Skip to content

Skip to table of contents

 BÍBLIA NIA HANORIN

Bonitu-bonita

Bonitu-bonita

Se ita iha hanoin neʼebé loos kona-ba neʼe, ita bele moris ho kontente. Maibé se lae, neʼe sei halo ita-nia moris la kontente.

Tanbasá mak ita hafolin buat neʼebé furak?

Ema nia kakutak iha kbiit atu nota buat neʼebé furak. Maski Bíblia la esplika oinsá mak ema iha kbiit hanesan neʼe, maibé Bíblia fó sai duni razaun tansá mak ema bele hafolin buat neʼebé furak. Neʼe mak tanba Maromak kria ema tuir ninia ilas. (Gênesis [Kejadian] 1:27; Eclesiastes [Pengkhotbah] 3:11) Maromak kria ita-nia isin iha dalan neʼebé komplikadu no kapás. Poezia antigu ida dehan: “Haʼu hahiʼi Ita [Maromak] tanba Ita halo haʼu iha dalan neʼebé kmanek.”—Salmo (Mazmur) 139:14.

Maibé ohin loron, ema barak iha hanoin neʼebé laloos kona-ba sira-nia oin no isin-lolon tanba sira hakarak sai hanesan ho artista ka jogadór sira neʼebé sai iha televizaun no filme. Tuir livru ida (Body Image), ema barak iha Amérika no Europa hanoin katak sira sei sente kontente só deʼit se sira mak bonitu ka bonita. Hanoin kloot hanesan neʼe halo sira haluha kona-ba buat neʼebé importante liu, neʼe mak sira-nia laran no hahalok.—1 Samuel 16:7.

Iha kultura barak, ema iha hanoin neʼebé laloos kona-ba sira-nia isin-lolon

Atu iha isin-lolon neʼebé seksi mós sai buat neʼebé importante tebes ba ema barak, liuliu ba feto sira. Tuir peskiza husi organizasaun ida (American Psychological Association, APA), televizaun, múzika, iklan no informasaun iha internét uza beibeik feto bonita sira neʼebé seksi, no neʼe fó influénsia ba ema barak nia hanoin. Maibé Bíblia anima ita atu la hafurak ita-nia an iha dalan hanesan neʼe, tanba neʼe bele lori susar oioin ba ita-nia an rasik!—Koloso 3:5, 6.

“Keta hafurak imi-nia an tuir deʼit buat neʼebé ema haree . . . , maibé buat neʼebé imi tenke hafurak mak imi-nia laran, hodi tau . . . hahalok laran-maus no laran-diʼak neʼebé iha folin boot iha Maromak nia oin.”1 Pedro 3:3, 4.

Tansá mak importante atu iha hanoin neʼebé loos?

Ema balu hatete: “Se ó mak bonitu ka bonita, keta taʼuk atu hatudu ida-neʼe!” Tuir peskiza husi APA, iha kultura neʼebé ema barak hanoin katak atu sai seksi mak importante, feto joven sira no labarik sira mós hanoin deʼit kona-ba sira-nia isin-lolon  atu dada ema seluk nia atensaun. Maibé hanoin hanesan neʼe perigu tebes. Tuir APA, hanoin hanesan neʼe bele halo sira hakarak dieta makaʼas, la hafolin an, la iha dignidade, sente laran-susar no depresaun.

“Hasai tiha husi ó-nia laran buat sira neʼebé lori susar, no hadook tiha buat aat husi ó-nia isin.”Eclesiastes (Pengkhotbah) 11:10.

Oinsá mak ita bele iha hanoin neʼebé loos?

Ema neʼebé iha hanoin neʼebé loos mak ema neʼebé haraik-an. (1 Timóteo 2:9) Ema neʼebé haraik-an la hanoin demais kona-ba sira-nia isin ka oin, maibé sira hanoin liu kona-ba sira-nia laran no mós ema seluk nia sentimentu. Hahalok hanesan neʼe halo ema seluk gosta no respeitu sira, liuliu ida-neʼe halo Maromak kontente. (Miquéias [Mikha] 6:8) Liután neʼe fasil ba ema neʼebé haraik-an atu hetan belun neʼebé diʼak. No sira mós bele hetan kaben neʼebé la hanoin deʼit ba hakarak isin nian, maibé hanoin kona-ba moris nuʼudar feen-laʼen neʼebé sei dura ba nafatin.

Bíblia anima ita atu hanoin liu kona-ba ‘hafurak ita-nia laran’. (1 Pedro 3:3, 4) Ita-nia laran neʼebé moos no furak sei dura ba nafatin maski ita sai idade ona. Tuir loloos, ita-nia hahalok furak sira bele sai furak liután ba beibeik! Provérbios (Amsal) 16:31 dehan: “Fuuk-mutin mak hanesan koroa furak ba ema sira neʼebé nafatin laʼo iha dalan neʼebé loos.” Tan neʼe, maski joven ka idade ona, ema neʼebé halo tuir Bíblia nia matadalan mak bonitu-bonita husi laran, no sira bele moris kontente ho dignidade.

“Oin bonita bele dura ba tempu badak deʼit, maibé feto neʼebé taʼuk ba Jeová sei simu hahiʼi.”Provérbios (Amsal) 31:30.