Skip to content

Skip to table of contents

 LISAUN ESTUDU 45

Oinsá espíritu santu bele ajuda ita?

Oinsá espíritu santu bele ajuda ita?

“Iha situasaun hotu haʼu hetan forsa liuhusi nia neʼebé fó kbiit mai haʼu.”​—FLP 4:13.

KNANANUK 104 Espíritu santu mak Maromak nia prezente

IHA LISAUN NEʼE *

1-2. (a) Saida mak bele ajuda ita atu tahan susar sira ba loron ida-idak? Esplika toʼok. (b) Saida mak ita sei aprende iha lisaun neʼe?

BAINHIRA Ita hanoin fali susar neʼebé uluk Ita hasoru, karik Ita hanoin: “Haʼu rekoñese katak haʼu tahan susar neʼe laʼós ho haʼu-nia kbiit rasik.” Karik Ita tahan ona moras todan ka ema neʼebé Ita hadomi mate. Bainhira Ita hanoin kona-ba susar sira-neʼe, Ita sente katak Ita konsege tahan susar ba loron ida-idak tanba Jeová nia espíritu santu fó Ita “kbiit neʼebé la hanesan baibain”.—2 Kor 4:7-9.

2 Ita mós presiza espíritu santu atu ajuda ita tahan influénsia aat husi mundu neʼe. (1 João 5:19) Liután neʼe, ita presiza kbiit atu “kontra anju aat sira”. (Éf 6:12) Agora ita sei aprende dalan rua neʼebé espíritu santu ajuda ita atu tahan susar sira-neʼe. Tuirmai ita mós sei aprende kona-ba saida mak ita bele halo atu espíritu santu ajuda ita liután.

ESPÍRITU SANTU FÓ ITA KBIIT

3. Saida mak dalan ida neʼebé Jeová ajuda ita tahan susar sira?

3 Jeová nia espíritu santu ajuda ita hodi fó ita kbiit ka forsa atu kumpre ita-nia responsabilidade hotu maski hasoru susar. Apóstolu Paulo sente katak nia bele kontinua serbí Jeová maski hasoru susar tanba nia sadere ba “Kristu nia kbiit”. (2 Kor 12:9) Durante Paulo nia viajen segundu nuʼudar misionáriu, nia hakaʼas an haklaken no mós halo serbisu atu manán osan. Iha Korinto, nia hela iha Áquila no Priscila nia uma. Áquila no Priscila nia serbisu mak atu halo tenda. Paulo mós hatene halo tenda, tan neʼe nia serbisu hamutuk ho sira ba loron balu. (Após 18:1-4) Espíritu santu fó kbiit ba Paulo atu halo serbisu hodi manán osan no mós kumpre ninia serbisu haklaken.

4. Tuir 2 Korinto 12:7b-9, Paulo hasoru susar saida?

 4 Lee 2 Korinto 12:7b-9. Tuir eskritura neʼe, Paulo nia liafuan “ai-tarak iha haʼu-nia isin” signifika saida? Se ai-tarak sona Ita-nia isin, Ita terus loos. Entaun, Paulo nia liafuan neʼe hatudu katak nia hasoru susar ruma neʼebé halo nia terus loos. Nia dehan katak susar neʼe hanesan “anju ida husi Satanás” neʼebé kontinua “basa” (“baku”, nota) nia. Karik laʼós Satanás ka anju aat sira mak hamosu Paulo nia susar neʼebé hanesan ai-tarak. Maibé, bainhira anju aat sira haree “ai-tarak” neʼe, karik sira koko atu aumenta Paulo nia terus no neʼe hanesan dudu tama tan ai-tarak neʼe. Saida mak Paulo halo?

5. Oinsá mak Jeová hatán ba Paulo nia orasaun?

5 Foufoun, Paulo hakarak hasai tiha “ai-tarak” neʼe. Nia dehan: “Dala tolu ona haʼu husu ho laran ba Naʼi [Jeová] . . . atu bele hasai tiha ai-tarak neʼe husi haʼu.” Maski Paulo halo orasaun, ai-tarak neʼe iha nafatin. Neʼe katak Maromak la hatán Paulo nia orasaun ka lae? Lae. Maromak hatán duni Paulo nia orasaun. Jeová la hasai Paulo nia susar, maibé nia fó kbiit ba Paulo atu tahan. Jeová dehan: “Haʼu-nia kbiit sai kompletu kuandu ó fraku.” (2 Kor 12:8, 9) Ho Maromak nia ajuda, Paulo bele sente ksolok nafatin no sente dame iha laran!—Flp 4:4-7.

6. (a) Karik Jeová sei hatán ita-nia orasaun iha dalan oinsá? (b) Iha parágrafu neʼe, eskritura ida-neʼebé mak hametin Ita?

6 Hanesan Paulo, Ita mós harohan ona ba Jeová atu hasai tiha Ita-nia susar ka lae? Karik Ita harohan beibeik maibé Ita-nia susar iha nafatin ka sai aat liu. Neʼe halo Ita sente katak Jeová la kontente ho Ita ka lae? Se nuneʼe, hanoin-hetan Paulo nia ezemplu. Jeová hatán ninia orasaun, no Jeová mós sei hatán Ita-nia orasaun! Karik Jeová la hasai Ita-nia susar. Maibé liuhusi ninia espíritu santu, nia sei fó Ita kbiit atu tahan susar neʼe. (Sal 61:3, 4) Karik Ita sente hanesan ema ‘soe Ita ba rai’, maibé Jeová sei nunka husik hela Ita.—2 Kor 4:8, 9; Flp 4:13.

ESPÍRITU SANTU AJUDA ITA KONTINUA SERBÍ JEOVÁ

7-8. (a) Iha dalan saida mak ita bele kompara espíritu santu ho anin? (b) Pedro esplika saida kona-ba dalan neʼebé espíritu santu ajuda ema?

7 Saida mak dalan seluk neʼebé espíritu santu ajuda ita? Ita bele kompara espíritu santu ho anin. Anin neʼebé huu ba diresaun neʼebé loos bele lori ró toʼo fatin ho seguru maski laloran boot. Nuneʼe mós, espíritu santu bele ajuda ita kontinua serbí Jeová toʼo mundu foun maski ita hasoru susar.

8 Tanba apóstolu Pedro mak peskadór ida, nia hatene buat barak kona-ba halo viajen ho ró. Karik tan razaun neʼe, nia uza liafuan neʼebé karik iha ligasaun ho viajen ho ró bainhira nia hakerek kona-ba oinsá espíritu santu ajuda ema. Nia hakerek: “Profesia la fó sai husi ema nia hakarak, maibé ema koʼalia liafuan husi Maromak tanba espíritu santu book sira atu fó sai liafuan sira-neʼe.” Liafuan Gregu neʼebé tradús nuʼudar “book” bele signifika “lori; dirije”.—2 Ped 1:21; nota.

9. Bainhira Pedro uza liafuan “dirije”, nia hakarak ema atu hanoin saida?

9 Bainhira Pedro uza liafuan “dirije”, nia hakarak ema atu hanoin saida? Lucas neʼebé hakerek livru Apóstolu, uza liafuan Gregu neʼebé besik atu hanesan bainhira esplika kona-ba ró neʼebé anin “lori”. (Após 27:15) Matenek-naʼin ida kona-ba Bíblia dehan katak Pedro uza fraze neʼebé  halo ema hanoin kona-ba halo viajen ho ró bainhira nia hatete katak espíritu santu mak “dirije” ema atu hakerek Bíblia. Pedro nia liafuan neʼe hatudu katak hanesan anin lori ró atu bele kumpre ninia viajen, nuneʼe mós espíritu santu dirije ema sira neʼebé hakerek Bíblia atu kumpre sira-nia knaar. Matenek-naʼin neʼe mós dehan katak ema sira neʼebé hakerek Bíblia mak hanesan ró neʼebé loke ona ninia laan. Sira prontu atu halo serbisu neʼebé espíritu santu dirije sira atu halo. Jeová halo ninia parte. Nia fó “anin” ka espíritu santu. Ema sira neʼebé hakerek Bíblia mós halo sira-nia parte. Sira husik espíritu santu dirije sira.

HAKAT 1: Halo beibeik atividade espirituál

HAKAT 2: Hakaʼas an atu halo atividade sira-neʼe tuir Ita-nia kbiit (Haree parágrafu 11) *

10-11. Buat rua saida mak ita tenke halo atu espíritu santu ajuda ita? Fó toʼok ezemplu ida.

10 Ohin loron, Jeová la uza tan ninia espíritu santu atu book ema hakerek Bíblia. Maibé, Jeová sei uza nafatin ninia espíritu atu dirije ninia povu. Jeová nafatin halo ninia parte. Ita presiza halo saida atu espíritu santu ajuda ita? Ita presiza kontinua halo ita-nia parte. Oinsá?

11 Hanoin toʼok komparasaun neʼe. Se ró-naʼin hakarak anin lori ninia ró, nia tenke halo buat rua. Primeiru, nia tenke muda ninia ró ba fatin neʼebé anin huu. Ninia ró sei la book an se nia para deʼit iha ponte-kais dook husi fatin neʼebé anin huu. Segundu, nia tenke loke luan ró nia laan. Klaru katak maski anin huu, maibé ninia ró bele muda só deʼit se anin kona ró nia laan. Nuneʼe mós, ita bele kontinua serbí Jeová só deʼit se ita simu ajuda husi espíritu santu. Atu espíritu santu ajuda ita, ita tenke halo buat rua. Primeiru, ita tenke halo atividade sira neʼebé Maromak nia espíritu santu dirije ita atu halo. Segundu, ita tenke hakaʼas an atu halo atividade sira-neʼe tuir ita-nia kbiit. (Sal 119:32) Bainhira ita halo hakat sira-neʼe, espíritu santu bele ajuda ita atu tahan susar neʼebé hanesan laloran boot, no mós  ajuda ita kontinua serbí Jeová ho laran-metin toʼo mundu foun.

12. Agora ita sei aprende kona-ba saida?

12 Ita aprende ona dalan rua oinsá espíritu santu ajuda ita. Espíritu santu fó ita kbiit no ajuda ita atu laran-metin nafatin maski hasoru susar. Espíritu santu mós dirije ita no ajuda ita atu kontinua serbí Maromak toʼo ita hetan moris ba nafatin. Agora ita sei aprende kona-ba atividade haat neʼebé ita tenke halo hodi espíritu santu bele ajuda ita liután.

OINSÁ ESPÍRITU SANTU BELE AJUDA ITA LIUTÁN?

13. Tuir 2 Timóteo 3:16, 17, oinsá Eskritura sira ajuda ita? Saida mak ita presiza halo?

13 Primeiru, estuda Maromak nia Liafuan. (Lee 2 Timóteo 3:16, 17.) Liafuan Gregu neʼebé tradús nuʼudar “mai husi Maromak” bele signifika “Maromak huu iis”. Maromak uza ninia espíritu santu atu “huu” ka tau ninia hanoin ba ema sira neʼebé hakerek Bíblia. Bainhira ita lee Bíblia no medita buat neʼebé ita lee, Maromak nia hanorin sira tama ba ita-nia neon no laran. No neʼe book ita atu halaʼo moris tuir Maromak nia hakarak. (Ebr 4:12) Maibé atu Maromak nia espíritu santu ajuda ita liután, ita tenke arranja tempu atu estuda beibeik Bíblia no medita buat neʼebé ita lee. Tuirmai ida-neʼe sei fó influénsia ba ita-nia liafuan no hahalok.

14. (a) Tanbasá mak ita bele dehan katak espíritu santu hamutuk ho ita bainhira tuir reuniaun sira? (b) Ita presiza halo saida atu espíritu santu ajuda ita kuandu tuir reuniaun?

14 Segundu, adora Maromak hamutuk. (Sal 22:22) Tuir loloos, bainhira ita tuir reuniaun, Jeová nia espíritu santu hamutuk ho ita. (Apok 2:29) Tanbasá ita dehan nuneʼe? Tanba bainhira ita halibur hamutuk ho ita-nia maluk Kristaun atu adora Maromak, ita halo orasaun hodi husu espíritu santu, ita kanta knananuk sira neʼebé bazeia ba Bíblia, no mós ita rona ba diskursu sira neʼebé bazeia ba Bíblia husi katuas no atan ba kongregasaun neʼebé simu knaar husi espíritu santu. No espíritu santu mós ajuda irmán sira atu prepara no hatoʼo sira-nia parte. Maibé atu espíritu santu ajuda ita liután, ita presiza prepara nanis atu fó komentáriu iha reuniaun sira. Hodi halo nuneʼe, ita prontu atu husik espíritu santu ajuda ita kuandu tuir reuniaun. Neʼe hanesan ró neʼebé ninia laan nakloke ona.

15. Oinsá espíritu santu bele ajuda ita iha serbisu haklaken? Ita presiza halo saida?

15 Terseiru, hola parte atu haklaken. Bainhira ita uza Bíblia atu haklaken no hanorin ema, ita husik espíritu santu ajuda ita iha serbisu haklaken. (Rom 15:18, 19) Maibé atu espíritu santu bele ajuda Ita liután, Ita tenke haklaken beibeik no uza Bíblia beibeik. Dalan ida atu bele koʼalia hodi book ema nia laran bainhira haklaken mak hodi uza ezemplu atu haklaken husi livru Moris Kristaun no Haklaken.

16. Saida mak dalan diʼak liu atu simu espíritu santu?

16 Ikus, halo orasaun ba Jeová. (Mt 7:7-11; Lc 11:13) Dalan diʼak liu atu simu espíritu santu mak hodi husu ba Jeová liuhusi orasaun. La iha buat ida mak bele hanetik ita-nia orasaun atu toʼo ba Jeová ka hanetik Maromak nia espíritu santu atu toʼo mai ita. Espíritu santu bele ajuda ita maski ita iha komarka, no Satanás la iha kbiit atu hanetik ita simu espíritu santu. (Tgo 1:17) Ita tenke halo orasaun iha dalan oinsá atu espíritu santu bele ajuda ita liután? Atu hatán ba pergunta neʼe, mai ita hanoin kona-ba ai-knanoik neʼebé hakerek iha  Evanjellu Lucas no oinsá ida-neʼe hanorin ita kona-ba orasaun. *

HALO ORASAUN BEIBEIK

17. Jesus nia ai-knanoik iha Lucas 11:5-9, 13 hanorin ita saida kona-ba orasaun?

17 Lee Lucas 11:5-9, 13. Jesus nia ai-knanoik neʼe hatudu oinsá ita bele halo orasaun hodi husu espíritu santu. Iha ai-knanoik neʼe, mane neʼe hetan buat neʼebé nia presiza tanba “husu beibeik”. Maski kalan-boot ona, nia la taʼuk atu husu ajuda husi ninia belun. (Lc 11:8) * Oinsá Jesus liga ai-knanoik neʼe ho halo orasaun? Nia hatete: “Kontinua husu, no imi sei simu. Kontinua buka, no imi sei hetan. Kontinua dere odamatan, odamatan sei loke ba imi.” Ita bele aprende saida? Atu bele simu ajuda husi espíritu santu, ita tenke halo orasaun beibeik hodi husu ida-neʼe.

18. Tuir Jesus nia ai-knanoik, tanbasá ita bele iha konfiansa katak Jeová sei fó ninia espíritu santu ba ita?

18 Jesus nia ai-knanoik mós ajuda ita atu haree tanbasá Jeová sei fó ninia espíritu santu ba ita. Mane iha ai-knanoik neʼe hakarak sai uma-naʼin neʼebé diʼak. Nia sente katak nia iha obrigasaun atu fó hahán ba bainaka neʼebé mai kalan-boot maibé nia la iha hahán. Jesus hatete katak mane neʼe nia viziñu ajuda tanba mane neʼe husu beibeik paun. Jesus hanorin saida ba ita? Se ema neʼebé la perfeitu prontu ajuda ninia viziñu neʼebé husu beibeik, sá tan ita-nia Aman iha lalehan neʼebé laran-diʼak, nia sei prontu atu ajuda sira neʼebé husu beibeik ninia espíritu santu. Tan neʼe, ita bele halo orasaun ho konfiansa katak Jeová sei hatán ba ita-nia orasaun atu husu ninia espíritu santu.—Sal 10:17; 66:19.

19. Tanbasá ita bele fiar katak ita sei tahan?

19 Ita bele fiar katak maski Satanás kontinua koko ita, maibé ita bele tahan. Tanbasá? Tanba espíritu santu ajuda ita iha dalan rua. Primeiru, espíritu santu fó ita kbiit atu tahan susar sira. Segundu, espíritu santu mak kbiit neʼebé ajuda ita atu kontinua serbí Jeová toʼo tama ba mundu foun. Mai ita hakaʼas an atu husik espíritu santu ajuda ita liután!

KNANANUK 41 Rona mai haʼu-nia orasaun

^ par. 5 Ita sei aprende oinsá Maromak nia espíritu santu bele ajuda ita atu tahan. Ita mós sei aprende kona-ba saida mak ita presiza halo atu espíritu santu ajuda ita liután.

^ par. 16 Evanjellu Lucas iha informasaun barak liu kona-ba orasaun duké Evanjellu seluk, no bele ajuda ita komprende katak orasaun mak parte importante iha Jesus nia moris.—Lc 3:21; 5:16; 6:12; 9:18, 28, 29; 18:1; 22:41, 44.

^ par. 17 Haree nota estudu “husu beibeik” iha Informasaun atu uza hamutuk livru Moris Kristaun no Haklaken fulan-Jullu 2018, pájina 6.

^ par. 60 ESPLIKASAUN BA DEZEÑU: HAKAT 1: Irmaun no irmán ida toʼo iha Reuniaun-Fatin. Hodi halibur hamutuk ho sira-nia maluk Kristaun, sira halo atividade espirituál neʼebé espíritu santu mak dirije. HAKAT 2: Sira sai prontu atu fó komentáriu iha reuniaun. Hakat rua neʼe mós aplika ba atividade sira seluk neʼebé ita aprende ona iha lisaun neʼe: estuda Maromak nia Liafuan, hola parte atu haklaken, no halo orasaun ba Jeová.