Skip to content

Skip to table of contents

 INFORMASAUN IHA OIN

Kuandu ema neʼebé ita hadomi mate

Kuandu ema neʼebé ita hadomi mate

“Keta tanis . . . Neʼe mak Maromak nia planu.”

Neʼe mak liafuan neʼebé Dora rona husi ninia belun bainhira ninia aman mate tanba asidente karreta.

Dora * hadomi tebes ninia aman. Maski Dora nia belun hatete hanesan neʼe tanba hakarak atu fó kmaan ba nia, maibé liafuan neʼe hakanek tebes Dora nia laran. Dora husu fila-fila ba ninia an: “Tanbasá mak Maromak iha planu hanesan neʼe?” Tinan barak liu tiha mós Dora laran-kanek nafatin.

Loos duni, bainhira ita-nia inan-aman ka oan ka kaben mate, neʼe halo ita triste tebes no presiza tempu kleur atu bele sente kmaan fali. Tuir Bíblia, mate mak ema nia “inimigu ikus”. (1 Korinto 15:26) Nuʼudar ita-nia inimigu, mate hadau ema neʼebé ita hadomi husi ita no estraga ita-nia moris, liuliu se ida-neʼe akontese derrepente deʼit. Tan neʼe, keta hakfodak se depois akontesimentu neʼe ita sei sente bilán no la hatene atu halo saida.

Karik Ita husu: ‘Toʼo bainhira mak haʼu sei sente triste hanesan neʼe? Hodi halo saida deʼit mak haʼu bele hamenus haʼu-nia triste? Saida mak haʼu bele halo atu fó kmaan ba haʼu-nia belun neʼebé triste hela? Iha ka lae, esperansa ba ema neʼebé mate ona?’

^ par. 5 Naran balu iha informasaun neʼe laʼós naran neʼebé loos.