Skip to content

Skip to table of contents

 BÍBLIA NIA HANORIN

Laran-susar

Laran-susar

Laran-susar iha oin rua. Ida lori buat neʼebé diʼak ba ita, no ida seluk bele estraga ita-nia an. Bíblia ajuda ita atu hatene kona-ba laran-susar oin rua neʼe.

Haʼu-nia laran-susar neʼe baibain ka lae?

REALIDADE

Laran-susar mak sentimentu la hakmatek, laran-taridu, ka hanoin barak. Tanba ita moris iha mundu neʼebé la seguru, ita hotu dala ruma sente laran-susar.

SAIDA MAK BÍBLIA HANORIN?

Liurai David hakerek: “Toʼo bainhira mak haʼu tenke laran-taridu no laran-triste?” (Salmo [Mazmur] 13:2) Saida mak ajuda David atu tahan? Liuhusi orasaun, David fakar sai ninia sentimentu hodi tau fiar ba Maromak nia domin. (Salmo [Mazmur] 13:5; 62:8) Maromak konvida ita atu soe ita-nia todan ba nia. Iha 1 Pedro 5:7 dehan: ‘Entrega imi-nia laran-susar hotu ba Maromak, tanba nia hanoin imi.’

Hodi halo buat ruma ba ema neʼebé ita hadomi, bele hamenus ita-nia laran-susar kona-ba sira

Maibé, ita mós bele halo buat seluk tan atu kontrola laran-susar. Porezemplu, bainhira apóstolu Paulo hanoin barak kona-ba ninia maluk kristaun sira, nia hakaʼas an atu fó kmaan no anima sira. (2 Korinto 11:28) Neʼe katak, Paulo nia laran-susar neʼe lori diʼak ba ema, tanba nia hanoin barak kona-ba ema seluk, neʼe book nia atu ajuda sira. Hanesan neʼe mós ho ita. Se ita la iha interese ba ema seluk, ita sei la sente laran-susar, maibé neʼe mós katak ita la iha domin ba sira.—Provérbios (Amsal) 17:17.

“Keta buka deʼit imi rasik nia diʼak, maibé buka mós ema seluk nia diʼak.”Filipe 2:4.

 Se haʼu laran-susar demais, saida mak haʼu bele halo?

REALIDADE

Ema balu sente laran-susar demais kona-ba sala neʼebé uluk sira halo, kona-ba futuru, ka kona-ba osan. *

SAIDA MAK BÍBLIA HANORIN?

Laran-susar kona-ba sala neʼebé uluk ita halo: Ema balu iha apóstolu sira-nia tempu, antes sira sai ema kristaun, sira halo hahalok aat oioin, hanesan lanu-teen, naʼok-teen, lohidór, no halo sala-foʼer. (1 Korinto 6:9-11) Maibé sira troka sira-nia hahalok, no tau fiar ba Maromak nia laran-sadiʼa duké hanoin barak kona-ba sala neʼebé uluk sira halo. Salmo (Mazmur) 130:4 dehan: “Ita [Maromak] mak fó perdua neʼebé loos.”

Laran-susar kona-ba futuru: Jesus dehan: “Keta hanoin barak kona-ba loron tuirmai, basá loron tuirmai iha ninia susar rasik.” (Mateus 6:25, 34) Loos duni, importante ba ita atu la hasusar ita-nia moris hodi hanoin barak kona-ba problema aban-bainrua nian, tanba neʼe bele halo ita hanoin laloos no foti desizaun neʼebé ladiʼak. Dala barak, buat neʼebé halo ita laran-susar agora, sei nunka sai realidade.

Laran-susar kona-ba osan: Matenek-naʼin ida halo orasaun dehan: “Labele husik haʼu sai kiak ka sai riku.” (Provérbios [Amsal] 30:8) Ema neʼe hakarak moris kontente ho buat neʼebé nia iha ona, tanba neʼe mós halo Maromak kontente. Iha Ebreu 13:5 dehan: “Imi-nia moris tenke livre husi domin ba osan, no haksolok bá ho buat neʼebé imi iha. Tanba [Maromak] dehan ona: ‘Haʼu sei nunka husik ó no haʼu sei nunka fila kotuk ba ó.’” Osan bele lakon mohu, maibé Maromak sei hamutuk nafatin ho ema neʼebé tau fiar ba Nia no la duni osan.

“Haʼu seidauk haree ema ida neʼebé laran-loos la hetan ajuda, ka ninia oan sira buka paun.”Salmo (Mazmur) 37:25.

Loron ida, ita bele sai livre husi laran-susar ka lae?

BUAT NEʼEBÉ EMA HANOIN

Iha tinan 2008, jornál The Guardian dehan: “Ita moris iha tempu neʼebé nakonu ho laran-susar la hanesan uluk.” Iha 2014, The Wall Street Journal dehan: “Kompara ho tempu uluk, agora mak tempu neʼebé ema amerikanu sira sente laran-susar liu.”

SAIDA MAK BÍBLIA HANORIN?

“Hanoin resin halo ema laran-tun, maibé liafuan neʼebé diʼak halo ema laran-haksolok.” (Provérbios [Amsal] 12:25) Atubele hetan “liafuan neʼebé diʼak”, ita presiza hatene liafuan diʼak kona-ba Maromak nia Reinu. (Mateus 24:14) Lakleur tan, Maromak nia Reinu, ka governu ida, sei halo buat neʼebé ita ema la bele halo. Governu neʼe sei halakon ema nia laran-susar husi ninia hun kedas, inklui mós moras no mate! Bíblia promete: ‘Maromak sei hamaran ita-nia matan-been hotu husi ita-nia matan, no mate sei la iha tan, no ema sei la tanis tan ka laran-susar ka laran-triste.’—Apokalipse 21:4.

“Maromak neʼebé fó esperansa sei halo imi nakonu ho ksolok no dame liuhusi imi-nia fiar ba nia.”Roma 15:13.

^ par. 10 Se Ita sente laran-susar demais toʼo la bele halaʼo moris loroloron, diʼak liu Ita bá konsulta doutór. Livru Matan-moris bá! la halo promosaun kona-ba ai-moruk ka tratamentu ruma.