Skip to content

Skip to table of contents

 BANATI-TUIR SIRA-NIA FIAR | SARA

Sara, “Inan ba liurai sira”

Sara, “Inan ba liurai sira”

LORO-MATAN besik atu monu. Sara halo hotu ona ninia serbisu. Nia haree ninia atan sira serbisu hela ho badinas no kontente. Nia hamriik no hateke ba rai-luan iha ninia oin. Imajina toʼok, Sara kumu daudaun ninia liman-fuan, karik tanba nia suku tenda ba oras barak. Tenda neʼe halo husi bibi-fulun, no sai bosan tanba uza ona ba tempu kleur. Sara hanoin filafali ninia moris nuʼudar ema laʼo-rai. Maski rai-nakaras ona, maibé ninia laʼen Abraão * seidauk fila. Sara hateke ba rai-luan hodi hein ba Abraão. Tuirmai, nia haree Abraão laʼo daudauk mai, neʼe halo nia oin-midar.

Tinan sanulu liu ona husi tempu neʼebé Abraão ho ninia família hakat liu mota Eufrates no tama ba rai-Kanaán. Maromak Jeová promete ba Abraão katak nasaun ida sei mai liuhusi Abraão nia jerasaun, no Sara hatene kona-ba neʼe. Tan neʼe, Sara apoia Abraão nia desizaun atu halo viajen dook ba rai neʼebé sira seidauk koñese. Maibé, Sara mós hola parte iha Maromak nia hakarak neʼe ka lae? Karik Sara hanoin: ‘Haʼu la iha oan no haʼu tinan 75 ona. Oinsá mak Jeová nia promesa bele sai loos?’ Ita bele imajina katak Sara hanoin barak kona-ba ida-neʼe.

Dala ruma, ita mós hanoin bainhira mak Maromak nia promesa sei sai loos. Ita hotu sente susar atu hatudu pasiénsia, liuliu kuandu ita hein ba ita-nia esperansa atu sai loos. Entaun, saida mak ita bele aprende husi Sara nia fiar?

“JEOVÁ LA HUSIK HAʼU ATU IHA OAN”

Abraão ho ninia família foin fila husi rai-Ejitu. (Gênesis [Kejadian] 13:1-4) Sira harii tenda iha área foho, parte leste husi sidade Betel (ema Kanaán hanaran fatin neʼe Luz). Husi foho neʼe, Sara bele haree rai neʼebé Maromak promete ona. Nia haree ema Kanaán nia knua barak, no iha mós dalan balu atu bá rai seluk. Maibé, knua hotu neʼe la hanesan duni ho sidade Ur. Sara boot iha sidade Ur, neʼebé dook tebes maizumenus kilómetru 1.900. Sara husik ninia família no ninia moris diʼak iha Ur. Iha sidade Ur iha merkadu barak, no nia mós iha uma rasik neʼebé kapás no kompletu ho torneira! Maski nuneʼe, Sara fiar metin ba Maromak no la sente triste kona-ba buat neʼebé nia husik ona.

Liutiha maizumenus tinan 2.000, apóstolu Paulo hakerek kona-ba Sara no Abraão nia fiar, hodi dehan: “Se sira hanoin beibeik kona-ba fatin neʼebé sira husik, sira bele iha oportunidade atu fila fali.” (Ebreu 11:8, 11, 15) Sara no Abraão la hanoin barak kona-ba buat neʼebé sira husik ona. Se sira hanoin beibeik kona-ba sira-nia moris uluk nian, karik sira deside atu fila fali ba Ur. Maibé se nuneʼe, sira la bele hetan bensaun espesiál husi Maromak Jeová, no Bíblia mós sei la  temi sira-nia naran. Maibé sira-nia ezemplu furak neʼe book duni ema rihun ba rihun nia laran toʼo ohin loron.

Sara la hateke ba kotuk, maibé hateke ba oin. Tan neʼe, nia kontinua apoia ninia laʼen, no kontente atu moris nuʼudar ema laʼo-rai. Neʼe katak sira presiza sobu tenda, lori sira-nia sasán no animál hotu ba fatin foun, no depois harii fali tenda. Laʼós neʼe deʼit, Sara presiza tahan hasoru susar seluk. Maski Jeová fó sai ninia promesa dala ida tan ba Abraão, maibé nia la hatete buat ida kona-ba Sara.​—Gênesis (Kejadian) 13:14-17; 15:5-7.

Iha loron ida, Sara hatete ba Abraão: “Jeová la husik haʼu atu iha oan.” Tuirmai, Sara koʼalia sai ninia planu. Nia husu Abraão atu halo relasaun ho ninia atan-feto Agar atu Abraão bele iha oan. Imajina toʼok Sara nia sentimentu bainhira nia husu ninia laʼen atu halo ida-neʼe. Karik ohin loron feen sira la husu sira-nia laʼen atu halo buat hanesan neʼe, maibé iha tempu antigu, dala ruma mane sira iha feen-kiʼik hodi bele iha oan no simu família nia liman-rohan. * Karik Sara hanoin katak hodi halo nuneʼe mak Maromak nia hakarak bele sai loos, no Abraão bele iha bei-oan sira neʼebé ikusmai sai nasaun ida. Sara hatudu katak nia la hanoin an deʼit. Entaun, Abraão halo saida? Nia “rona buat neʼebé [Sara] hatete”.​—Gênesis (Kejadian) 16:1-3.

Entaun, Jeová mak book Sara atu fó ninia atan-feto ba Abraão ka lae? Lae. Sara hanoin katak Maromak mak hanetik nia atu la bele iha oan no Maromak sei la hadiʼa ninia situasaun susar neʼe. Tuir loloos, Sara nia planu sei lori susar ba ninia an rasik. Ohin loron, ema barak buka deʼit sira rasik nia hakarak, maibé Sara nia ezemplu neʼebé la hanoin an deʼit kona loos ita-nia laran, loos ka lae? Se ita mós prontu atu buka uluk Maromak nia hakarak duké buka ita rasik nian, ita banati-tuir Sara nia fiar.

“Ó HAMNASA DUNI”

Lakleur, Agar sai isin-rua. Karik neʼe halo Agar hanoin katak nia mak importante liu fali Sara, tan neʼe nia komesa hakribi ninia naʼi. Neʼe halo Sara sente laran-tun tebes! Bíblia la fó sai oinsá, maibé ho Maromak nia apoiu no Abraão nia lisensa, Sara fó dixiplina ba Agar. Ikusmai, Agar tuur-ahi oan-mane ida, naran Ismael. (Gênesis [Kejadian] 16:4-9, 16) Tinan balu liu tiha, Abraão simu fali lia-menon husi Jeová neʼebé furak tebes. Iha tempu neʼebá, Abraão tinan 99 no Sara tinan 89.

 Dala ida tan, Jeová hatete ba ninia belun Abraão katak Nia sei halo Abraão nia bei-oan sira sai barak tebes. Maromak mós troka Abraão nia naran. Toʼo tempu neʼebá, ninia naran mak Abram. Maibé Jeová hanaran fali nia Abraão, neʼebé signifika katak “Aman ba ema barak”. No tuirmai, Jeová koʼalia kona-ba Sara ba dala primeiru. Antes neʼe ninia naran mak Sarai, neʼebé signifika “Diskute malu”, maibé Jeová hanaran fali nia Sara. Entaun naran Sara signifika saida? “Inan ba liurai sira”! Jeová esplika tansá mak nia hili naran Sara, hodi dehan: “Haʼu sei haraik bensaun ba nia no liuhusi nia mak ó sei iha oan-mane ida; haʼu sei haraik bensaun ba nia no nia sei sai nuʼudar inan ba nasaun barak no ba liurai sira.”​—Gênesis (Kejadian) 17:5, 15, 16.

Jeová nia promesa ba Abraão atu iha bei-oan ida neʼebé sei lori bensaun ba nasaun hotu, sei sai loos liuhusi Sara nia oan-mane! Maromak hanaran oan-mane neʼe Isaac, neʼebé signifika “Hamnasa”. Bainhira Abraão rona kona-ba Jeová nia hakarak atu haraik bensaun ba Sara no halo nia koʼus ninia oan rasik, nia “hakneʼak ho oin ba rai no hahú hamnasa”. (Gênesis [Kejadian] 17:17) Abraão sente hakfodak no kontente tebes. (Roma 4:19, 20) Maibé oinsá ho Sara?

Lakleur, mane oin-foun naʼin-tolu vizita Abraão nia tenda. Maski rai manas loos, maibé Abraão no Sara neʼebé idade ona hakaʼas an atu simu sira ho didiʼak. Abraão hatete ba Sara: “Lalais! Foti trigu uut neʼebé diʼak . . . , deʼut ida-neʼe, no halo paun balu.” Iha tempu neʼebá, uma-naʼin tenke halo preparasaun oioin atu simu bainaka. Abraão la husik ninia feen atu halo serbisu mesak. Nia hili karau-oan ida atu oho, no prepara hahán no hemu. (Gênesis [Kejadian] 18:1-8) Maibé afinál, “mane” naʼin-tolu neʼe mak Jeová nia anju sira! Karik apóstolu Paulo hanoin kona-ba akontesimentu neʼe bainhira nia hakerek: “Keta haluha atu hatudu laran-diʼak, tanba liuhusi neʼe mak ema balu simu anju sira, maski sira rasik la hatene.” (Ebreu 13:2) Hodi banati-tuir Abraão no Sara nia ezemplu, Ita mós bele hatudu laran-diʼak no laran-luak ba ema seluk ka lae?

Sara sempre hatudu laran-luak ba ema seluk

Sara iha ninia tenda laran bainhira anju ida repete fali Maromak nia promesa ba Abraão katak Sara sei iha oan-mane ida. Sara rona buat neʼebé sira koʼalia no nia sente neʼe komik loos tanba nia idade boot ona. Tan neʼe nia hamnasa iha laran, hodi hatete ba ninia an: “Agora haʼu idade boot ona no haʼu-nia naʼi mós katuas ona, haʼu sei hetan duni ksolok neʼe ka lae?” Maibé anju neʼe korrije nia, hodi dehan: “Iha buat ruma neʼebé Jeová labele halo ka?” Sara taʼuk no nega hodi dehan: “Haʼu la hamnasa ida!” Anju neʼe hatán: “Lae! Ó hamnasa duni.”—Gênesis (Kejadian) 18:9-15.

Karik Ita hanoin katak Sara hamnasa tanba nia la iha fiar. Maibé neʼe laloos. Bíblia hatete: “Liuhusi fiar mak Sara mós sai isin-rua, maski ninia tinan liu ona, tanba nia hatene katak ida neʼebé fó promesa neʼe mak laran-metin.” (Ebreu 11:11) Sara koñese didiʼak Maromak Jeová. Nia hatene katak Jeová sei kumpre Ninia promesa hotu. Ita hotu presiza iha fiar hanesan neʼe, loos ka lae? Tan neʼe, ita presiza koñese didiʼak Maromak. Se ita halo nuneʼe, ita bele komprende katak Sara iha razaun neʼebé loos atu fiar ba Maromak. Tanba Jeová mak Maromak neʼebé laran-metin, no sempre kumpre ninia promesa, maski dala ruma nia uza dalan neʼebé halo ita hakfodak ka hamnasa!

“RONA NIA BÁ”

Jeová haraik bensaun ba Sara tanba nia fiar-metin

Ikusmai, bainhira Sara tinan 90, nia tuur-ahi oan-mane ida. Iha tempu neʼebá, ninia laʼen doben tinan 100 ona! Hodi halo tuir Maromak nia liafuan, Abraão hanaran bebé neʼe Isaac, neʼebé signifika “Hamnasa”. Imajina toʼok, maski Sara kole tanba foin partu, maibé nia hatudu oin-midar,  hodi dehan: “Maromak halo ona haʼu hamnasa; no ema hotu neʼebé rona ida-neʼe sei haksolok ho haʼu.” (Gênesis [Kejadian] 21:6) Maromak nia milagre furak neʼe lori haksolok ba Sara toʼo nia mate. Maibé, atu haboot oan mak responsabilidade neʼebé boot.

Bainhira Isaac tinan lima, Abraão ho ninia família halo festa boot ba Isaac kuandu nia haketak susu. Iha tempu neʼebá, Sara haree katak Agar nia oan-mane, Ismael, neʼebé tinan 19 sempre goza Isaac neʼebé sei kiʼik. Tuir loloos, Ismael nia dalan atu goza Isaac laʼós halimar deʼit. Kona-ba neʼe, apóstolu Paulo hakerek katak Ismael fó-terus ba Isaac. Sara la kontente ho ida-neʼe tanba neʼe bele lori perigu ba nia oan-mane nia moris. Sara hatene katak liuhusi Isaac mak Jeová nia promesa sei sai loos. Tan neʼe, ho aten-brani, Sara husu Abraão atu duni sai Agar no Ismael.​—Gênesis (Kejadian) 21:8-10; Galásia 4:22, 23, 29.

Abraão sente oinsá? Bíblia hatete: “Buat neʼebé Sara dehan kona-ba Abraão nia oan-mane neʼe halo nia sente laran-susar tebes.” Abraão hadomi Ismael, tan neʼe nia la komprende katak Ismael nia hahalok aat sei lori problema boot ba família. Maibé Jeová haree didiʼak situasaun neʼe no korrije Abraão. Bíblia konta: “Maromak dehan ba Abraão: ‘Keta sai laran-susar ho buat neʼebé Sara hatete ba ó kona-ba ó-nia oan-mane neʼe no ó-nia atan-feto. Rona nia bá, tanba bei-oan neʼebé promete ona ba ó sei mai liuhusi Isaac.’” Jeová mós fó-hatene ba Abraão katak Nia sei tau matan ba Agar no Ismael. Entaun, Abraão halo tuir Maromak.​—Gênesis (Kejadian) 21:11-14.

Sara mak feen neʼebé diʼak tebes. Nia la koʼalia deʼit buat neʼebé Abraão hakarak rona. Bainhira Sara haree problema ruma neʼebé bele afeta ninia família no sira-nia futuru, nia koʼalia nakloke ba ninia laʼen ho respeitu. Tempu barak liutiha, apóstolu Pedro, neʼebé mós kaben-naʼin, temi kona-ba Sara nuʼudar ezemplu diʼak ba feen sira tanba nia hatudu respeitu neʼebé kleʼan ba ninia laʼen. (1 Korinto 9:5; 1 Pedro 3:5, 6) Tuir loloos, se Sara la fó sai problema entre Ismael no Isaac, neʼe katak Sara la respeitu Abraão tanba problema neʼe bele lori susar boot ba Abraão no família tomak. Sara hatete buat neʼebé nia presiza fó sai.

Feen barak hafolin Sara nia ezemplu, no sira aprende atu koʼalia nakloke ho respeitu ba sira-nia laʼen. Dala ruma feen balu hakarak Jeová koʼalia kedas ba sira-nia laʼen hodi bele hadiʼa problema ruma hanesan uluk nia koʼalia ba Abraão. Maski nuneʼe, sira aprende buat barak husi Sara nia fiar, domin no pasiénsia.

Jeová hanaran feto diʼak neʼe “Inan ba liurai sira”, maibé Sara la hein katak ema seluk sei trata nia hanesan liurai-feto

Jeová hanaran feto diʼak neʼe “Inan ba liurai sira”, maibé Sara la hein katak ema seluk sei trata nia hanesan liurai-feto. Ikusmai, bainhira Sara mate ho tinan 127, Abraão “sai triste no tanis”. * (Gênesis [Kejadian] 23:1, 2) Abraão hanoin tebes ninia feen Sara. Maromak Jeová mós hanoin Sara, no hakarak halo nia moris filafali iha mundu paraízu. Sin, Sara sei moris haksolok ba nafatin hamutuk ho ema hotu neʼebé banati-tuir ninia fiar.—João 5:28, 29.

^ par. 3 Foufoun, sira-nia naran mak Abram no Sarai, maibé ikusmai Maromak hanaran sira Abraão no Sara. Iha informasaun neʼe, ami uza naran Abraão no Sara tanba ema barak koñese sira ho naran neʼe.

^ par. 10 Iha tempu antigu, Jeová husik mane sira atu iha feen balu. Maibé ikusmai, Nia haruka Jesus atu fó sai Ninia hakarak kona-ba arranju kaben nian, neʼebé Nia fó sai ona iha jardín Eden, katak mane ida sei kaben ho feto ida.​—Gênesis (Kejadian) 2:24; Mateus 19:3-9.

^ par. 25 Husi feto hotu, só Sara deʼit mak Bíblia fó sai ninia idade bainhira nia mate.