Skip to content

Skip to table of contents

Tenda tradisionál naran yurt neʼebé harii iha foho-leet Tash Rabat

 NASAUN NO POVU

Vizita ba rai-Kirgizistaun

Vizita ba rai-Kirgizistaun

KIRGIZISTAUN mak rai ida iha Ázia Sentrál neʼebé foho aas sira haleʼu, no nasaun sira neʼebé haleʼu rai neʼe mak rai-Kazakistaun, Uzbekistaun, Tajikistaun, no Xina. Porsentu 90 husi rai-Kirgizistaun mak foho deʼit. Rai-Kirgizistaun iha foho neʼebé aas liu hotu iha área Tian Shan, ho metru 7.439. Porsentu 4 husi rai neʼe mak ai-laran, maski nuneʼe, rai-Kirgizistaun iha ai-laran kastaña nian neʼebé luan tebetebes.

Testemuña ba Jeová hanorin Bíblia ba ema rihun ba rihun iha rai-Kirgizistaun

Ema Kirgize sira hatudu hahalok laran-luak no respeitu malu. Iha rai-Kirgizistaun, importante ba sira atu uza liafuan hanesan “Ita-Boot” bainhira sira koʼalia ba ema neʼebé idade liu no mós atu fó tuur-fatin iha bís. Sira mós fó tuur-fatin neʼebé diʼak liu iha uma laran ba ema neʼebé idade liu.

Baibain, família sira iha oan naʼin-tolu ka liu. Tuir sira-nia toman, oan-mane ikun mak sei hela hamutuk ho inan-aman no tau matan nafatin ba sira.

 Husi kiʼik kedas, inan-aman hanorin oan-feto sira atu aprende buat oioin hodi sira bele sai feen neʼebé diʼak, no maizumenus ho tinan 15 deʼit sira hatene ona atu halo serbisu hotu iha uma laran. Baibain, noiva nia família prepara sasán oioin, hanesan hena kama nian, roupa oioin no tapete neʼebé soru ho liman. No noivu fó osan no animál nuʼudar folin.

Bainhira ema mate ka halo festa ruma, sira oho bibi-malae ka kuda, no fahe naʼan sira-neʼe tuir membru família no bainaka ida-idak nia idade no pozisaun. Iha situasaun neʼe mós sira halo tuir sira-nia tradisaun hodi hatudu respeitu ba ema ida-idak. Tuirmai, sira han sira-nia hahán nasionál nian, neʼebé bolu besh barmak. Sira-nia toman mak han ida-neʼe ho liman deʼit.

Ema Kirgize sira gosta toka sira-nia instrumentu múzika naran komuz