Skip to content

Skip to table of contents

Sé mak Liurai ba Maromak nia Reinu?

Sé mak Liurai ba Maromak nia Reinu?

Maromak leno ninia atan balu atu hakerek informasaun klaru iha Bíblia atu ajuda ita hatene kona-ba sé mak sei sai Liurai iha Maromak nia Reinu, ka Ukun.

  • Ida neʼebé Maromak mak hili. “Haʼu hili ona haʼu-nia liurai . . . Haʼu sei fó nasaun sira nuʼudar liman-rohan ba ó no fó rai tomak ba ó nuʼudar ó-nian.”—Salmo 2:6, 8.

  • Mai husi David nia liña jerasaun. “Labarik ida moris ona ba ita, no oan-mane ida entrega ona ba ita . . . Ninia ukun sei aumenta ba nafatin no dame sei la iha rohan. Nia sei tuur iha David nia kadunan no simu ninia ukun.” Nia sei “harii metin” ukun neʼe.—Isaias 9:6, 7.

  • Moris iha Belein. “Oh Belein . . . , husi ó mak sei mosu ba haʼu ida neʼebé sei ukun . . . Ninia naran-boot sei toʼo rai hotu iha mundu tomak.”—Miqueias 5:2, 4.

  • Ema la simu nia no oho nia. “Ema hakribi nia, no . . . haree nia nuʼudar ema neʼebé la iha folin . . . Ema sona borus nia tanba ami-nia hahalok aat; nia hetan terus boot tanba ami-nia sala sira.”—Isaias 53:3, 5.

  • Moris-hiʼas husi mate no hetan pozisaun espesiál. “Ita sei la husik hela haʼu iha rate laran. Ita sei la husik Ita-nia atan neʼebé laran-metin ba Ita atu haree rai-kuak. . . . Hamriik iha Ita-nia liman-loos mak lori ksolok ba nafatin.”—Salmo 16:10, 11.

Jesus Kristu mak Ukun-Naʼin neʼebé diʼak liu

Iha ema nia istória, ema ida deʼit mak kumpre kritériu atu sai Ukun-Naʼin neʼebé diʼak liu. Nia mak Jesus Kristu. Tuir loloos, anju ida koʼalia ba Jesus nia inan Maria katak: “Maromak . . . sei fó ninia aman David nia kadunan ba nia. . . . Ninia Ukun sei la iha rohan.”—Lucas 1:31-33.

Jesus nunka sai nuʼudar ukun-naʼin iha rai. Nia sei ukun ema husi lalehan nuʼudar Liurai iha Maromak nia Reinu, ka Ukun. Saida mak halo Jesus sai nuʼudar Ukun-Naʼin neʼebé diʼak liu? Haree toʼok buat neʼebé Jesus halo kuandu iha rai.

  •   Jesus hanoin ema. Jesus ajuda mane no feto, labarik no ferik-katuas. Nia la haree ba ema nia rasa ka la diskrimina ema. (Mateus 9:36; Marcos 10:16) Bainhira ema neʼebé moras-lepra husu nia: “Se Ita-Boot hakarak, Ita bele halo haʼu sai moos,” neʼe halo Jesus hanoin tebes mane neʼe no kura nia. —Marcos 1:40-42.

  • Jesus hanorin ita oinsá atu halo kontente Maromak. Nia hatete: “Imi labele sai atan ba Maromak no mós ba Rikusoin.” Nia mós hatete katak ita tenke halo ba ema seluk hanesan ita hakarak sira halo mai ita. Ema balu bolu neʼe nuʼudar Ukun-Fuan Osan-Mean. Nia mós hatudu katak Maromak la interese deʼit ba buat neʼebé ita halo, maibé mós ba buat neʼebé ita hanoin no sente iha ita-nia laran. Tan neʼe, atu halo Maromak kontente, ita presiza kontrola buat neʼebé ita sente iha laran. (Mateus 5:28; 6:24; 7:12) Jesus mós hatete katak, atu ita hetan kontente neʼebé loloos, ita tenke aprende buat neʼebé Maromak hakarak ita atu halo, no depois halo tuir.—Lucas 11:28.

  • Jesus hanorin ita atu hadomi ema seluk. Jesus nia liafuan no hahalok iha kbiit no kona ema nia laran. “Ema-lubun hakfodak ho dalan neʼebé nia hanorin, tanba nia hanorin hanesan ema neʼebé iha podér.” (Mateus 7:28, 29) Nia hanorin ema atu ‘hadomi sira-nia inimigu’. Nia mós halo orasaun ba ema balu neʼebé atu oho nia: “Aman, perdua sira bá, tanba sira la hatene buat neʼebé sira halo.”—Mateus 5:44; Lucas 23:34.

Jesus mak bele sai Ukun-Naʼin perfeitu ba mundu, nia ajuda ema no laran-diʼak. Maibé bainhira mak nia komesa ukun?