Skip to content

Skip to table of contents

Atitude no relasaun ho Maromak

Atitude no relasaun ho Maromak

Artigu primeiru husi revista neʼe hatete, ema barak rekoñese Bíblia mak livru neʼebé sagradu. Sira dehan katak bainhira lee no halo tuir Bíblia nia matadalan, sira sente besik ba Maromak no sente sira-nia moris iha folin.

Bíblia koʼalia kona-ba “ema espirituál”, ka ema neʼebé iha relasaun diʼak ho Maromak. Ema hanesan neʼe hafolin Maromak nia hanoin no moris tuir Ninia morál sira. Maibé ema neʼebé lakohi halo tuir Maromak nia matadalan mak ema neʼebé sadere deʼit ba sira-nia ideia rasik.​—Éfeso 5:1; Judas 18, 19, nota-rodapé.

ESPERANSA

BÍBLIA NIA PRINSÍPIU: “Se ó sai laran-triste iha tempu susar, ó-nia forsa sei menus.”​—Provérbios 24:10.

NEʼE KATAK SÁ: Laran-triste bele halo ita sai fraku atu tahan ita-nia problema. Maibé, esperansa bele hametin ita atu kontinua laʼo ba oin. Neʼe sei ajuda ita sente kmaan tanba hatene katak problema barak neʼebé ita hasoru mak temporáriu deʼit, no karik ita bele hetan rezultadu diʼak husi ida-neʼe.

SAIDA MAK ITA BELE HALO: Haburas atitude neʼebé pozitivu kona-ba futuru. Duké hanoin barak kona-ba buat neʼebé karik bele akontese ka hein ba situasaun atu sai diʼak liu, diʼak atu hakaʼas an kumpre planu sira neʼebé Ita iha ona. Maski “situasaun neʼebé mosu derrepente deʼit” kona ita hotu, maibé baibain, buat ida nia rohan sai diʼak liu fali buat neʼebé ita hanoin. Bíblia uza ezemplu kona-ba halo toʼos hodi dehan: “Kari ó-nia fini iha dadeer no keta husik ó-nia liman deskansa toʼo kalan, tanba ó la hatene ida-neʼebé mak sei moris, karik fini ida-neʼe ka ida neʼebá, ka karik rua-rua moris hotu.”​—Eclesiastes 9:11; 11:6.

 RESPOSTA BA PERGUNTA IMPORTANTE SIRA KONA-BA MORIS

BÍBLIA NIA PRINSÍPIU: “Fó haʼu kbiit atu komprende . . . Ita-nia liafuan mak lia-loos”.​—Salmo 119:144, 160.

NEʼE KATAK SÁ: Bíblia fó resposta ba pergunta sira neʼebé ema barak husu. Porezemplu, pergunta kona-ba

  • Ita ema mai husi neʼebé?

  • Tanbasá mak ita moris?

  • Saida mak akontese kuandu ema mate?

  • Ita-nia moris hanesan neʼe deʼit ka lae?

Ema millaun ba millaun iha mundu tomak hetan benefísiu barak hodi buka-hatene Bíblia nia resposta ba pergunta sira-neʼe no seluk tan.

SAIDA MAK ITA BELE HALO: Buka-hatene saida mak Bíblia hanorin. Husu Testemuña ba Jeová ida atu ajuda Ita komprende kona-ba Bíblia. Vizita ami-nia sítiu, jw.org/tdt, ka tuir ami-nia reuniaun sira. Ema hotu bele tuir no ami la husu ezmola.

PRINSÍPIU SELUK HUSI BÍBLIA

Haree vídeo Tanbasá Estuda Bíblia? iha jw.org/tdt. Vídeo neʼe iha língua hamutuk 880

REKOÑESE KATAK ITA PRESIZA IHA RELASAUN DIʼAK HO MAROMAK.

“Ksolok ba sira neʼebé hatene katak sira presiza Maromak nia matadalan.”​—MATEUS 5:3.

APRENDE LIUTÁN KONA-BA MAROMAK LIUHUSI BÍBLIA.

“Hakbesik ba Maromak, no nia sei hakbesik ba imi.”​—TIAGO 4:8.

LEE NO MEDITA KONA-BA BÍBLIA NIA MENSAJEN.

“Ksolok ba ema neʼebé . . . gosta tebes Jeová * nia ukun-fuan. Nia lee no medita [Maromak nia] ukun-fuan loron no kalan. . . . Nia sei hetan susesu iha buat hotu neʼebé nia halo.”​—SALMO 1:1-3.

^ par. 23 Jeová mak Maromak nia naran neʼebé temi iha Bíblia.