Skip to content

Skip to table of contents

Moris iha folin duni

Moris iha folin duni

Faizal nia feen mate, no maizumenus tinan ida liutiha nia tenke hetan operasaun boot iha nia fuan. Nia hatete: “Bainhira haʼu lee livru Job, haʼu bele haree katak Jeová tau livru neʼe iha Bíblia tanba nia iha razaun. Bainhira ita sente laran-kraik tebes no ita lee ezemplu husi Bíblia neʼebé hanesan ho ita-nia situasaun, neʼe bele fó kmaan mai ita. Tuir loloos moris iha folin duni.”

Tarsha neʼebé ninia inan mate bainhira nia sei joven, hatete: “Koñese didiʼak ita-nia Kriadór mak lori esperansa, kontente no objetivu ba moris, maski hasoru problema barak. Ita bele fiar metin katak Jeová bele duni tau matan no ajuda ita loroloron.”

ITA koʼalia ona kona-ba oinsá mak situasaun neʼebé lori trauma bele halo moris haree hanesan la iha folin. Nuʼudar Ita tahan Ita-nia problema rasik, karik Ita bele hanoin moris iha folin ka lae, no iha ema ruma interese ba Ita ka lae. Fiar bá katak Maromak hanoin kona-ba Ita-nia susar sira. Ita iha folin boot ba nia.

Ema neʼebé hakerek Salmo 86 hatete katak nia tau fiar ba Maromak: “Durante haʼu-nia tempu susar haʼu bolu Ita, tanba Ita sei hatán haʼu.” (Salmo 86:7) Maibé karik Ita hanoin, ‘Oinsá mak Maromak hatán ba haʼu “durante haʼu-nia tempu susar”?’

Maski Maromak la rezolve kedas Ita-nia problema, ninia Liafuan, Bíblia bele ajuda Ita iha fiar metin katak nia bele halo ita sente dame iha laran atu bele ajuda ita tahan: “Keta hanoin resin kona-ba buat ida, maibé iha situasaun hotu husu ajuda husi Maromak liuhusi orasaun no harohan no mós fó agradese, no Maromak nia dame neʼebé aas liu ema nia hanoin hotu sei proteje imi-nia laran no imi-nia neon.” (Filipe 4:6, 7, nota-rodapé) Haree toʼok eskritura balu husi Bíblia neʼebé ajuda ita atu tau fiar katak Maromak hanoin ita.

Maromak hanoin Ita

“Maromak la haluha [manu-liin] sira ida. . . . Imi folin-boot liu fali manu-liin barak.”​Lucas 12:6, 7.

HANOIN TOʼOK: Ba ema balu, manu-liin ladún iha folin, maibé Maromak la haluha sira. Maromak hatene kona-ba sira ida-idak tanba sira hotu mak iha folin. Maromak haree ita ema iha folin boot liu fali manu-liin. Ema mak kriasaun neʼebé furak liu iha mundu, tanba Maromak kria tuir ninia “ilas” no ita ema bele haleno hahalok furak sira neʼebé Maromak iha.​—Génesis 1:26, 27.

“Oh Jeová, Ita buka-hatene didiʼak ona haʼu, no Ita hatene haʼu. . . . Ita hatene haʼu-nia hanoin sira . . . Haree didiʼak haʼu bá, no hatene haʼu-nia neon-susar.”​Salmo 139:1, 2, 23.

HANOIN TOʼOK: Maromak hatene Ita didiʼak. Nia hatene Ita-nia hanoin no sentimentu iha laran. Maski ema seluk la komprende kona-ba Ita-nia susar, Maromak hanoin Ita no hakarak ajuda Ita. Neʼe halo Ita-nia moris iha folin duni.

 Ita-nia moris iha folin

“Oh Jeová, rona haʼu-nia orasaun; husik haʼu-nia halerik atu husu ajuda toʼo ba Ita. . . . See tilun ba haʼu; hatán lalais mai haʼu bainhira haʼu bolu. . . . Nia sei see tilun didiʼak ba ema kiak nia orasaun.”​Salmo 102:1, 2, 17.

HANOIN TOʼOK: Husi tempu neʼebé ema nia terus foin hahú, Jeová hanoin ema neʼebé tanis tanba hasoru susar, no nia haree ema nia matan-been hotu neʼebé monu ba rai. (Salmo 56:8) Neʼe mós inklui Ita-nia matan-been. Maromak hanoin Ita-nia susar no matan-been hotu tanba nia hafolin tebes Ita.

“Keta laran-taridu, tanba haʼu mak ó-nia Maromak. Haʼu sei hametin ó, sin, haʼu sei ajuda ó . . . Haʼu, Jeová ó-nia Maromak . . . Haʼu dehan ba ó: ‘Keta taʼuk. Haʼu sei ajuda ó.’”​Isaias 41:10, 13.

HANOIN TOʼOK: Maromak prontu atu ajuda Ita. Se Ita monu, nia sei hiʼit saʼe fali Ita.

Iha esperansa kapás ba futuru

“Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek.”​João 3:16.

HANOIN TOʼOK: Maromak hadomi tebes Ita toʼo fó ninia Oan-Mane, Jesus ba Ita. Sakrifísiu neʼe fó Ita esperansa atu bele moris kontente, iha folin no moris ba nafatin. *

Maski hasoru susar no Ita sente hanesan labele tahan ona ho situasaun moris, estuda didiʼak Maromak nia Liafuan no hametin Ita-nia fiar ba Maromak nia promesa sira. Neʼe sei halo Ita kontente no sente katak moris neʼe iha folin duni.

^ par. 19 Atu aprende liután kona-ba oinsá Jesus nia sakrifísiu lori benefísiu ba Ita, haree vídeo Komemora Jesus nia mate iha sítiu www.jw.org/tdt. Haree LIVRU & VÍDEO > VÍDEO SIRA > AMI-NIA REUNIAUN NO HAKLAKEN.