Skip to content

Skip to table of contents

Importante tebes atu koʼalia nakloke ba malu

Bainhira ema neʼebé ita hadomi moras todan

Bainhira ema neʼebé ita hadomi moras todan

DIANA hakfodak tebes bainhira doutór hatete katak ninia laʼen João neʼebé tinan 54 iha tumór boot iha ninia kakutak no mós katak João iha fulan balu tan atu moris. * Diana hatete: “Haʼu la fiar buat neʼebé doutór dehan. Ba semana barak haʼu bilán deʼit. Haʼu la prontu atu hasoru susar hanesan neʼe.”

Moras todan bele kona ema derrepente deʼit. Ema barak deside atu tau matan ba membru família ida neʼebé moras todan. Maibé, atu halo ida-neʼe mak susar loos. Saida mak Ita bele halo hodi fó kmaan no tau matan ba Ita-nia família neʼebé moras todan? Oinsá mak Ita bele tahan hasoru sentimentu oioin neʼebé mosu durante tempu neʼe? No saida mak akontese bainhira ema moras besik atu mate? Ulukliu, mai ita haree tanbasá ohin loron susar loos atu tau matan ba ema neʼebé moras todan.

PROBLEMA MODERNU

Maizumenus tinan 100 liubá, ema la moris kleur hanesan ho ohin loron maski hela iha rai riku. Bainhira ema hetan moras ka asidente, sira mate lalais. Iha tempu neʼebá, ladún iha ospitál barak, tan neʼe família rasik mak tau matan ba ema neʼebé moras no ikusmai sira mate iha uma.

Ohin loron, tanba teknolojia médiku avansadu ona, doutór sira fó tratamentu makaʼas ba ema moras hodi bele hanaruk sira-nia moris. Uluk ema neʼebé moras todan mate lalais, maibé agora sira bele moris ba tempu kleur. Maski nuneʼe, neʼe la dehan katak ikusmai doutór bele kura sira. Dala barak, pasiente sira-neʼe la bele tau matan ba sira-nia an rasik. Tau matan ba ema neʼebé moras todan mak serbisu boot no susar.

Tan neʼe ohin loron, pasiente barak neʼebé moras todan baixa ba tempu kleur toʼo mate. Maioria husi ema neʼebé moris ohin loron la toman atu haree  ka seidauk haree ema neʼebé iis kotu daudauk. Ikusmai ema taʼuk atu tau matan ba membru família neʼebé moras todan tanba la hatene sira sei hasoru situasaun hanesan saida. Saida deʼit mak bele ajuda ita atu tau matan ba ema neʼebé moras todan?

HALO PLANU NANIS

Hanesan ho Diana, ema barak sente triste tebes bainhira sira foin rona katak ema neʼebé sira hadomi moras todan no besik ona atu mate. Maski laran-susar, taʼuk no triste tebes, maibé saida mak bele ajuda Ita atu prepara an ba buat neʼebé Ita sei hasoru? Maromak nia atan ida halo orasaun hodi dehan: “Hanorin ami oinsá atu sura ami-nia loron sira atu nuneʼe ami bele hetan laran neʼebé matenek.” (Salmo [Mazmur] 90:12) Sin, halo orasaun hodi husu Maromak Jeová atu hatudu oinsá atu sura ‘Ita-nia loron sira’ ho matenek, atu nuneʼe, Ita bele uza ho didiʼak ita-nia tempu hamutuk ho ita-nia família neʼebé besik ona atu mate.

Ita presiza halo planu didiʼak. Se Ita-nia família neʼebé moras todan sei bele koʼalia, diʼak atu koʼalia nakloke kona-ba ninia hakarak hodi husu ba nia: ‘Bainhira ó la bele halo ona desizaun rasik, ó hakarak sé atu halo desizaun ba ó? Ikusmai ó hakarak baixa iha ospitál ka lae? Ó hakarak simu tratamentu hanesan saida?’ Hodi koʼalia nanis kona-ba buat hirak-neʼe bele hamenus konfuzaun no ajuda ema neʼebé tau matan atu la arrepende ho desizaun neʼebé nia presiza foti. Família neʼebé koʼalia nakloke ba malu no halo planu nanis bele tau matan didiʼak ba ema neʼebé moras todan. Bíblia dehan: “Planu sira sei la sai loos kuandu ema la koʼalia ba malu.”Provérbios (Amsal) 15:22.

OINSÁ ATU AJUDA

Buat neʼebé importante liu ba ema neʼebé tau matan mak atu fó kmaan ba ema neʼebé moras todan. Ema neʼebé moras todan no besik atu mate presiza sente katak ita hadomi nia no katak nia la mesak. Oinsá mak ita bele halo ida-neʼe? Lee no kanta ba pasiente, hili livru ka knananuk sira neʼebé hametin nia no nia mós gosta. Ema barak sente kmaan bainhira sira-nia família ida kaer sira-nia liman no koʼalia neineik ba sira.

Bainhira bainaka mai, fó-hatene ba pasiente sé mak mai. Peskiza ida dehan: “Maski pasiente ida haree hanesan toba hela no la hatene buat ida, maibé karik nia bele rona nafatin. Tan neʼe, keta koʼalia buat neʼebé ita lakohi nia rona se nia hadeer hela.”

 Se bele, halo orasaun hamutuk. Bíblia konta kona-ba tempu ida bainhira apóstolu Paulo no nia maluk sira hasoru situasaun susar no sira la hatene sira sei mate ka lae. Saida mak sira halo iha tempu neʼebá? Paulo husu nia maluk sira: “Imi mós bele ajuda hodi harohan ba ami.” (2 Korinto 1:8-11) Bainhira ita hasoru hela situasaun susar no moras todan, orasaun bele ajuda duni.

SIMU REALIDADE

Baibain ita sente laran-susar loos bainhira hanoin kona-ba ema neʼebé ita hadomi sei mate. Maromak la kria ita ema atu mate ka atu sai toman ho mate. (Roma 5:12) Tan neʼe, Maromak nia Liafuan bolu mate nuʼudar “inimigu” ida. (1 Korinto 15:26) Entaun, normál se Ita lakohi atu hanoin kona-ba tempu bainhira ema neʼebé Ita hadomi sei mate.

Maski nuneʼe, bainhira Ita ho Ita-nia família hanoin nanis kona-ba tempu bainhira ema neʼebé Ita hadomi sei mate, neʼe bele ajuda ita atu la sente taʼuk no mós atu tau atensaun ba ema moras nia presiza. Kaixa iha pájina 9 “ Semana ikus sira antes mate” esplika saida mak bele akontese bainhira ema ida besik atu mate. Karik laʼós buat hotu neʼebé hakerek iha kaixa neʼe sei akontese ka tuir orden neʼe, maibé pasiente barak mak hasoru mudansa sira-neʼe.

Depois ema neʼebé ita hadomi mate, bolu belun diʼak neʼebé promete ona atu ajuda. Família bele sente kmaan hodi hatene katak membru família neʼebé mate ona la sente tan terus no susar. Ita-nia Kriadór fó-hatene mai ita katak “ema neʼebé mate ona la hatene buat ida”.Eclesiastes (Pengkhotbah) 9:5.

SADERE BA MAROMAK NEʼEBÉ TAU MATAN BA ITA

Aprende atu simu ajuda husi ema seluk

Importante tebes ba Ita atu sadere ba Maromak durante tempu neʼebé Ita-nia família moras todan, no mós bainhira Ita triste hela tanba nia mate. Maromak bele ajuda Ita liuhusi ema seluk nia liafuan no hahalok. Diana dehan: “Haʼu aprende atu simu ajuda husi ema hotu. Tuir loloos, ami simu ajuda barak. Neʼe hanesan Jeová dehan ba ami: ‘Haʼu hamutuk ho imi no haʼu sei ajuda imi iha situasaun neʼe.’ Haʼu sei nunka haluha ida-neʼe.”

Sin, Maromak Jeová mak ida neʼebé tau matan ba ita. Nuʼudar ita-nia Kriadór, nia komprende ita-nia laran-susar no laran-triste. Nia bele no mós hakarak atu ajuda no fó laran-manas atu ita bele tahan. No Jeová mós promete katak lakleur tan nia sei halakon mate no fó moris-hiʼas ba ema millaun ba millaun neʼebé mate ona. (João 5:28, 29; Apokalipse 21:3, 4) Iha tempu neʼebá, ita hotu bele koʼalia hanesan apóstolu Paulo neʼebé dehan: “Mate, ó-nia kbiit iha neʼebé? Mate, ó-nia venenu iha neʼebé?”1 Korinto 15:55.

^ par. 2 Naran sira iha informasaun neʼe laʼós naran neʼebé loos.