Skip to content

Skip to table of contents

 AJUDA BA FAMÍLIA | JOVEN SIRA

Atividade halimar nian neʼebé perigu

Atividade halimar nian neʼebé perigu

SUSAR NEʼEBÉ ITA HASORU

“Haʼu hamriik besik komboiu nia dalan bainhira komboiu liu daudaun. Neʼe halo haʼu kontente no haʼu sente hanesan haʼu-nia problema hotu lakon.”—Luís. *

“Bainhira haʼu hamriik iha fatuk aas nia leten no haksoit tun ba tasi, haʼu sente livre tebes. Neʼe halo haʼu kontente, maibé dala ruma haʼu mós sente taʼuk.”—Larissa.

Joven barak mós sente kontente tebes bainhira koko atividade halimar nian neʼebé perigu. Ita mós gosta halo hanesan neʼe ka lae? Se nuneʼe, informasaun sira-neʼe bele ajuda Ita.

BUAT NEʼEBÉ ITA PRESIZA HATENE

Atividade halimar nian neʼebé perigu bele domina ita. Karik foufoun ita sente kontente, maibé neʼe bele book ita atu halo buat neʼebé perigu liután. Hanesan ho Luís, Marco mós gosta hamriik besik komboiu, nia dehan: “Primeiru haʼu kontente duni. Maibé tuirmai haʼu hakarak koko atividade neʼebé perigu liután.”

Justin gosta atu uza sapatu-roda no kaer karreta sira neʼebé liu. Nia dehan: “Kontente neʼebé haʼu hetan halo haʼu hakarak atu koko hela deʼit. Haʼu hakarak ema gaba haʼu. Maibé ikusmai haʼu hetan asidente no tama ospitál.”

Kolega bele halo ita foti desizaun neʼebé sala. Joven ida naran Marvin hatete: “Haʼu-nia kolega obriga haʼu atu saʼe uma aas ida, hodi dehan: ‘Saʼe ona. Ó bele sa.’ Neʼe halo haʼu hanoin barak. Haʼu nakdedar bainhira haʼu komesa saʼe parede.” Larissa, neʼebé temi ona hatete: “Haʼu halo tuir deʼit buat neʼebé ema seluk halo.”

Hodi uza internét, ema balu halo ema seluk fiar katak atividade sira-neʼe la perigu. Ema balu mós hatama vídeo ka foto ba média sosiál hodi ema barak haree no gaba sira.

Porezemplu, ema balu halo vídeo kona-ba atividade halimar nian, naran parkour. Ema sira-neʼe sei halai, saʼe no haksoit husi fatin ida ba fatin seluk hanesan uma, parede no mós eskada, maski la uza ekipamentu ruma. Ikusmai ema hanoin sala katak: (1) Atividade neʼe ladún perigu.  (2) Ema barak mós halo. Rezultadu mak karik Ita mós hakarak atu koko atividade perigu oioin.

Hili atividade halimar nian neʼebé seguru. Bíblia hatete: “Treinu ita-nia isin lori buat diʼak.” (1 Timóteo 4:8) Maibé Bíblia mós dehan katak Ita presiza “moris ho hanoin neʼebé loos”. (Tito 2:12) Oinsá?

SAIDA MAK ITA BELE HALO?

Hanoin didiʼak. Bíblia hatete: “Ema neʼebé matenek hatudu hahalok tuir ninia koñesimentu, maibé ema beik hatudu sai ninia hahalok beik.” (Provérbios [Amsal] 13:16) Antes atu halo atividade halimar nian, husu ba Ita-nia an: ‘Haʼu tau haʼu-nia an iha perigu laran hodi halo atividade neʼe ka lae?’—Bíblia nia matadalan: Provérbios (Amsal) 14:15.

Hili kolega neʼebé hafolin moris. Kolega neʼebé diʼak sei la book ita atu halo buat neʼebé ita lakohi halo ka buat neʼebé perigu. Larissa hatete: “Kolega neʼebé diʼak ajuda haʼu atu halo desizaun neʼebé loos kona-ba atividade oioin. Bainhira haʼu hili kolega neʼebé diʼak, haʼu-nia moris mós troka.”—Bíblia nia matadalan: Provérbios (Amsal) 13:20.

Husu ba Ita-nia an: ‘Haʼu tau haʼu-nia an iha perigu laran hodi halo atividade neʼe ka lae?’

Kontente ho atividade halimar nian neʼebé seguru. Livru ida (Adolescent Risk Behaviors) esplika katak bainhira ita sai boot ba daudaun, ita ‘presiza aprende oinsá atu foti desizaun hodi moris tuir prinsípiu neʼebé loos’. Ita bele halo atividade halimar nian iha fatin neʼebé seguru, uza ekipamentu no mós halo tuir matadalan sira.

Respeitu ita-nia an. Ema sei respeitu ita, se sira haree katak ita halo desizaun ho matenek bainhira hasoru susar oioin, laʼós tanba ita brani atu halo buat neʼebé perigu. Larissa hatete: “Haʼu komesa estraga haʼu-nia moris bainhira haʼu halo atividade halimar nian neʼebé perigu. Diʼak liu iha tempu neʼebá haʼu la halo tuir ema seluk.”

Buat neʼebé importante: Duké tau ita-nia an iha perigu laran, hatudu matenek no hili didiʼak atividade halimar nian.—Bíblia nia matadalan: Provérbios (Amsal) 15:24.

^ par. 4 Naran balu iha informasaun neʼe laʼós naran neʼebé loos.