Skip to content

Skip to table of contents

 BÍBLIA NIA HANORIN

Funu

Funu

Iha tempu antigu, Maromak fó lisensa ba ema Izraél atu halo funu. Entaun, ohin loron Maromak mós apoia funu ka lae?

Tanbasá mak ema Izraél antigu halo funu?

EMA BALU HATETE

 

Ema Izraél adora Maromak neʼebé gosta atu halo funu.

SAIDA MAK BÍBLIA HANORIN

 

Nasaun sira neʼebé Izraél manán mak nakonu ho violénsia no hahalok aat oioin, hanesan halo relasaun seksuál ho família, halo relasaun seksuál ho animál no hasaʼe sira-nia oan nuʼudar sakrifísiu. Durante tinan atus ba atus Maromak fó oportunidade ba nasaun sira-neʼe atu troka sira-nia hahalok. Maibé sira lakohi, tan neʼe Maromak hatete: “Tanba ho hahalok sira-neʼe hotu mak ema iha nasaun sira halo sira-nia an sai la moos, haʼu sei duni sai sira husi imi-nia oin.”—Levítico (Imamat) 18:21-25; Jeremias (Yeremia) 7:31.

“Tanba nasaun sira-neʼe nia hahalok aat, mak Jeová imi-nia Maromak, duni sai sira husi imi-nia oin.”—Deuteronômio (Ulangan) 9:5.

Ohin loron, Maromak apoia nasaun ida atu halo funu ka lae?

KARIK ITA HAREE ONA

 

Ulun-naʼin relijiaun barak sempre hatete katak Maromak apoia sira-nia nasaun atu halo funu. Livru ida (The Causes of War) hatete: “Husi tempu uluk kedas, relijiaun sempre hola parte iha funu.”

SAIDA MAK BÍBLIA HANORIN

 

Ema kristaun labele halo funu hasoru sira-nia inimigu. Apóstolu Paulo hakerek ba maluk kristaun sira, hodi dehan: “Hakaʼas imi-nia an atu nuneʼe, se bele karik, imi bele moris iha dame ho ema hotu. Doben sira, keta selu aat ba ema.”—Roma 12:18, 19.

Jesus hatete ba ninia dixípulu sira: “Hadomi nafatin imi-nia inimigu no harohan ba sira neʼebé haterus imi, atu imi bele hatudu katak imi mak oan husi imi-nia Aman iha lalehan.” (Mateus 5:44, 45) Maski funu akontese iha nasaun oioin, maibé ema kristaun tenke neutrál nafatin ka ketak husi mundu neʼe. (João 15:19) Maromak hakarak ninia atan sira atu hadomi sira-nia inimigu no nafatin neutrál. Entaun, Maromak la apoia nasaun ida atu halo funu, loos ka lae?

“Haʼu-nia ukun laʼós parte husi mundu neʼe. Se haʼu-nia ukun mak parte husi mundu neʼe, haʼu-nia atan sira sei halo funu atu nuneʼe ema judeu sira labele kaer haʼu. Maibé loloos, haʼu-nia ukun laʼós husi mundu neʼe.”—João 18:36.

 Funu sei ramata ka lae?

EMA BALU HATETE

 

Funu sempre akontese. Livru ida (War and Power in the 21st Century) hatete: ‘Funu sei nunka lakon. Sei la iha dame iha mundu neʼe.’

SAIDA MAK BÍBLIA HANORIN

 

Funu sei ramata só deʼit se ema nia hakarak atu halo funu la iha tan. Lakleur tan, Maromak nia Ukun, ka governu ida iha lalehan sei halakon armas funu nian hotu husi mundu no sei hanorin ema atu haburas dame. Bíblia hatete katak Maromak “sei korrije buat hotu kona-ba nasaun sira neʼebé kbiit boot.  . . . Sira sei tuku sira-nia surik hodi sai xarrua no tuku sira-nia diman sai sabit. Nasaun sei la foti tan surik hasoru nasaun seluk, no sira sei la aprende tan funu”.—Miquéias (Mikha) 4:3.

Ohin loron, governu sira buka sira rasik nia diʼak, iha mós hahalok la justisa oioin neʼebé hafahe rasa, no mós lei sira neʼebé la justisa provoka povu atu kontra hasoru governu. Maibé Bíblia hanorin katak iha Maromak nia ukun okos, buat sira-neʼe hotu sei lakon. No rezultadu mak funu sei la iha tan. Maromak promete: “Sira sei la halo buat aat ida ka la estraga buat ida,  . . . ema hotu iha mundu tomak sei hatene kona-ba Jeová hanesan bee taka tasi tomak.”—Isaías (Yesaya) 11:9.

“Nia sei hapara funu sira iha rai tomak. Nia halo tohar rama no harahun diman; nia sunu tropa nia kuda-karreta funu nian sira ho ahi.”—Salmo (Mazmur) 46:9.