Skip to content

Skip to table of contents

 BANATI-TUIR SIRA-NIA FIAR | DAVID

“Funu neʼe mak Jeová nian”

“Funu neʼe mak Jeová nian”

NUʼUDAR David laʼo ba oin toʼo funu-fatin, nia haree soldadu barak halai-sees daudauk ho taʼuk tebes. Tanbasá? David rona soldadu sira barak temi beibeik mane ida nia naran. No husi dook, David haree mane neʼebé ain-aas hamriik hela iha foho-leet. Karik neʼe mak primeiravés ba David atu haree ema neʼebé ain-aas no isin-boot hanesan neʼe.

Neʼe mak Golias! David hatene kedas tansá mak soldadu sira taʼuk. Karik, ninia todan mak hanesan mane naʼin-rua nia todan. Nia mós uza hatais funu nian neʼebé boot no todan tebes, no nia mak asuwaʼin ida neʼebé manán ona funu barak. Agora, Golias hakarak funu hasoru ema Izraél. Ema hotu bele rona ninia lian boot neʼebé sadik tropa Izraél no Liurai Saul. Golias haruka tropa Izraél atu hili mane ida hodi halo funu hasoru nia. Neʼe mak dalan ida atu deside tropa ida-neʼebé mak manán!—1 Samuel 17:4-10.

Tropa Izraél sai taʼuk tebes, nuneʼe mós ho Liurai Saul. David rona katak ida-neʼe akontese durante fulan ida liu! Tropa Filístia ho tropa Izraél hateke malu deʼit, no loron ba loron Golias sadik tropa Izraél. Neʼe halo David sente estrese. Liurai Izraél no tropa hotu, inklui mós David nia maun naʼin-tolu, nakdedar tanba taʼuk, no neʼe halo David sente moe! Ba David, Golias la hamoe deʼit tropa Izraél, maibé nia mós hatún Izraél nia Maromak, Jeová! Maibé joven David bele halo saida? Saida mak ita neʼebé moris ohin loron bele aprende husi David nia fiar?—1 Samuel 17:11-14.

“NIA MAK IDA NEʼEBÉ HAʼU HILI!”

Agora mai ita hanoin kona-ba buat neʼebé akontese ona fulan barak antes neʼe. Loron ida, iha oras rai-nakaras, David hein ninia aman nia bibi-malae iha rai-luan neʼebé besik sidade Belein. David mak mane joven ida neʼebé iha saúde diʼak, bonitu ho matan neʼebé furak. Nia gosta toka arpa. Nia mós gosta haree buat oioin neʼebé Maromak kria, no nuʼudar nia treinu atu toka arpa, ninia matenek kona-ba múzika neʼe aumenta ba beibeik. Maibé iha kalan neʼebá, ninia aman haruka ema atu bolu nia fila kedas ba uma.—1 Samuel 16:12.

Fila tiha ba uma, David haree ninia aman Jesse koʼalia hela ho katuas ida neʼebé idade boot tebes. Nia mak profeta Samuel. Jeová haruka nia atu fui mina ba Jesse nia oan-mane ida neʼebé sei sai nuʼudar liurai neʼebé ukun Izraél! Samuel hasoru ona David nia maun naʼin-hitu, maibé Jeová hatete katak Nia la hili ema ida husi sira. Maibé bainhira David toʼo, Jeová hatete ba Samuel: “Fui mina ba nia, tanba nia mak ida neʼebé haʼu hili!” Tan neʼe, Samuel foti dikur ida neʼebé nakonu ho mina espesiál, no fui ida-neʼe ba David nia ulun iha ninia maun sira-nia oin. Hahú husi tempu neʼebá, David nia moris troka duni. Bíblia dehan: “Jeová nia espíritu komesa fó kbiit ba David husi tempu neʼe ba oin.”—1 Samuel 16:1, 5-11, 13.

Ho haraik-an, David fó sai katak Jeová mak ajuda nia atu oho animál fuik sira

Se nuneʼe, David komesa sai ema neʼebé foti an ka lae? Lae, nia kontente atu halo tuir Jeová nia espíritu no hein ba tempu neʼebé loos atu simu  knaar boot nuʼudar liurai. Durante nia hein ba tempu neʼe, nia kontinua halo ninia serbisu simples nuʼudar bibi-atan ho badinas no aten-brani. Porezemplu, David nia aman nia bibi sira hasoru perigu boot ba dala rua ona, dala ida mak hetan ataka husi leaun, no dala ida tan husi ursu. Iha situasaun rua neʼe, David ho brani salva bibi sira hodi duni tuir no oho animál fuik sira-neʼe maski nia mesak deʼit!—1 Samuel 17:34-36; Isaías (Yesaya) 31:4.

Ikusmai, Liurai Saul rona kona-ba David, tan neʼe nia haruka ema atu bá bolu David. Iha tempu neʼebá, maski Saul nafatin asuwaʼin neʼebé forsa, maibé Jeová la simu tan nia tanba nia la halo tuir. Tan neʼe, Jeová hasai ona Ninia espíritu husi Saul, ikusmai buat aat deʼit mak domina Saul nia hanoin toʼo halo nia sai hirus makaʼas, halo violénsia, no la tau fiar ba ema seluk. Bainhira Saul sai neon-susar, buat ida neʼebé bele halo nia kalma mak múzika. Saul nia atan sira rona katak David mak joven neʼebé matenek atu toka múzika no mós aten-brani nuʼudar asuwaʼin ida. Tan neʼe, Saul bolu David atu toka múzika ba nia no mós atu lori ninia surik sira.—1 Samuel 15:26-29; 16:14-23.

Joven sira ohin loron bele aprende buat barak husi David nia ezemplu kona-ba fiar. David uza ninia tempu atu hakbesik liután ba Maromak Jeová. Nia mós aumenta liután ninia matenek hodi ajuda nia sai prontu atu hetan serbisu. Importante liu mak David halo tuir Jeová nia espíritu. Ita mós bele halo tuir David nia ezemplu furak sira-neʼe!—Eclesiastes (Pengkhotbah) 12:1.

“KETA HUSIK EMA IDA LAKON ATEN-BRANI TANBA NIA”

Nuʼudar David serbí Liurai Saul, nia mós fila ba uma atu hein bibi, dala ruma ba tempu kleur. Iha tempu hanesan neʼe mak Jesse haruka David bá Foho-Leet Elá atu hasoru ninia maun naʼin-tolu, neʼebé serbisu nuʼudar Saul nia tropa. Tan neʼe, David bá no lori sasán oioin neʼebé ninia maun sira presiza. Toʼo tiha iha neʼebá, nia hakfodak ho buat neʼebé nia haree. Tropa Izraél iha foho-lolon sorin ida, no tropa Filístia iha sorin seluk, sira hateke malu deʼit, no mane ida sadik hela tropa Izraél.—1 Samuel 17:1-3, 15-19.

David la tahan ona ho situasaun neʼe. Oinsá mak Maromak Jeová nia tropa sira halai ho taʼuk tan deʼit ema ida neʼebé adora maromak falsu? Tuir David nia haree, Golias sadik Jeová, Maromak neʼebé moris. Tan neʼe, David hahú koʼalia ho laran-manas kona-ba atu oho Golias. Lakleur, David nia maun-boot, naran Eliab, mós rona kona-ba neʼe, no sai siʼak ba David hodi duun katak nia tun mai atu haree deʼit funu. Maibé David dehan: “Sala saida mak haʼu halo? Haʼu husu deʼit pergunta sá!” David ho fiar an kontinua fó sai ninia hanoin, no ikusmai ema ruma hatoʼo buat neʼebé akontese ba Liurai Saul. Tan neʼe, Saul bolu David atu bá hasoru nia.—1 Samuel 17:23-31.

David hatete ba Liurai Saul: “Keta husik ema ida lakon aten-brani tanba nia.” Tuir loloos, Saul no ninia soldadu hotu lakon ona aten-brani tanba taʼuk ba Golias. Karik sira sai taʼuk tanba sira kompara sira-nia an ho Golias neʼebé ain-aas no isin-boot. Karik se sira hamriik iha Golias nia sorin,  sira-nia ulun toʼo deʼit Golias nia knotak. Sira hanoin katak fasil ba Golias atu manán. Maibé David la hanoin hanesan neʼe. Tan neʼe, nia hatete ba Liurai Saul katak nia rasik mak sei bá halo funu hasoru Golias.—1 Samuel 17:32.

Saul la gosta David nia ideia. Nia dehan: “Ó la iha kbiit atu funu hasoru mane Filístia neʼe, tanba ó labarik deʼit, no nia sai nuʼudar soldadu husi joven kedas.” Entaun, David mak labarik duni ka lae? Lae, maibé ninia tinan seidauk toʼo atu sai soldadu ida, no mós karik ninia oin haree nurak hela. Maibé iha tempu neʼebá, ema koñese ona David nuʼudar asuwaʼin ida neʼebé aten-brani, karik nia besik ona tinan 20.—1 Samuel 16:18; 17:33.

David esplika ba Saul hodi konta ninia esperiénsia kona-ba luta hasoru leaun no ursu. David gaba an ka lae? Lae. Nia hatene tanbasá mak nia konsege oho animál fuik sira-neʼe. Nia dehan: “Jeová, ida neʼebé salva ona haʼu husi leaun no ursu, nia mós sei salva haʼu husi ema Filístia neʼe nia liman.” Ikusmai, Saul hatete ba David: “Bá, no Jeová sei hamutuk ho ó.”—1 Samuel 17:37.

Ita mós hakarak iha fiar hanesan David ka lae? David nia fiar neʼe laʼós mehi deʼit. David iha fiar neʼebé metin tanba nia iha esperiénsia rasik no hatene didiʼak Jeová nuʼudar Maromak neʼebé proteje Ninia atan sira no kumpre Ninia promesa sira. Se ita mós hakarak iha fiar hanesan neʼe, ita presiza kontinua aprende kona-ba Maromak Jeová. Hodi moris tuir buat neʼebé ita aprende, ita sei hetan rezultadu diʼak, no ita-nia fiar mós sei sai metin liután.—Ebreu 11:1.

“JEOVÁ SEI ENTREGA Ó BA HAʼU-NIA LIMAN”

Foufoun, Saul tau ninia ekipamentu funu nian hotu ba David. Neʼe inklui mós faru neʼebé halo husi riti ho modelu hanesan ikan nia kikit. David koko atu laʼo uitoan, maibé nia sente neʼe todan no book an ladiʼak. David laʼós soldadu, no nia la toman ho ekipamentu sira-neʼe. Ekipamentu neʼe boot tebes tanba Saul mak mane neʼebé ain-aas liu iha Izraél tomak! (1 Samuel 9:2). Tan neʼe, nia hasai buat sira-neʼe hotu no foti fali buat neʼebé nia toman ona atu uza. Neʼe mak ninia unuk ho sasán sira neʼebé nia sempre uza atu proteje ninia bibi sira.—1 Samuel 17:38-40.

David lori ninia ai-tonka bibi-atan nian, pasta ida neʼebé nia bele tara iha ninia kabaas, no mós ninia tali-baku. Iha tempu neʼebá, tali-baku mak armas oin ida. Tuir loloos, neʼe mak tali neʼebé halo husi animál-kulit, no iha tali neʼe nia klaran iha parte luan neʼebé bele tau fatuk. Atu uza tali-baku neʼe, ema sei kaer hamutuk tali rohan rua neʼe no dulas makaʼas iha ulun leten, ikusmai husik tiha tali ida hodi fatuk bele katiik toʼo fatin neʼebé nia hakarak. Iha tempu antigu, dala ruma soldadu sira forma grupu neʼebé uza armas hanesan neʼe.

Entaun, David laʼo tun lalais ba tropa Filístia nia oin. Bainhira nia toʼo iha mota neʼebé maran ona, nia hili fatuk kiʼik lima neʼebé kabeer. Ita bele imajina katak nuʼudar nia halo ida-neʼe, nia harohan ba Maromak Jeová. Tuirmai, duké laʼo neineik, nia halai lalais bá hasoru Golias!

Bainhira Golias haree David, nia sente oinsá? Tuir Bíblia, “nia hatudu oin-buis hodi hatún David tanba nia mak joven deʼit”. Ho lian boot, Golias dehan: “Haʼu neʼe asu ka hodi ó mai kontra haʼu ho ai-sanak?” Golias haree David nia ai-tonka maibé karik nia la haree tali-baku neʼebé David kaer. Tuirmai, Golias fó-malisan ba David hodi ema Filístia nia maromak falsu sira-nia naran, no jura katak nia sei fó David nia mate-isin ba manu no animál fuik sira atu han.—1 Samuel 17:41-44.

Joven David nia resposta ba Golias hatudu sai ninia fiar neʼebé metin tebes! Ho lian boot, David hatán ba Golias: “Ó mai atu kontra haʼu ho surik no diman rua, maibé haʼu mai hasoru ó hodi Jeová nia naran, ukun-naʼin ba tropa lalehan nian, nia mak Maromak ba Izraél nia tropa sira neʼebé ó sadik.” David hatene katak ema nia forsa ka armas oioin la importante ida. Golias la respeitu Maromak Jeová, no Jeová sei fó kastigu ba nia. Ba David, “funu neʼe mak Jeová nian”.—1 Samuel 17:45-47.

David hatene katak Golias mak ema ain-aas ho isin-boot, no ninia surik ho diman mós boot  tebetebes. Maibé la hanesan ho Liurai Saul no ninia soldadu sira, David la taʼuk. Neʼe tanba nia la kompara Golias ho ninia an rasik, maibé nia kompara Golias ho Maromak Jeová. Maski Golias ain-aas liu toʼo metru 2,9 maibé ba Maromak neʼebé Boot Liu Hotu, Golias mak ema deʼit, hanesan nehek ida neʼebé la susar atu halakon kedas!

David halai hakbesik ba ninia inimigu, hatama ninia liman ba ninia pasta laran no foti fatuk ida. Nia tau fatuk neʼe iha ninia tali-baku, no komesa dulas ida-neʼe. Golias ho ninia soldadu ida neʼebé kaer eskudu boot mós hakat ba oin hodi hakbesik ba David. Maibé tanba Golias ain-aas demais, soldadu neʼe la bele hiʼit eskudu atu proteje Golias nia oin no ulun. Tan neʼe, David koko atu ataka Golias nia reen-toos.—1 Samuel 17:41.

David hatene katak ema neʼebé ain-aas no isin-boot mak kiʼik deʼit se kompara ho Maromak Jeová

Ikusmai, David tuda fatuk. Karik soldadu sira hotu nonook no hateke deʼit ba fatuk neʼe. Ita fiar katak Jeová mak halo fatuk neʼe kona loos ba fatin neʼebé David hakarak. Fatuk neʼe kona no belit iha Golias nia reen-toos no nia monu ho oin ba rai! Karik soldadu ida neʼebé kaer Golias nia eskudu halai-sees kedas. David hakbesik ba Golias, losu sai Golias nia surik, no tesi ninia ulun.—1 Samuel 17:48-51.

Ho ida-neʼe, Saul ho ninia soldadu sira sai aten-brani fali. Sira hotu hakilar hamutuk no duni tuir ema Filístia sira. Ikusmai, liafuan neʼebé David hatete ona ba Golias sai loos. Nia hatete: “Jeová . . . sei entrega imi hotu ba ami-nia liman.”—1 Samuel 17:47, 52, 53.

Ohin loron, Maromak nia atan sira la hola parte iha funu hanesan tempu antigu. (Mateus 26:52) Maibé, ita presiza banati-tuir David nia fiar. Hanesan ho David, ita presiza tau fiar ba Jeová nuʼudar Maromak neʼebé moris, sin, Maromak loos mesak ida deʼit. Dala ruma ita sente katak ita-nia problema mak boot demais, maibé tuir loloos, problema sira-neʼe mak kiʼik deʼit se kompara ho Maromak Jeová nia forsa neʼebé la iha rohan. Se ita serbí Jeová no tau fiar ba nia hanesan David, ita sei la sente taʼuk maski hasoru susar no problema naran deʼit. Loos duni, la iha buat ida mak boot liu fali Jeová nia kbiit!