori ai-moruk naran adrenalina (epinefrina) neʼebé sira bele sona rasik kuandu mosu sintoma aat oioin. Se Ita-nia oan mak iha alerjia, diʼak mós fó-hatene ba ninia mestre ka ema neʼebé tau matan nia katak nia iha alerjia ba hahán ruma.