Skip to content

Skip to table of contents

 BÍBLIA NIA HANORIN TUIR ORAS

Tuir oras

Tuir oras

Maski ema barak hatene katak tuir oras mak importante, maibé sira sente susar atu halo ida-neʼe. Oinsá mak Bíblia nia matadalan sira bele ajuda ita kona-ba neʼe?

Neʼe importante duni ka lae?

TANSÁ MAK IDA-NEʼE IMPORTANTE?

Ema balu hatete katak hodi toʼo sedu uitoan iha fatin neʼebé sira promete ona, neʼe bele hamenus estrese. Se ita tuir oras, neʼe mós bele halo ema seluk respeitu ita. Oinsá?

Hodi tuir oras hatudu katak ita mak ema neʼebé hatene organiza an. Bainhira ita tuir oras, neʼe hatudu katak ita hatene kontrola ita rasik nia moris duké husik situasaun mak kontrola no hanetik ita.

Se ita tuir oras, ema seluk bele tau fiar ba ita. Ema sei hafolin liu ema neʼebé kumpre promesa, tanba ema barak iha toman atu la halo tuir promesa. Se ita mak ema neʼebé sempre tuir oras, kolega no família sei respeitu ita. Patraun sira mós hafolin ema neʼebé sempre tama serbisu tuir oras no halo serbisu ho badinas. Hahalok diʼak hanesan neʼe bele book patraun atu tau fiar liután ba sira no aumenta sira-nia saláriu.

SAIDA MAK BÍBLIA HANORIN?

Bíblia fó matadalan barak neʼebé bele ajuda ita atu tuir oras. Porezemplu, eskritura ida dehan: “Halo buat hotu iha dalan neʼebé loloos no momoos.” (1 Korinto 14:40) Se ita marka ona fatin no oras atu hasoru malu ho ema ruma, ita no ema neʼe presiza halo tuir promesa neʼe. Bíblia mós dehan: “Iha tempu neʼebé hili tiha ona ba buat hotu, tempu ba serbisu hotu neʼebé ema halo. . . . Tempu atu kuda no tempu atu fokit sai buat neʼebé kuda tiha ona.” (Eclesiastes [Pengkhotbah] 3:1, 2) Toʼos-naʼin sira presiza kuda fini iha tempu neʼebé loos atu bele hetan rezultadu diʼak husi sira-nia serbisu. Nuneʼe mós ho ita hotu, loos ka lae?

Maibé Bíblia mós hatudu sai razaun ida tan neʼebé importante liu: Se ita tuir oras, neʼe hatudu katak ita respeitu ema seluk no hafolin sira-nia tempu. (Filipe 2:3, 4) Maibé se ema ida sempre halo ema seluk hein, tuir loloos nia naʼok ema seluk nia tempu.

“Keta buka deʼit imi rasik nia diʼak, maibé buka mós ema seluk nia diʼak.”Filipe 2:4.

 Atubele tuir oras, saida deʼit mak Ita bele halo?

SAIDA MAK BÍBLIA HANORIN?

Bíblia anima ita atu halo planu nanis. (Provérbios [Amsal] 21:5) Se ita sempre tarde, karik neʼe akontese tanba ita iha planu no atividade barak demais. Ita bele husik atividade balu neʼebé ladún importante ka lae? Kuandu ita halo planu ho ema ruma atu hasoru malu, hanoin didiʼak se ita-nia tempu sei toʼo ka lae atu kumpre ida-neʼe. Fó tempu balu ba ita-nia an atu bele tuir oras nafatin maski ita hasoru situasaun susar hanesan udan tun ka dalan macet.

Bíblia mós anima ita atu hatudu hahalok haraik-an. (Provérbios [Amsal] 11:2) Ita presiza rekoñese katak ita-nia tempu no forsa mak limitadu. Tan neʼe, antes promete ho ema ruma atu hasoru malu ka halo serbisu ruma, hanoin didiʼak uluklai. Se ita promete barak liu fali buat neʼebé ita bele halo, karik neʼe sei halo ita la bele tuir oras no aumenta estrese ba ita-nia an no mós ba ema seluk!

Bíblia mós haruka ita atu uza didiʼak ita-nia tempu. (Éfeso 5:15, 16) Tau uluk atividade neʼebé importante liu ba ita. (Filipe 1:10) Porezemplu, bainhira ita hein bís ka ema ruma atu hasoru ita, aproveita tempu neʼe atu lee livru sira neʼebé ita seidauk lee ka halo planu kona-ba ita-nia loron.

“Ema badinas nia planu sira sei hetan susesu duni.”Provérbios (Amsal) 21:5.