Skip to content

Skip to table of contents

 INFORMASAUN IHA OIN

Kuandu dezastre akontese​​—⁠Saida mak Ita bele halo?

Kuandu dezastre akontese​​—⁠Saida mak Ita bele halo?

“Haʼu besik atu monu ba rai tanba buat ruma rabenta. Fatin hotu nakonu ho ahi-suar, no ahi han ami-nia eskritóriu.”—Joshua.

Iha jornál ita sempre haree notísias kona-ba rai-nakdoko, anin-boot, terrorizmu no tiru malu iha eskola. Maibé lee deʼit kona-ba dezastre la hanesan duni ho hasoru rasik dezastre. Entaun, atu salva Ita-nia moris, saida mak Ita bele halo antes, durante no depois dezastre akontese?

 ANTES​—PREPARA NANIS!

DEZASTRE bele kona ema hotu. Tan neʼe importante tebes atu prepara an hodi bele salva Ita-nia moris. Entaun, oinsá mak Ita bele prepara nanis?

  • Hanoin nanis. Rekoñese katak dezastre bele akontese, no ida-neʼe perigu ba Ita no ema seluk nia moris. Keta demora, diʼak atu prepara an antes dezastre akontese.

  • Buka-hatene kona-ba dezastre neʼebé bele akontese iha Ita-nia área. Buka-hatene mós kona-ba fatin seguru atu proteje Ita-nia an. Haree didiʼak Ita-nia uma nia kondisaun no posibilidade ba Ita-nia bairru atu kona dezastre. Kuidadu ba buat naran deʼit neʼebé bele hamosu ahi iha uma. Ita mós bele monta mákina atu detekta ahi-suar, no troka mákina nia bateria pelumenus tinan ida dala ida.

  • Prepara sasán neʼebé Ita presiza. Bainhira dezastre akontese, dala ruma eletrisidade, bee, telefone no transportasaun la laʼo ho diʼak. Tan neʼe, se Ita iha karreta, diʼak atu sempre enxe mina, no mós keta haluha atu sempre rai hahán, bee-hemu no sasán emerjénsia sira iha Ita-nia uma.—Haree kaixa “ Saida deʼit mak Ita presiza?

    Importante tebes atu prepara an hodi bele salva Ita-nia moris

  • Rai kolega sira-nia númeru telefone, maski sira hela besik ka dook.

  • Halo treinu. Buka-hatene dalan neʼebé loos no lalais liu atubele sai husi Ita-nia uma ka serbisu fatin. Hanorin Ita-nia oan kona-ba saida mak sira presiza halo se sira iha eskola no dezastre akontese. Hili fatin balu iha Ita-nia bairru no bairru seluk neʼebé Ita bele uza atu hasoru malu bainhira dezastre akontese, porezemplu eskola ka jardín. No treinu Ita-nia família atu laʼo ba fatin sira-neʼe.

  • Halo planu atu ajuda ema seluk, inklui ferik-katuas no ema defisiente.

DURANTE​—KETA DEMORA

Joshua neʼebé temi ona hatete: “Bainhira ahi hahú han ami-nia eskritóriu, ema barak la sente pániku, maibé sira demora. Ema balu sei taka komputadór ka enxe  bee ba kantíl. Mane ida mós hatete: ‘Karik diʼak liu ita hein deʼit.’” Duké demora, Joshua hakilar: “Ita tenke sai agora!” Tuirmai ninia kolega sira laʼo tuir nia. Joshua koʼalia ho lian makaʼas hodi dehan: “Se ema ruma monu, hiʼit nia no kontinua laʼo. Ita hotu bele sai husi neʼe!”

  • Kuandu ahi han uma. Ahi-suar sei halo Ita susar atu haree, no ema barak liu mate tanba ahi-suar. Tan neʼe, duké laʼo, diʼak atu dolar deʼit no book an lalais hodi buka dalan sai neʼebé besik. Husik deʼit Ita-nia sasán. Se Ita demora, Ita bele lakon Ita-nia moris.

  • Kuandu rai-nakdoko. Subar iha meza okos ka hamriik rabat ba parede. Bainhira rai-nakdoko primeiru para, diʼak atu sai kedas ba liʼur no hadook an husi uma sira, tanba tuirmai rai-nakdoko kiʼik sei mosu. Koko atu ajuda ema seluk, se bombeiru mai tarde.

  • Kuandu tsunami. Se derrepente deʼit tasi sai maran la hanesan baibain, halai lalais ba fatin neʼebé aas tanba lakleur tan laloran boot sira sei mai.

  • Kuandu anin-boot no udan-boot. Keta demora atu halai ba fatin neʼebé seguru.

  • Kuandu bee-saʼe. Keta tama ba uma ka fatin neʼebé bee-saʼe. Keta laʼo ka lori karreta liuhusi estrada neʼebé nakonu ho bee. Baibain, bainhira bee-saʼe, bee nakonu ho foʼer no buat oioin neʼebé perigu, hanesan sasán rahun, besi ka fiu eletrisidade neʼebé kotu.

  • Hatene ka lae? Maski bee saʼe sentímetru 60 deʼit, maibé nia korrente bele muda karreta. Bainhira bee-saʼe, ema barak mate tanba sira koko atu lori karreta iha dalan neʼebé nakonu ho bee.

  • Se governu halo evakuasaun, halo tuir kedas! Fó-hatene ba Ita-nia kolega sira kona-ba Ita-nia kondisaun, atu sira la presiza buka Ita no tau sira-nia moris iha perigu laran.

    Se governu halo evakuasaun, halo tuir kedas!

  • Hatene ka lae? Diʼak liu atu haruka SMS duké telefone, tanba dala ruma maski dezastre akontese SMS bele tama nafatin.

  • Se governu bandu Ita atu la sai husi uma, diʼak atu halo tuir. Se iha akontesimentu ka dezastre neʼebé liga ho buat kímiku, biolójiku ka nukleár, keta sai ba liʼur, taka metin janela hotu, odamatan sira no hamate AC. Rona bá notísias iha televizaun no rádiu. Labele sai ba liʼur toʼo governu haruka Ita atu sai.

 DEPOIS​—MATAN-MORIS NAFATIN!

Atubele proteje an husi moras no perigu oioin, haree sujestaun sira tuirmai:

  • Se bele, hela iha kolega nia uma, duké hela iha kampu refujiadu.

  • Mantein Ita-nia hela-fatin atu moos nafatin.

  • Uza ekipamentu neʼebé bele proteje Ita, kuandu hamoos sasán rahun. Diʼak atu uza luvas, sapatu mahar, kapasete, no masker. Kuidadu atu la kaer fiu eletrisidade no ahi-klaak.

  • Halaʼo Ita-nia atividade hanesan baibain. Se inan-aman sira kalma, oan sira mós sente kmaan. Ajuda oan sira atu halo sira-nia TPC, halimar hamutuk no halo adorasaun família nian. Keta haree demais notísias kona-ba dezastre neʼe, no keta fakar sai Ita-nia hirus no estrese ba Ita-nia família. Simu ajuda husi ema seluk no mós ajuda fali ema seluk.

    Depois dezastre, halaʼo Ita-nia atividade hanesan baibain

  • Rekoñese katak dezastre lori susar. Governu no ema balu tau fokus atu salva ema, laʼós atu troka sasán sira neʼebé estraga ona. Loloos, ita presiza deʼit bee moos, hahán, roupa, no hela-fatin atubele kontinua moris.—1 Timóteo 6:7, 8.

  • Rekoñese katak dezastre bele afeta Ita- nia emosaun. Baibain ida-neʼe akontese depois dezastre. Karik Ita sei sente laran-susar, triste, sentimentu tun-saʼe, hanoin runguranga, susar atu toba no halo serbisu. Se nuneʼe, diʼak atu koʼalia ba Ita-nia belun.

Joshua la mate bainhira ahi han ninia eskritóriu, maibé ninia kolega barak mate. Irmaun katuas sira no doutór sira ajuda nia. Joshua hatete: “Sira dehan katak sentimentu triste neʼebé haʼu sente daudaun mak normál no ida-neʼe sei lakon. Liutiha fulan neen, haʼu bele toba dukur no ladún mehi kona-ba dezastre neʼe, maibé haʼu nafatin trauma.”

Bainhira dezastre akontese, ema barak sente katak justisa la iha. Ema balu fó sala ba Maromak. Ema barak mós fó sala ba sira-nia an tanba sira moris maibé ema seluk mate. Joshua mós sente hanesan neʼe, nia hatete: “Haʼu hanoin, karik iha tempu neʼebá, haʼu bele salva ema barak liután. Maibé hodi fiar katak lakleur tan Maromak sei hadiʼa mundu nia situasaun no halo mundu nakonu ho justisa, ida-neʼe fó kmaan mai haʼu. Agora haʼu hafolin liután haʼu-nia moris.”—Apokalipse 21:4, 5. *

^ par. 33 Atu hetan informasaun liután kona-ba Maromak nia promesa sira ba futuru no tanbasá nia husik terus no susar akontese, haree livru Tuir Loloos, Saida mak Bíblia Hanorin? Bele lee no download livru neʼe iha sítiu www.jw.org/tdt.