Skip to content

Skip to table of contents

 INFORMASAUN IHA OIN | KUANDU EMA NEʼEBÉ ITA HADOMI MATE

Sala ka lae atu sente triste?

Sala ka lae atu sente triste?

Ita iha ona esperiénsia kona-ba hetan moras boot ka lae? Karik agora ita sai diʼak fali no haluha ona kona-ba neʼe. Maibé sentimentu triste la hanesan ho moras. Livru ida (Healing a Spouse’s Grieving Heart, husi Dr. Alan Wolfelt) hatete katak, bainhira ema neʼebé ita hadomi mate, neʼe bele halo ita sente laran-kanek tebes ba tempu kleur, maibé “hodi simu ajuda husi ema seluk, ita-nia laran-kanek neʼe bele sai menus neineik-neineik”.

Hanoin toʼok kona-ba istória balu husi Bíblia. Bainhira Abraão nia feen, Sara, mate, nia “hahú halerik no tanis ba Sara”. Lia-orijinál neʼebé tradús nuʼudar “hahú halerik” hatudu katak Abraão sente triste ba tempu kleur. * Ezemplu seluk mak Jacob. Bainhira nia rona katak animál fuik ida oho tiha ninia oan José, nia triste ba “loron barak”, no la iha buat ida mak bele fó kmaan ba nia. No liutiha tinan barak mós Jacob sente triste nafatin.—Gênesis (Kejadian) 23:2; 37:34, 35; 42:36; 45:28.

Abraão halerik no tanis ba ninia feen, Sara

Nuneʼe mós ho ohin loron. Ema barak sente triste ba tempu kleur tanba ema neʼebé sira hadomi mate, hanesan ezemplu rua tuirmai neʼe.

  • “Haʼu-nia laʼen, Robert, mate iha loron 9 Jullu 2008 tanba hetan asidente. Iha dadeer, ami hahú ami-nia loron hanesan baibain deʼit. Han tiha matabixu, ami reʼi malu, hakoʼak malu, no hatete ba malu: ‘Haʼu hadomi ó.’ Maski tinan neen liu tiha, haʼu sente triste nafatin. Haʼu hanoin haʼu-nia laran-kanek neʼe sei nunka bele kura.”—Gail, tinan 60.

  • “Maski haʼu-nia feen mate tinan 18 ona, maibé haʼu-nia laran triste nafatin. Bainhira haʼu haree buat furak hanesan ai-funan ka manu, neʼe halo haʼu hanoin fali nia. Haʼu hanoin: ‘Se haʼu-nia doben haree buat neʼebé haʼu haree daudauk, karik nia mós sei sente kontente.’”—Etan, tinan 84.

Loos duni, atu sente triste ba tempu kleur hodi hanoin ema neʼebé mate ona, neʼe normál. No dalan neʼebé ema ida-idak hatudu sai ninia sentimentu triste mós la hanesan. Tan neʼe, ita labele tesi lia ba ema seluk neʼebé triste hela no ita mós la bele fó-sala ba ita-nia an. Entaun, se Ita mak sente triste daudauk tanba lakon ema neʼebé Ita hadomi, saida deʼit mak Ita bele halo?

^ par. 4 Bíblia hatudu katak bainhira Sara mate, Abraão nia oan-mane Isaac mós sente triste nafatin maski liu tiha tinan tolu ona. (Gênesis [Kejadian] 24:67) Haree mós “Banati-tuir sira-nia fiar” iha pájina 12-15 iha livru neʼe.