Skip to content

Skip to table of contents

Jesus nia oin no isin haree hanesan saida?

Jesus nia oin no isin haree hanesan saida?

Jesus nunka haruka ema atu halo dezeñu ka estátua kona-ba nia. Maski nuneʼe, durante tinan atus ba atus, ema barak halo dezeñu ka estátua kona-ba Jesus.

Tuir loloos, ema neʼebé halo dezeñu ka estátua kona-ba Jesus la hatene ho loloos ninia oin. Sira halo tuir deʼit sira-nia kultura, relijiaun no ema nia hakarak. Dezeñu no estátua sira-neʼe bele book ema atu hanoin sala kona-ba Jesus no ninia hanorin sira.

Dezeñu balu hatudu katak Jesus mak ema neʼebé fraku, fuuk naruk, iha hasan-rahun mihis no iha oin neʼebé triste. No dezeñu seluk tan, hatudu katak Jesus la interese ba ema seluk ka nia mak anju ida. Entaun, dezeñu sira-neʼe fó sai Jesus iha dalan neʼebé loos ka lae? Oinsá mak ita bele buka-hatene kona-ba neʼe? Bíblia bele ajuda ita atu komprende kona-ba Jesus nia oin no isin, no mós bele ajuda ita atu iha hanoin neʼebé loos kona-ba Jesus.

“ITA PREPARA ISIN-LOLON MAI HAʼU”

Neʼe mak liafuan neʼebé Jesus temi iha ninia orasaun bainhira nia hetan batizmu. (Ebreu 10:5; Mateus 3:13-17) Se nuneʼe, Jesus nia isin-lolon haree oinsá? Tinan 30 antes neʼe, anju Gabriel hatete ba Maria: “Ó sei sai isin-rua no tuur ahi oan-mane ida, . . . Maromak nia Oan-Mane.” (Lucas 1:31, 35) Neʼe katak Jesus perfeitu hanesan ho Adão uluk. (Lucas 3:38; 1 Korinto 15:45) Entaun, Jesus iha isin neʼebé diʼak no karik nia oin atu hanesan ninia inan, Maria.

Jesus mak mane judeu ida. No mane judeu sira toman atu iha hasan-rahun neʼebé ladún naruk no la runguranga. Iha tempu uluk, hasan-rahun reprezenta dignidade. Entaun, ita bele fiar katak Jesus mós tau matan didiʼak ba ninia hasan-rahun no tesi ninia fuuk. Só ema nazireu deʼit mak la tesi sira-nia fuuk, ezemplu ida mak Sansão.—Números (Bilangan) 6:5; Juízes (Hakim-Hakim) 13:5.

Ba tempu kleur, toʼo Jesus maizumenus tinan 30, nia serbisu nuʼudar karpinteiru, no iha Jesus nia tempu seidauk iha ekipamentu modernu. (Marcos 6:3) Neʼe duni, ita bele fiar katak Jesus iha isin neʼebé forte. Porezemplu, Jesus mesak deʼit “duni sai sira hotu husi templu hamutuk ho sira-nia karau no bibi sira, no nia fakar sai osan-besi husi ema troka osan nian no taka fila sira-nia meza”. (João 2:14-17) Jesus mós uza ninia isin-lolon neʼebé Maromak fó ba nia atu halo tuir Maromak nia hakarak. Jesus dehan: “Haʼu tenke haklaken mós liafuan diʼak kona-ba Maromak nia Ukun iha sidade seluk, basá tan neʼe mak Maromak haruka haʼu mai.” (Lucas 4:43) Sin, atu duni sai ema husi templu no laʼo-rai hodi haklaken iha rai-Palestina tomak, presiza iha forsa neʼebé boot.

“MAI BESIK HAʼU, . . . HAʼU SEI FÓ KMAAN BA IMI”

Jesus nia oin hatudu katak nia laran-diʼak no neʼe book ema neʼebé “serbisu makaʼas no lori naha todan” atu hakbesik nia. (Mateus 11:28-30) Tanba Jesus laran-diʼak, ema bele fiar katak nia sei fó kmaan ba sira neʼebé hakarak aprende husi nia. Labarik kiʼik sira mós hakarak hakbesik ba Jesus, no Bíblia hatete: “Nia hakoʼak labarik sira-neʼe.”—Marcos 10:13-16.

 Maski Jesus hetan susar barak antes nia mate, maibé nia rasik laʼós ema neʼebé sempre hatudu oin-triste. Ezemplu ida mak nia lori ksolok iha festa kazamentu ida iha Kaná hodi troka bee sai fali tua-uvas. (João 2:1-11) Nia mós hanorin lisaun importante balu tan iha festa sira seluk.—Mateus 9:9-13; João 12:1-8.

Liután neʼe, Jesus mós haklaken iha dalan neʼebé book ema atu hein ba esperansa hodi moris ba nafatin. (João 11:25, 26; 17:3) Bainhira dixípulu naʼin-70 hatoʼo sira-nia esperiénsia kona-ba haklaken, Jesus sai “haksolok tebetebes” no nia dehan: “Haksolok tanba imi-nia naran hakerek tiha ona iha lalehan.”—Lucas 10:20, 21.

“MAIBÉ IMI LABELE SAI HANESAN NEʼE”

Ulun-naʼin relijiaun sira iha Jesus nia tempu buka dalan atu dada atensaun ba sira-nia an katak sira mak importante liu. (Números [Bilangan] 15:38-40; Mateus 23:5-7) Jesus la hanesan ho sira, nia haruka ninia dixípulu sira atu la “domina” ema seluk. (Lucas 22:25, 26) Tuir loloos, Jesus fó avizu: “Matan-moris bá, tanba eskriba sira laʼo bá-mai ho unuk neʼebé naruk no hakarak ema kumprimenta sira iha merkadu.”—Marcos 12:38.

Bainhira Jesus halibur hamutuk ho ema-lubun, dala ruma ema la koñese nia. (João 7:10, 11) Ema mós la hatene Jesus kuandu nia hamutuk ho ninia apóstolu sira. Tan neʼe, bainhira Judas atu entrega Jesus ba inimigu sira, nia presiza reʼi Jesus nuʼudar sinál ida, katak ida-neʼe mak Jesus.—Marcos 14:44, 45.

Informasaun sira-neʼe hatudu katak Jesus nia oin no isin-lolon la hanesan duni ho buat neʼebé ema barak pinta iha dezeñu. Loloos, buat neʼebé importante liu mak ita-nia hanoin kona-ba Jesus, laʼós kona-ba ninia oin no isin-lolon.

“LAKLEUR TAN MUNDU SEI LA HAREE HAʼU”

Loron ida antes Jesus mate, nia koʼalia liafuan sira-neʼe. (João 14:19) Jesus “fó nia moris hodi sosa fali ema barak”. (Mateus 20:28) No iha loron terseiru, Maromak halo nia moris-hiʼas ho “isin espíritu nian” no “fó lisensa ba nia atu mosu” ba ninia dixípulu balu. (1 Pedro 3:18; Apóstolu 10:40) Entaun, bainhira Jesus mosu ba ninia dixípulu sira, ninia oin no isin-lolon haree hanesan saida? Karik Jesus la hanesan uluk ona, tanba ninia dixípulu sira mós la rekoñese kedas nia. Bainhira Maria Madalena haree Jesus, nia hanoin katak Jesus mak ema neʼebé tau matan ba jardín. No dixípulu naʼin-rua neʼebé laʼo hela ba Emaus hanoin katak Jesus mak ema estranjeiru ida.—Lucas 24:13-18; João 20:1, 14, 15.

Entaun, ohin loron, Jesus haree hanesan saida? Tinan 60 depois Jesus mate, apóstolu João haree vizaun sira kona-ba Jesus. Iha vizaun sira-neʼe, nia la haree Jesus neʼebé mate. Maibé nia haree Jesus nuʼudar “Liurai liurai sira-nian no Naʼi naʼi sira-nian”. Jesus mak Liurai husi Maromak nia Ukun neʼebé lakleur tan sei halakon Maromak nia inimigu sira, katak Diabu no ema neʼebé aat, maibé ema diʼak sei hetan bensaun ba nafatin liuhusi Liurai neʼe.—Apokalipse 19:16; 21:3, 4.