Skip to content

Skip to table of contents

Maromak hanoin ema ka lae?

Maromak hanoin ema ka lae?

OINSÁ MAK KRIASAUN HANORIN ITA

Hahalok hanoin ema mak “abilidade atu sente buat neʼebé ema seluk sente hodi imajina sira-nia an iha ema seluk nia situasaun”. Matenek-naʼin ida kona-ba saúde mentál, Dr. Rick Hanson hatete katak ema hotu moris mai ho abilidade atu hatudu katak sira hanoin ema seluk.

HANOIN TOʼOK: La hanesan ho kriatura seluk, tanbasá mak ema iha abilidade atu hanoin ema seluk? Bíblia esplika katak Maromak kria ema tuir ninia ilas. (Gênesis [Kejadian] 1:26) Hodi kria ita tuir ninia ilas, neʼe katak ita bele haleno Maromak nia hahalok sira. Tan neʼe, bainhira ema hatudu katak sira hanoin no fó ajuda ba ema seluk, sira haleno sira-nia Kriadór, Maromak Jeová nia hahalok furak ida, neʼe mak hanoin ema.​—Provérbios (Amsal) 14:31.

SAIDA MAK BÍBLIA HANORIN KONA-BA OINSÁ MAROMAK HANOIN EMA

Maromak hanoin ita no lakohi haree ita terus. Kona-ba povu Izraél antigu neʼebé sai atan iha rai-Ejitu no moris iha rai-fuik maran durante tinan 40, Bíblia hatete: “Durante sira-nia susar hotu, nia mós sente neon-susar.” (Isaías [Yesaya] 63:9) Maromak laʼós deʼit hatene kona-ba sira-nia terus, maibé nia mós bele sente ida-neʼe. Nia hatete: “Haʼu hatene didiʼak kona-ba terus neʼebé sira hasoru.” (Êxodo [Keluaran] 3:7) Maromak mós hatete: “Ema naran deʼit neʼebé book imi, neʼe hanesan sira tuu haʼu-nia matan-fuan.” (Zacarias [Zakharia] 2:8) Bainhira ema haterus ita, Maromak mós sente terus hamutuk ho ita.

Karik ita sente laran-triste no sente la merese atu Maromak hanoin ita, maibé Bíblia fó kmaan ba ita katak “Maromak mak boot liu fali ita-nia laran no hatene buat hotu”. (1 João 3:19, 20) Maromak hatene ita diʼak liu fali ita rasik. Nia hatene ita-nia situasaun, hanoin, no sentimentu. No nia mós bele sente buat neʼebé ita sente.

Ita bele buka kmaan, matenek no apoiu husi Maromak tanba nia prontu ajuda ema neʼebé iha terus laran

 Eskritura neʼebé fó kmaan ba ita

  • “Bainhira ó bolu, Jeová sei hatán; bainhira ó halerik hodi husu ajuda, nia sei dehan: ‘Haʼu mak neʼe!’”​—ISAÍAS (YESAYA) 58:9.

  • “Jeová dehan: ‘Haʼu hatene didiʼak buat neʼebé haʼu hakarak ba imi, haʼu hakarak fó imi dame, laʼós fó-terus, no haʼu hakarak fó imi futuru kapás no esperansa. Imi sei bolu haʼu no hakbesik mai haʼu liuhusi orasaun, no haʼu sei rona imi.’”​—JEREMIAS (YEREMIA) 29:11, 12.

  • “Favór ida, halibur haʼu-nia matan-been sira iha Ita-nia bee-fatin husi animál kulit. Buat sira-neʼe hotu hakerek ona iha Ita-nia livru, loos ka lae?”​—SALMO (MAZMUR) 56:8.

MAROMAK HAREE, KOMPRENDE, NO HANOIN ITA

Hodi hatene katak Maromak hanoin ita, bele ajuda ita atu tahan hasoru susar sira ka lae? Hanoin toʼok kona-ba Maria nia esperiénsia:

“Haʼu-nia oan-mane neʼebé tinan 18 luta hasoru moras kankru durante tinan rua, no ikusmai nia mate. Haʼu sente moris mak susar tebes no la justisa. Haʼu sente hirus tebes ba Jeová tanba la kura no salva nia!”

“Tinan neen liutiha, belun laran-diʼak ida husi haʼu-nia kongregasaun rona didiʼak bainhira haʼu fó sai katak haʼu sente Jeová la hadomi haʼu. Ba oras barak, nia nonook hodi rona didiʼak ba haʼu, tuirmai nia temi eskritura ida neʼebé kona duni haʼu-nia laran, eskritura iha 1 João 3:19, 20, neʼebé hatete: ‘Maromak mak boot liu fali ita-nia laran no hatene buat hotu.’ Nia esplika katak Jeová komprende terus neʼebé ita hasoru.”

“Susar tebes ba haʼu atu la hirus tan ba Jeová. Maibé haʼu lee Salmo (Mazmur) 94:19, neʼebé hatete: ‘Bainhira haʼu laran-taridu tebes, Ita fó kmaan ba haʼu no halo haʼu kontente.’ Haʼu sente eskritura neʼe hakerek duni mai haʼu. Ikusmai, haʼu sente kmaan bainhira haʼu koʼalia ba Jeová kona-ba susar sira neʼebé haʼu hasoru tanba haʼu hatene katak nia rona no mós komprende haʼu.”

Ita sente kmaan tebes hodi hatene katak Maromak komprende no sente buat neʼebé ita sente. Se nuneʼe, tanbasá iha terus barak? Maromak fó kastigu ba ita tanba sala neʼebé ita halo ka lae? Maromak sei halakon terus hotu ka lae? Informasaun tuirmai sei hatán ba pergunta sira-neʼe.