Skip to content

Skip to table of contents

Ikan-pallasu no ninia belun diʼak

Ikan-pallasu no ninia belun diʼak

Ikan-pallasu amphprion percula ho duʼut-tasi anémona

IKAN-PALLASU (ikan-badut) mak ikan neʼebé ema barak gosta, karik tanba sira-nia kór oioin neʼebé kapás. Buat ida tan neʼebé halo ikan neʼe sai úniku mak sira-nia hela-fatin, tanba sira gosta hela iha duʼut-tasi anémona * neʼebé iha venenu. Tan neʼe, iha rai balu, ema bolu ikan neʼe nuʼudar ikan-anémona.

Baibain ikan-pallasu la hadook an husi duʼut-tasi anémona neʼebé sira hela bá. Tan neʼe, kuandu ita luku besik duʼut-tasi anémona, fasil ba ita atu haree ikan-pallasu no hasai sira-nia foto, tanba sira laʼós ikan neʼebé moedór.

Maibé buat neʼebé halo ikan-pallasu la hanesan ho ikan sira seluk mak sira-nia hela-fatin tanba duʼut-tasi anémona iha venenu. Maski nuneʼe, ikan-pallasu ho duʼut-tasi anémona mak belun diʼak. Oinsá?

SEMPRE MORIS HAMUTUK

Ikan-pallasu amphprion bicinctus

Belun diʼak mak belun neʼebé prontu atu ajuda malu, hanesan neʼe mós ikan-pallasu  ho duʼut-tasi anémona. Biolojista sira dehan katak, ikan-pallasu sira la bele moris se duʼut-tasi anémona la iha. Ikan-pallasu mak ikan neʼebé la hatene nani lalais, tan neʼe fasil ba ikan boot sira atu han ikan-pallasu. Maibé, kuandu ikan-pallasu nani tama ona iha duʼut-tasi anémona nia klaran, ikan boot sira la bele book ona. Hodi hetan protesaun hanesan neʼe, ikan-pallasu balu bele moris toʼo tinan sanulu.

Ikan-pallasu sira mós tolun besik loos ho duʼut-tasi anémona tanba neʼe mak fatin seguru, no inan-aman tau matan didiʼak ba sira-nia tolun. Lakleur, ita bele haree ikan-pallasu inan-aman no oan sira nani hamutuk besik anémona neʼebé hanesan.

Entaun, buat diʼak saida mak duʼut-tasi anémona bele hetan husi ikan-pallasu? Ikan-pallasu halo serbisu seguransa hodi duni sai ikan-borboleta neʼebé gosta han duʼut-tasi anémona. Biolojista sira haree katak duʼut-tasi anémona oin ida tenkesér hetan duni ajuda husi ikan-pallasu. Bainhira biolojista sira-neʼe hasai tiha ikan-pallasu, latoʼo oras 24, ikan-borboleta han mohu tiha duʼut-tasi anémona neʼe.

Ikan-pallasu mós ajuda duʼut-tasi anémona iha dalan seluk tan. Ikan-pallasu nia teen bele ajuda duʼut-tasi anémona atu sai boot lalais. No mós bainhira ikan-pallasu nani iha duʼut-tasi anémona nia leet, neʼe ajuda atu sirkula bee neʼebé iha oksijéniu barak.

MORIS SEGURU IHA FATIN NEʼEBÉ PERIGU

Ikan-pallasu amphprion perideraion

Tanbasá mak ikan-pallasu bele hela iha duʼut-tasi anémona nia leet? Iha sira-nia isin-kulit iha buat ruma neʼebé hanesan jel, no ida-neʼe mak proteje sira hodi duʼut-tasi anémona la bele tata sira. Biolojista sira hanoin katak jel neʼe halo duʼut-tasi anémona hanoin katak ikan-pallasu mak sira-nia isin rasik.

Tuir biolojista balu, bainhira ikan-pallasu ida troka ninia hela-fatin, nia presiza tempu atu hatoman an ho duʼut-tasi anémona neʼebé foun. Kuandu ikan-pallasu ida foin hakbesik ba duʼut-tasi anémona, nia book duʼut-tasi anémona dala ida dala ida ba oras balu nia laran. Neʼe ajuda ikan-pallasu atu modifika ninia jel atu bele proteje an husi duʼut-tasi anémona foun nia venenu. Durante prosesu neʼe, duʼut-tasi anémona mós tata uitoan ikan-pallasu neʼe. Maibé ikusmai, ikan-pallasu ho duʼut-tasi anémona bele sai belun diʼak.

Saida mak ita bele aprende husi kriatura sira-neʼe? Bainhira ita serbisu hamutuk ho ema husi kultura ka situasaun moris nian neʼebé la hanesan, ita bele hetan duni rezultadu neʼebé diʼak tebes. Hanesan ho ikan-pallasu, ita mós dala ruma presiza tempu atu adapta ita-nia an hodi bele serbisu hamutuk ho ema seluk, maibé ita-nia hakaʼas-an neʼe sei la sai saugati deʼit.

^ par. 2 La hanesan ho duʼut-tasi baibain, duʼut-tasi anémona mak animál oin ida.