Skip to content

Skip to table of contents

Maromak hanoin Ita ka lae?

Maromak hanoin Ita ka lae?

OINSÁ MAK KRIASAUN HANORIN ITA

Hahalok hanoin ema mak “abilidade atu sente buat neʼebé ema seluk sente hodi imajina sira-nia an iha ema seluk nia situasaun”. Dr. Rick Hanson, neʼebé espesialista kona-ba saúde mentál hatete katak ema hotu moris mai ho abilidade atu hanoin ema seluk.

HANOIN TOʼOK: Tanbasá ema deʼit mak iha abilidade hanesan neʼe? Bíblia esplika katak tanba Maromak kria ema tuir ninia ilas. (Génesis 1:26) Neʼe katak ita bele haleno Maromak nia hahalok sira. Tan neʼe, bainhira ema ida hanoin no ajuda ema seluk, nia haleno ita-nia Kriadór Maromak Jeová nia hahalok furak ida, neʼe mak hanoin ema.—Provérbios 14:31.

SAIDA MAK BÍBLIA HANORIN

Maromak hanoin ita no lakohi ita terus. Iha tempu uluk, povu Izraél hetan terus barak nuʼudar atan iha rai-Ejitu. Tuirmai, sira mós laʼo iha rai-fuik maran durante tinan 40. Bíblia hatete kona-ba buat neʼebé Maromak sente: “Durante sira-nia susar hotu, nia mós sente neon-susar.” (Isaias 63:9) Maromak laʼós deʼit hatene sira-nia terus, maibé nia mós sente ida-neʼe. Nia hatete: “Haʼu hatene didiʼak kona-ba terus neʼebé sira hasoru.” (Éxodo 3:7) Maromak mós hatete: “Ema naran deʼit neʼebé book imi, neʼe hanesan sira tuu haʼu-nia matan-fuan.” (Zacarias 2:8) Bainhira ema haterus ita, Maromak mós sente terus hamutuk ho ita.

Karik ita sente la iha folin no la merese atu Maromak hanoin ita, maibé Bíblia hatete: “Maromak mak boot liu fali ita-nia laran no hatene buat hotu.” (1 João 3:19, 20) Maromak hatene ita diʼak liu fali ita rasik. Nia hatene ita-nia situasaun, hanoin, no sentimentu. No nia hanoin ita kuandu ita hetan susar.

Ita bele buka kmaan, matenek no apoiu husi Maromak tanba nia prontu ajuda ema neʼebé iha terus laran

 Eskritura neʼebé fó kmaan ba ita

  • “Bainhira ó bolu, Jeová sei hatán. Bainhira ó halerik hodi husu ajuda, nia sei dehan: ‘Haʼu mak neʼe!’”—ISAIAS 58:9.

  • “Jeová dehan: ‘Haʼu hatene didiʼak buat neʼebé haʼu hakarak ba imi, haʼu hakarak fó imi dame, laʼós fó-terus, no haʼu hakarak fó imi futuru kapás no esperansa. Imi sei bolu haʼu no hakbesik mai haʼu liuhusi orasaun, no haʼu sei rona imi.’”—JEREMIAS 29:11, 12.

  • “Favór ida, halibur haʼu-nia matan-been sira iha Ita-nia bee-fatin husi animál kulit. Buat sira-neʼe hotu hakerek ona iha Ita-nia livru, loos ka lae?”—SALMO 56:8.

MAROMAK HAREE NO HANOIN ITA

Hodi hatene katak Maromak hanoin ita, neʼe bele ajuda ita atu tahan hasoru susar sira ka lae? Haree toʼok Maria nia esperiénsia:

“Haʼu sente moris mak susar tebes no la justisa. Haʼu-nia oan-mane neʼebé tinan 18 luta hasoru moras kankru durante tinan rua no ikusmai nia mate. Haʼu hirus tebes ba Jeová tanba la kura no salva nia!”

“Tinan neen liutiha, belun laran-diʼak ida husi haʼu-nia kongregasaun rona didiʼak bainhira haʼu fó sai katak haʼu sente Jeová la hadomi haʼu. Ba oras barak, nia nonook hodi rona didiʼak ba haʼu, tuirmai nia temi eskritura ida neʼebé kona duni haʼu-nia laran, neʼe mak 1 João 3:19, 20, neʼebé hatete: ‘Maromak mak boot liu fali ita-nia laran no hatene buat hotu.’ Nia esplika katak Jeová komprende terus neʼebé ita hasoru.”

“Susar tebes ba haʼu atu la hirus ba Jeová. Maibé haʼu lee Salmo 94:19, neʼebé hatete: ‘Bainhira haʼu laran-taridu tebes, Ita fó kmaan ba haʼu no halo haʼu kontente.’ Haʼu sente eskritura neʼe hakerek duni mai haʼu. Ikusmai, haʼu sente kmaan bainhira haʼu koʼalia tiha ba Jeová kona-ba susar sira neʼebé haʼu hasoru tanba haʼu hatene katak nia rona no mós komprende haʼu.”

Ita sente kmaan tebes hodi hatene katak Maromak komprende no sente buat neʼebé ita sente. Maibé tanbasá iha terus barak? Maromak fó kastigu ba ita tanba sala neʼebé ita halo ka lae? Maromak sei halakon terus hotu ka lae? Informasaun tuirmai sei hatán ba pergunta sira-neʼe.