Skip to content

Skip to table of contents

Manu-arara neʼe naruk toʼo sentímetru 85

Manu-loriku neʼebé furak tebes

Manu-loriku neʼebé furak tebes

MAIZUMENUS tinan 500 liubá, ema Europa sira bá iha Amérika Sentrál no Amérika Súl. Bainhira sira laʼo iha ai-laran, derrepente deʼit sira haree manu lubun neʼebé semo ho liras kór oioin. Neʼe mak manu-loriku oin ida naran manu-arara (lia-inglés, macaw), neʼebé ikun naruk no moris iha área tropikál iha Amérika. Lakleur, bainhira ema halo mapa kona-ba área sira-neʼe, sira toman tau dezeñu manu-arara.

Buat ida neʼebé la hanesan ho manu seluk mak manu-arara inan no aman hotu iha liras ho kór furak. Manu-arara neʼe mós matenek tebes no iha lian kroʼat. Baibain manu-arara forma grupu ida no moris hamutuk, dala ruma iha grupu ida bele iha manu 30. Dadeer-dadeer, sira husik sira-nia knuuk atu buka hahán, hanesan fini ka ai-fuan ka buat seluk tan. Hanesan ho manu-loriku baibain, manu-arara mós uza sira-nia liman atu kaer ai-han, no sira-nia ibun iha forsa boot toʼo bele harahun fore kulit sira neʼebé toos loos! Bainhira sira han tiha, baibain sira bá han fali rai-mean, neʼe ajuda sira atu labele kona venenu husi buat neʼebé sira han ona, no mós atu hetan buat neʼebé sira presiza ba sira-nia isin.

‘Maromak halo ona buat hotu ho furak tuir tempu neʼebé loos.’ —Eclesiastes (Pengkhotbah) 3:11

 Baibain, manu sira-neʼe iha pár ida deʼit ba moris tomak, no inan-aman serbisu hamutuk atu haboot oan sira. Ita bele hetan manu-arara nia knuuk iha ai-hun kuak, mota ninin, nehek-mirain nia knuuk, ka rai-kuak laran. Iha fatin hanesan neʼe, ita bele haree manu-inan no aman ajuda malu atu hamoos sira-nia fulun. Manu-oan sira sai boot ho fulan neen deʼit, maibé baibain sira moris hamutuk ho inan-aman maizumenus ba tinan tolu. Baibain, sira bele moris toʼo tinan 30 ka 40, maibé manu-arara neʼebé ema hakiak bele moris naruk toʼo tinan 60. Haree toʼok ba foto balu kona-ba manu-arara ho espésie oioin.

Manu-arara neʼe naruk toʼo sentímetru 95

Manu-arara neʼe naruk toʼo sentímetru 85

Manu-arara neʼe naruk toʼo sentímetru 100. Neʼe mak manu-loriku oin ida neʼebé boot liu, ninia todan kilograma 1,3 liu