Skip to content

Skip to table of contents

Toledo mak sidade neʼebé nakonu ho rai-España nia istória no kultura. Iha tinan 1986, UNESCO hili sidade neʼe nuʼudar Patrimóniu Mundiál, ka rikusoin mundu nian.

 NASAUN NO POVU

Vizita ba rai-España

Vizita ba rai-España

ESPAÑA mak rai ida neʼebé furak ho ema husi rasa oioin. España iha toʼos-trigu, toʼos-uvas no ai-hun oliveira barak. Distánsia husi rai-España parte súl toʼo rai Áfrika mak kilómetru 14 deʼit.

Iha tempu antigu, ema barak husi rai oioin, inklui mós rai Fenísia, Grésia no Kartagu bá toʼo área neʼe. Ikusmai, maizumenus tinan 200 molok Kristu, ema Roma mós toʼo iha área neʼe no hanaran Hispania. Tuirmai, ema Vizigodu no ema Mouru mak okupa fali área neʼe, no sira mós fó influénsia ba kultura España nian.

Iha tinan 2015, ema naʼin-68.000.000 liu mak bá vizita España. Ema barak gosta rai-España tanba ninia kultura, arte, fatin istóriku oioin no tasi neʼebé furak.  Ema barak mós bá neʼebá atu han hahán España nian, neʼebé inklui ikan, boek, sipu, naʼan-fahi maran, kaldeirada, salada no modo oioin neʼebé teʼin ho azeite. Hahán España nian neʼebé ema barak hatene mak paella (etu neʼebé teʼin hamutuk ho modo, naʼan, ikan no temperus oioin), tapas (hahán kiʼik oioin, inklui mós keiju, xourisu no oliveira-fuan), no manu-tolun sona España nian.

Mariscada, hahán España nian

Dansa flamenco

Baibain, ema España gosta koʼalia no ransu. Maioria husi ema España mak Katólika Roma, maibé ema uitoan deʼit mak tuir misa. Ohin loron, ema husi rai Áfrika, Ásia, no Amérika Latina mós muda ba neʼebá, no sira barak gosta koʼalia kona-ba relijiaun no kostume. Testemuña ba Jeová ajuda sira atu aprende Bíblia nia hanorin kona-ba tópiku oioin.

Durante tinan 2015, Testemuña ba Jeová naʼin-10.500 mak hola parte iha serbisu voluntáriu atu harii ka hadiʼa sira-nia reuniaun-fatin hamutuk 70. Iha fatin balu, estadu fó rai ba Testemuña sira atu bele harii sira-nia reuniaun-fatin. Testemuña ba Jeová ajuda ema husi rai seluk hodi halaʼo reuniaun iha língua oioin hamutuk 30 liu. Iha tinan 2016, ema naʼin-186.000 liu mak asiste reuniaun espesiál husi Testemuña ba Jeová atu komemora Jesus Kristu nia mate.