Skip to content

Skip to table of contents

 BÍBLIA NIA HANORIN

Anju sira

Anju sira

Husi uluk kedas, ema pinta dezeñu, hakerek livru no halo filme kona-ba anju sira. Maibé, anju sira mak hanesan saida? Sira halo saida?

Anju sira mak hanesan saida?

SAIDA MAK BÍBLIA HANORIN?

 

Antes Maromak kria universu, rai no ema primeiru, nia kria ona kriatura sira neʼebé iha matenek. Kriatura sira-neʼe iha forsa boot liu fali ema, no sira hela hamutuk ho Maromak iha lalehan, neʼebé ita-nia matan la bele haree. (Jó [Ayub] 38:4, 7) Bíblia bolu kriatura sira-neʼe nuʼudar “espíritu”, ka “anju” sira.—Salmo (Mazmur) 104:4. *

Maromak kria anju naʼin-hira? Barak tebetebes. Tuir Apokalipse 5:11, iha anju “rihun ba rihun” neʼebé haleʼu Maromak nia kadunan. Lia-gregu neʼebé tradús nuʼudar “rihun ba rihun” iha arti katak “10.000×10.000”. Se hanesan neʼe, ita bele hatene katak iha anju hamutuk naʼin–100.000.000 liu neʼebé mak serbí Maromak!

“Haʼu haree . . . anju barak neʼebé haleʼu kadunan neʼe . . . no sira hamutuk rihun ba rihun.”—Apokalipse 5:11.

Saida deʼit mak anju sira halo ona iha tempu antigu?

SAIDA MAK BÍBLIA HANORIN?

 

Dala barak, anju sira halo serbisu atu hatoʼo Maromak nia liafuan. * Anju sira mós halo milagre oioin tuir Maromak nia hakarak. Maromak haruka anju ida atu fó bensaun ba Abraão no hapara nia atu labele oho ninia oan-mane Isaac nuʼudar sakrifísiu. (Gênesis [Kejadian] 22:11-18) Anju ida mosu iha ai-hun ida neʼebé ahi han hela hodi hatoʼo ba Moisés lia-menon ida neʼebé ikusmai lori mudansa boot ba ninia moris. (Êxodo [Keluaran] 3:1, 2) Bainhira ema soe profeta Daniel ba leaun kuak, “Maromak haruka ninia anju atu taka leaun sira-nia ibun”.—Daniel 6:22.

“Jeová nia anju mosu ba [Moisés] iha ai-hun tarak ida neʼebé ahi han hela.”—Êxodo (Keluaran) 3:2.

 Ohin loron, anju sira halo saida?

SAIDA MAK BÍBLIA HANORIN?

 

Ita la hatene kona-ba buat hotu neʼebé anju sira halo daudauk ohin loron. Maibé Bíblia fó sai katak anju sira ajuda ema neʼebé laran-moos atu hatene liután kona-ba Maromak.—Apóstolu 8:26-35; 10:1-22; Apokalipse 14:6, 7.

Iha tempu uluk, Jeová fó ba Jacob mehi ida kona-ba anju sira neʼebé tun-saʼe liuhusi “eskada” entre lalehan no rai. (Gênesis [Kejadian] 28:10-12) Mehi neʼe ajuda Jacob no mós ita atu komprende katak Maromak Jeová haruka anju sira ba mundu hodi halaʼo knaar atu ajuda ema diʼak sira.—Gênesis (Kejadian) 24:40; Êxodo (Keluaran) 14:19; Salmo (Mazmur) 34:7.

[Jacob] haree eskada nia hun iha rai, no tutun toʼo lalehan; no Maromak nia anju sira tun-saʼe iha eskada neʼe.”—Gênesis (Kejadian) 28:12.

^ par. 6 Bíblia mós esplika kona-ba anju sira neʼebé kontra hasoru Maromak, no bolu sira nuʼudar “anju aat”.—Lucas 10:17-20.

^ par. 11 Tuir loloos, liafuan “anju” iha lia-ebraiku no gregu neʼebé temi iha Bíblia signifika katak “ida neʼebé lori mensajen”.