Skip to content

Skip to table of contents

Koʼalia nakloke mak hanesan ho ponte neʼebé ajuda Ita atu hakbesik ba Ita-nia oan

 BA INAN-AMAN

5: Koʼalia nakloke

5: Koʼalia nakloke

NEʼE KATAK SÁ

Koʼalia nakloke ba malu katak Ita no Ita-nia oan troka hanoin no sentimentu ba malu.

TANBASÁ IMPORTANTE

Dala ruma, susar duni atu koʼalia nakloke ho joven sira. Bainhira Ita-nia oan sira sei kiʼik, sira lalais atu koʼalia nakloke ba Ita. Maibé tanba sira joven ona, sira ladún koʼalia tan ho Ita. Tan neʼe, Ita la hatene Ita-nia oan nia sentimentu no hanoin. Neʼe hanesan Ita hamriik iha mota nia sorin ida no Ita-nia oan sira iha sorin seluk. Bainhira oan sira hatudu katak sira lakohi koʼalia ho inan-aman, tuir loloos, neʼe mak tempu neʼebé sira presiza duni atu koʼalia ba inan-aman.

SAIDA MAK ITA BELE HALO?

Sai prontu atu koʼalia iha tempu naran deʼit. Sempre prontu, maski Ita-nia oan hakarak atu koʼalia ho Ita iha kalan-boot.

“Karik Ita hakarak hatete: ‘Tanbasá ó hakarak koʼalia agora? Tanbasá ó la koʼalia ohin kedas!’ Tuir loloos, ita tenke kontente tanba sira hakarak koʼalia nakloke. Inan-aman hotu hakarak atu oan sira koʼalia nakloke ba sira, loos ka lae?”—Lisa.

“Haʼu toman atu toba sedu, maibé dala ruma, haʼu-nia oan joven sira kontente liu atu koʼalia nakloke bainhira kalan-boot.”—Herbert.

BÍBLIA NIA MATADALAN: “Ema ida-idak tenke kontinua buka uluk ema seluk nia diʼak, laʼós nia rasik nia diʼak.”—1 Korinto 10:24.

Rona didiʼak. Aman ida hatete: “Bainhira haʼu-nia oan koʼalia mai haʼu, dala ruma haʼu ladún rona didiʼak tanba hanoin hela kona-ba buat seluk. No sira hatene katak haʼu la rona didiʼak.”

Se Ita mós sente hanesan aman neʼe, diʼak atu hamate televizaun no tau dook telemovel. Maski Ita hanoin katak buat neʼebé Ita-nia oan koʼalia mak ladún importante, maibé nafatin rona didiʼak hodi hatudu katak Ita hafolin ninia hanoin.

“Hatudu katak ita hafolin ita-nia oan nia sentimentu. Se sira hanoin katak ita la interese ba sira, sira sei lakohi fó sai sira-nia sentimentu ka sira sei fó sai ida-neʼe ba ema seluk.”—Maranda.

“Se ita-nia oan fó sai hanoin ruma neʼebé laloos, keta lalais atu hirus.”—Anthony.

BÍBLIA NIA MATADALAN: “Haree didiʼak oinsá imi rona.”—Lucas 8:18.

Sai prontu atu koʼalia iha fatin naran deʼit. Dala ruma, fasil liu ba oan sira atu koʼalia nakloke ba sira-nia inan-aman se sira la tuur no hateke malu.

“Ami aproveita ami-nia tempu iha karreta laran tanba fasil liu ba ami atu koʼalia nakloke ba malu iha situasaun hanesan neʼe.”—Nicole.

Tempu han mak oportunidade diʼak atu koʼalia nakloke ba malu.

“Bainhira han-kalan, ami ida-idak konta kona-ba buat diʼak no aat neʼebé akontese iha loron neʼe. Hodi halo hanesan neʼe, ajuda ami atu hakbesik ba malu no prontu atu ajuda malu.”—Robin.

BÍBLIA NIA MATADALAN: “Lalais atu rona [no] neineik atu koʼalia.”—Tiago 1:19.