Skip to content

Skip to table of contents

Halo tuir inan-aman mak hanesan ho selu Ita-nia debe hotu iha banku. Se ema tau fiar liután ba Ita, Ita bele empresta osan tan

 BA JOVEN

10: Ema bele tau fiar

10: Ema bele tau fiar

NEʼE KATAK SÁ

Liuhusi hahalok, Ita bele hatudu ba Ita-nia inan-aman, kolega no mós patraun katak sira bele tau fiar ba Ita. Ita halo nuneʼe hodi halo tuir regra sira, kumpre Ita-nia promesa sira no sempre koʼalia buat neʼebé loos.

TANBASÁ IMPORTANTE

Dala barak, liberdade neʼebé Ita simu depende ba hahalok neʼebé Ita hatudu hodi prova katak ema bele tau fiar ba Ita.

“Maski ita hamutuk ho inan-aman ka ita mesak, se ita hatudu katak ita mak ema maduru no bele kaer responsabilidade, sira sei tau fiar ba ita.”—Sarahi.

BÍBLIA NIA MATADALAN: “Hatudu nafatin hahalok diʼak.”—1 Pedro 2:12.

SAIDA MAK ITA BELE HALO?

Hakat sira tuirmai bele halo ema tau fiar liután ba Ita.

Hatudu laran-moos. Fasil deʼit ba ema seluk atu lakon fiar ba Ita se Ita bosok. Maibé bainhira Ita koʼalia buat neʼebé loos no la subar Ita-nia sala, fasil ba ema atu tau fiar ba Ita.

“Fasil atu koʼalia nakloke bainhira Ita la halo sala ruma. Maibé ema sei tau fiar liután ba Ita, se Ita koʼalia nakloke maski neʼe lori susar ba Ita.”—Caiman.

BÍBLIA NIA MATADALAN: “Ami hakarak atu hatudu laran-moos iha buat hotu.”—Ebreu 13:18.

Ema bele tau fiar. Hodi aprende oinsá atu sai ema neʼebé ema seluk bele tau fiar, neʼe bele ajuda Ita bainhira Ita sai boot. Porezemplu, relatóriu ida husi Estadus Unidus hatete katak porsentu 78 husi kompañia sira buka serbisu-naʼin neʼebé sira bele tau fiar, tanba hahalok neʼe importante tebes.

“Haʼu-nia inan-aman haree katak haʼu halo serbisu uma-laran nian hodi la hein toʼo sira mak husu haʼu atu halo. Bainhira haʼu halo nuneʼe, sira tau fiar liután ba haʼu.”—Sarah.

BÍBLIA NIA MATADALAN: “Haʼu fiar metin katak ó sei halo tuir ida-neʼe, . . . haʼu hatene katak ó sei halo barak liu fali buat neʼebé haʼu dehan.”—Filemon 21.

Hatudu pasiénsia. Fasil ba ema seluk atu haree Ita sai boot iha dalan fíziku, maibé presiza tempu ba ema seluk atu bele haree katak Ita sai maduru. Tan neʼe, joven sira presiza duni pasiénsia.

“Presiza duni tempu atu ita-nia inan-aman no ema seluk bele tau fiar ba ita. Maibé se ita kontinua hatudu katak ita mak maduru, ikusmai sira sei tau fiar ba ita.”—Brandon.

BÍBLIA NIA MATADALAN: “Tau hahalok . . . pasiénsia.”—Koloso 3:12.