Skip to content

Skip to table of contents

 INFORMASAUN IHA OIN | SAIDA MAK PREZENTE DIʼAK LIU HOTU?

“Neʼe mak prezente diʼak liu hotu neʼebé haʼu simu”

“Neʼe mak prezente diʼak liu hotu neʼebé haʼu simu”

Labarik-feto ho tinan 13 koʼalia liafuan sira-neʼe bainhira nia simu asu ida nuʼudar prezente. Feto serbisu-naʼin ida hatete katak komputadór neʼebé ninia apá fó ba nia mak prezente neʼebé troka ninia moris. No laʼen ida sente katak karta neʼebé ninia feen halo ba sira-nia aniversáriu kazamentu mak prezente neʼebé diʼak liu hotu.

Tinan-tinan, ema barak hakaʼas an atu buka prezente “diʼak liu hotu” ba sira-nia kolega ka família bainhira tempu espesiál ruma. No sira mós hein atu ema bele hafolin prezente neʼebé sira fó hodi rona komentáriu sira hanesan temi iha parágrafu antes neʼe. Oinsá ho Ita rasik? Ita hakarak aprende oinsá atu fó prezente neʼebé ema sei hafolin ka lae?

Hodi aprende oinsá atu fó prezente neʼebé ema sei hafolin, neʼe sei halo Ita rasik no ema neʼebé simu Ita-nia prezente sente kontente. Bíblia hatete: “Kontente liu atu fó duké simu.” (Apóstolu 20:35) Loos duni, Ita sei kontente liután se ema hafolin prezente neʼebé Ita fó ba sira.

Entaun, oinsá mak Ita-nia prezente bele lori kontente ba Ita no mós ba ema neʼebé simu? No saida mak Ita bele halo atu ema hafolin Ita-nia prezente maski karik ida-neʼe laʼós prezente neʼebé “diʼak liu hotu”?