Skip to content

Skip to table of contents

Oinsá mak Ita bele iha moris neʼebé diʼak liu?

Oinsá mak Ita bele iha moris neʼebé diʼak liu?

MORIS ohin loron laʼós moris neʼebé loloos tuir Maromak nia hakarak. Tuir loloos mundu tenke nakonu ho ema neʼebé hatudu respeitu ba ita-nia Kriadór nia direitu atu ukun, hetan benefísiu husi ninia matadalan, haleno Maromak nia domin no ninia hahalok furak seluk tan. Maromak hakarak ema atu moris kontente no unidade nuʼudar família, aprende buat foun, no halo mundu tomak sai paraízu.

MAROMAK PROMETE ATU HADIʼA SITUASAUN IHA MUNDU

  • “Nia sei hapara funu sira iha mundu tomak.”​Salmo 46:9.

  • “Tempu neʼebé deside tiha toʼo mai ona . . . atu halakon sira neʼebé estraga daudaun mundu.”​Apokalipse 11:18.

  • “La iha ema ida iha rai mak sei dehan: ‘Haʼu moras.’”​Isaias 33:24.

  • “Sira neʼebé haʼu hili ona sei haksolok duni ho serbisu neʼebé sira halo ho sira-nia liman.”​Isaias 65:22.

Oinsá mak profesia sira-neʼe sei sai loos? Maromak hili ona ninia Oan-Mane, Jesus, nuʼudar Liurai ba governu neʼebé iha lalehan atu ukun mundu. Bíblia bolu neʼe nuʼudar Maromak nia Ukun. (Daniel 2:44) Bíblia koʼalia kona-ba Jesus hodi dehan, ‘Maromak sei fó kadunan ba nia’, no “nia sei ukun nuʼudar Liurai”.—Lucas 1:32, 33.

Durante iha rai, Jesus halo ona milagre barak atu hatudu katak nuʼudar Ukun-Naʼin, nia sei halo ema nia moris diʼak liu fali ohin loron.

JESUS HATUDU OINSÁ NIA SEI FÓ BUAT DIʼAK BA EMA NEʼEBÉ HALO TUIR

  • Nia kura ema neʼebé moras. Neʼe hatudu katak nia sei halakon ita-nia susar hotu.​Mateus 9:35.

  • Nia halo tasi sai hakmatek. Neʼe hatudu katak nia sei proteje ita hodi kontrola natureza.​Marcos 4:36-39.

  • Nia fó-han ema rihun ba rihun. Neʼe hatudu katak nia sei fó buat neʼebé ita presiza atu moris.​Marcos 6:41-44.

  • Nia halo bee sai tua iha festa kazamentu nian. Neʼe hatudu katak nia sei ajuda ita atu bele goza moris.​João 2:7-11.

Oinsá mak ita bele hetan moris neʼebé Maromak prepara ona ba ema neʼebé hadomi nia? Bíblia dehan, iha “dalan” neʼebé “kiʼik tebes” no “lori ema ba moris, no ema uitoan deʼit mak hetan dalan neʼe”. Ita tenke buka no laʼo tuir dalan neʼe.—Mateus 7:14.

TUIR DALAN NEʼEBÉ LORI ITA BA MORIS NEʼEBÉ DIʼAK LIU

Saida mak dalan ba moris? Maromak dehan: “Haʼu, Jeová, mak imi-nia Maromak, haʼu hanorin imi kona-ba buat neʼebé diʼak liu ba imi, no dirije imi iha dalan neʼebé imi tenke laʼo bá.” (Isaias 48:17) Laʼo tuir dalan neʼe mak bele lori ita ba moris neʼebé diʼak liu.

 Jesus dehan: “Haʼu mak dalan no lia-loos no moris.” (João 14:6) Hodi tau fiar ba buat neʼebé Jesus hanorin no halo tuir ninia ezemplu neʼebé nia husik hela mai ita, sei halo ita besik liután ba Maromak no ita-nia moris sei sai diʼak liután.

Oinsá mak Ita bele hatene dalan ba moris? Ohin loron iha relijiaun barak, maibé Jesus hatete: “Laʼós ema hotu neʼebé dehan mai haʼu: ‘Naʼi, Naʼi’, sei tama ba Ukun lalehan nian, maibé ema neʼebé halo tuir haʼu-nia Aman iha lalehan nia hakarak mak sei tama ba Ukun neʼe.” (Mateus 7:21) Nia mós hatete: “Imi bele hatene sira liuhusi sira-nia hahalok.” (Mateus 7:16) Bíblia bele ajuda ita hatene relijiaun neʼebé mak halaʼo adorasaun neʼebé loos.—João 17:17.

Oinsá mak Ita bele laʼo tuir dalan ba moris? Neʼe mak hodi hatene kona-ba Ida neʼebé fó moris mai ita. Nia mak sé? Nia iha naran ka lae? Nia hanesan saida? Saida mak nia hakarak ita atu halo? *

Duké han, halimar, no tau matan família deʼit, Maromak hakarak ita atu halo liu fali ida-neʼe. Ita bele aprende kona-ba ita-nia Kriadór no sai ninia belun. Ita bele hatudu katak ita hadomi nia hodi halo tuir ninia hakarak. Jesus hatete: “Neʼe mak moris rohan-laek: Katak sira hatene didiʼak kona-ba Ita, Maromak loos mesak deʼit.”—João 17:3.

LIUHUSI BÍBLIA, MAROMAK HANORIN ‘BUAT NEʼEBÉ DIʼAK LIU BA ITA’.​—ISAIAS 48:17

FOTI HAKAT PRIMEIRU ATU TUIR DALAN NEʼE

Atu halo tuir Maromak neʼebé loos, karik ita presiza halo mudansa balu ba ita-nia moris no neʼe la fasil. Maibé se ita hili atu laʼo tuir dalan neʼe, ita-nia moris sei sai diʼak liu. Testemuña ba Jeová oferese estudu Bíblia gratuitu tuir Ita-nia tempu no fatin, atu ajuda Ita hetan resposta sira kona-ba Maromak. Ita bele kontaktu ami liuhusi ami-nia sítiu www.jw.org/tdt.