Skip to content

Skip to table of contents

 MAROMAK MAK KRIA KA LAE?

Sipu-tasi nia uat mihis sira

Sipu-tasi nia uat mihis sira

SIPU-TASI barak belit ba fatuk ka ró okos ho sira-nia isin tomak. Maibé iha mós sipu-tasi balu neʼebé hasai uat mihis hodi belit ba buat ruma atu satan sira-nia isin. Neʼe halo fasil ba sira atu book an no buka hahán. Maibé, oinsá mak uat mihis sira-neʼe bele ajuda sipu-tasi sira atu tahan laloran boot? Mai ita buka-hatene hamutuk.

Hanoin toʼok: Uat ida-idak nia parte balu forma husi materiál neʼebé toos, no parte seluk forma husi materiál neʼebé mamar hanesan borraxa. Sientista balu neʼebé halo peskiza kona-ba uat neʼe hatete katak, porsentu 80 husi uat neʼe mak toos no porsentu 20 mak mamar. Rezultadu mak, sipu sira-neʼe bele belit metin loos ba fatuk sira atu tahan hasoru laloran boot neʼebé baku bá-mai.

Tuir profesór Guy Genin, rezultadu husi peskiza neʼe mak “furak tebes”. Nia dehan: “Buat neʼebé kapás loos kona-ba sipu-tasi neʼe mak ninia prosesu atu hasai uat neʼebé iha parte toos hamutuk ho parte mamar.” Sientista sira fiar katak sira bele inventa buat oioin hodi kopia sipu-tasi neʼe nia uat, porezemplu ekipamentu neʼebé belit metin ba sasán oioin, ka buat neʼebé bele uza iha área médiku, hanesan buat neʼebé liga uat ho ruin. Profesór J. Herbert Waite husi Universidade Kalifórnia iha Santa Barbara, iha Estadus Unidus, hatete: “Kuandu ita estuda kona-ba dalan neʼebé materiál ida belit malu ho materiál seluk, ita bele aprende duni buat barak husi natureza.”

Tuir Ita-nia hanoin oinsá? Uat sira neʼebé sipu-tasi hasai, mosu mesak deʼit, ka Maromak mak kria?