Skip to content

Skip to table of contents

Koʼalia ho respeitu mak hanesan ho simente neʼebé bele hametin Ita-nia moris kaben nian

 BA KABEN-NAʼIN

3: Respeitu malu

3: Respeitu malu

NEʼE KATAK SÁ

Se feen no laʼen respeitu malu, sira nafatin hatudu domin ba malu maski sira la konkorda malu. Livru ida hatete: “Feen no laʼen neʼebé respeitu malu sei la ulun-toos. Sira prontu atu koʼalia nakloke ba malu kona-ba problema neʼebé sira hasoru. Feen ka laʼen rona didiʼak ba sira-nia kaben nia hanoin no buka solusaun neʼebé diʼak ba sira naʼin-rua.”—Ten Lessons to Transform Your Marriage.

BÍBLIA NIA MATADALAN: “Domin . . . la buka nia rasik nia diʼak.”—1 Korinto 13:4, 5.

“Haʼu respeitu haʼu-nia feen hodi hafolin nia no lakohi halo buat ruma neʼebé bele hakanek nia ka sobu ami-nia moris kaben nian.”—Micah.

TANBASÁ IMPORTANTE

Bainhira feen no laʼen la hatudu ona respeitu ba malu, sira komesa kritika malu, koʼalia sai liafuan kroʼat no hatún malu. Matenek-naʼin sira hatete katak buat sira-neʼe mak sinál neʼebé hatudu katak karik sira sei soe-malu.

“Hodi soe piadas, hatún ka goza ita-nia feen sei halo nia sente moe, halo nia sente lakon fiar ba ita, no sobu ita-nia moris kaben nian.”—Brian.

SAIDA MAK ITA BELE HALO?

HUSU BA ITA-NIA AN

Durante semana ida, haree didiʼak ba Ita-nia hahalok no liafuan. Tuirmai husu ba Ita-nia an:

  • ‘Dala hira mak haʼu kritika haʼu-nia kaben no dala hira mak haʼu gaba nia?’

  • ‘Iha dalan saida deʼit mak haʼu hatudu katak haʼu respeitu haʼu-nia kaben?’

KOʼALIA BA ITA-NIA KABEN

  • Hahalok no liafuan hanesan saida mak bele halo ita sente katak ita respeitu malu?

  • Hahalok no liafuan hanesan saida mak bele halo ita sente katak ita la respeitu malu?

SUJESTAUN

  • Hakerek lista kona-ba dalan tolu oinsá Ita hakarak Ita-nia kaben atu respeitu Ita. Husu mós Ita-nia kaben atu halo nuneʼe. Troka lista ba malu no hakaʼas an atu halo tuir lista neʼe.

  • Hakerek lista kona-ba hahalok sira neʼebé Ita gosta husi Ita-nia kaben. Tuirmai hatete ba nia katak Ita hafolin tebes hahalok sira-neʼe.

“Haʼu respeitu haʼu-nia laʼen, hodi hatudu liuhusi haʼu-nia hahalok katak haʼu hafolin nia no hakarak nia atu sente kontente. Baibain haʼu halo nuneʼe liuhusi haʼu-nia liafuan ka halo buat oioin neʼebé simples deʼit.”—Megan.

Tuir loloos, buat neʼebé importante mak Ita-nia kaben sente katak Ita respeitu nia, laʼós Ita mak hanoin katak Ita hatudu ona respeitu ba nia.

BÍBLIA NIA MATADALAN: “Tau hahalok domin ho laran-sadiʼa nuʼudar imi-nia hatais hamutuk ho laran-diʼak, haraik-an, laran-maus, no pasiénsia.”—Koloso 3:12.