Lakleur tan, ita hotu sei hasoru situasaun neʼebé hanesan “anin-boot”. Jesus bolu ida-neʼe nuʼudar “terus boot”. (Mateus 24:21) Ita hotu labele halai sees husi situasaun neʼe. Maibé ita bele halo buat ruma hodi proteje ita-nia an. Saida mak ita bele halo?

Iha Jesus Kristu nia diskursu iha foho, nia fó sai matadalan mai ita: “Neʼe duni, kontinua buka uluk Maromak nia Ukun no buat neʼebé loos tuir Maromak nia haree.” (Mateus 6:33) Oinsá mak ita bele halo ida-neʼe?

Buka uluk Maromak nia Ukun. Neʼe katak ita tenke haree Maromak nia Ukun importante liu fali buat sira seluk. (Mateus 6:25, 32, 33) Tanbasá? Tanba ema labele duni rezolve problema sira iha mundu neʼe. Só Maromak nia Ukun deʼit mak bele.

Buka buat neʼebé loos tuir Maromak nia haree. Ita tenke hakaʼas an atu moris tuir Maromak nia ukun-fuan no prinsípiu sira neʼebé loos. Tanbasá? Tanba se ita rasik mak hili saida mak loos no sala, neʼe sei lori rezultadu neʼebé aat. (Provérbios 16:25) Maibé se ita moris tuir Maromak nia ukun-fuan sira, ita sei halo kontente Maromak, no ita-nia moris sei sai diʼak liu.—Isaias 48:17, 18.

Kontinua buka uluk Maromak nia Ukun no buat neʼebé loos tuir Maromak nia haree. Jesus fó avizu katak ema balu sei hanoin se sira buka rikusoin barak, neʼe sei proteje sira. Balu sai okupadu demais atu tau matan ba sira-nia an no família toʼo la iha tan tempu atu buka Maromak nia Ukun.—Mateus 6:19-21, 25-32.

 Maibé, Jesus promete katak ema neʼebé apoia Maromak nia Ukun sei la falta buat neʼebé sira presiza, no sira mós sei hetan bensaun barak tebes iha futuru.—Mateus 6:33.

Maski Jesus nia dixípulu sira iha Bíblia nia tempu buka uluk Maromak nia Ukun no buat neʼebé loos tuir Maromak nia haree, maibé sira mós hasoru terus iha sira-nia moris. Maski nuneʼe, sira bele hetan fatin neʼebé seguru. Oinsá?

Sira moris tuir Maromak nia ukun-fuan no prinsípiu sira, no neʼe proteje sira husi susar neʼebé mosu ba ema neʼebé lakohi halo tuir Maromak. Sira fiar metin katak Maromak nia Reinu sei mai, no neʼe ajuda sira atu tahan hasoru situasaun susar oioin. No Maromak mós fó ba sira “kbiit neʼebé la hanesan baibain” atu sira bele tahan.—2 Korinto 4:7-9.

Ema Kristaun iha tempu uluk halo tuir Jesus nia avizu atu buka uluk Maromak nia Reinu. Sira haklaken kona-ba Maromak nia Reinu iha rai oioin. (Koloso 1:23) Iha ema neʼebé halo ida-neʼe ohin loron ka lae?

Sin! Testemuña ba Jeová hatene katak hela tempu uitoan tan Maromak nia Reinu sei halakon mundu aat neʼe. Sira hakaʼas an atu halo tuir Jesus nia liafuan: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, depois neʼe, mundu nia rohan sei mai.”—Mateus 24:14.

Saida mak Ita sei halo? Ami anima Ita atu banati-tuir ema iha tempu uluk iha sidade Bereia, Masedónia. Bainhira sira rona liafuan diʼak kona-ba Maromak nia Ukun husi apóstolu Paulo, sira simu mensajen neʼe “ho laran-manas”. Tuirmai sira ‘buka-hatene didiʼak Eskritura sira’ atu haree buat sira-neʼe loos ka lae no “sira barak sai fiar-naʼin”.—Apóstolu 17:11, 12.

Ita mós bele halo nuneʼe. Hodi buka uluk Maromak nia Ukun, Ita sei hetan fatin protesaun agora no goza moris neʼebé iha dame no seguru iha futuru.