Skip to content

Skip to table of contents

Ita bele moris ba nafatin iha mundu

Ita bele moris ba nafatin iha mundu

FUTURU NEʼEBÉ KAPÁS! Ita-nia Kriadór promete katak nia sei fó ita moris rohan-laek iha mundu. Ema barak sente susar atu fiar ida-neʼe. Sira hatete: ‘Ikusmai ema hotu sei mate, mate mak parte ida husi ema nia moris.’ Ema seluk fiar katak ita bele duni moris ba nafatin, maibé laʼós iha mundu neʼe. Sira hatete katak ita bele hetan moris rohan-laek se ita mate ona no bá lalehan. Ita rasik hanoin oinsá?

Antes hatán pergunta neʼe, haree toʼok Bíblia nia resposta ba pergunta tolu tuirmai: Saida mak ita bele aprende husi dalan neʼebé Maromak kria ema? Tuir loloos, saida mak Maromak nia hakarak ba ema no mundu? Tanbasá mak ikusmai ema mate?

EMA MAK KRIATURA NEʼEBÉ ÚNIKU

Husi kriatura hotu neʼebé Maromak kria iha mundu, ema mak úniku. Tanbasá? Bíblia hatete katak só ema deʼit mak Maromak kria tuir ninia “ilas”. (Gênesis [Kejadian] 1:26, 27) Neʼe katak sá? Neʼe katak ema iha hahalok diʼak sira neʼebé Maromak mós iha, hanesan domin no justisa.

Maromak mós kria ema ho kbiit atu hanoin, iha morál, no hakarak atu iha relasaun diʼak ho Maromak. Tan neʼe mak ita bele hafolin universu neʼebé furak no buat hotu hanesan arte, múzika no poezia. Laʼós neʼe deʼit, ema mós iha kapasidade neʼebé úniku atu adora Kriadór. Hahalok sira-neʼe hatudu katak ema la hanesan duni ho kriatura seluk neʼebé moris iha mundu.

Entaun, hanoin toʼok: Se Maromak nia planu mak atu ema moris ba tinan 70 ka 80 deʼit, tanbasá mak nia kria ema ho matenek no hahalok diʼak oioin no mós kapasidade atu haburas buat sira-neʼe? Tuir loloos, Maromak fó buat sira-neʼe hotu mai ita, atu ita bele goza moris iha mundu ba nafatin.

MAROMAK NIA HAKARAK

Ema balu hatete katak Maromak lakohi ema moris ba nafatin iha mundu. Sira hatete katak mundu mak hela-fatin temporáriu deʼit, fatin atu haree sé-sé deʼit mak merese bá lalehan no moris ba nafatin hamutuk ho Maromak. Maibé, se ida-neʼe mak loos, neʼe katak Maromak mak hamosu buat aat sira iha mundu ka? Neʼe kontra malu duni ho Maromak nia hahalok. Kona-ba Maromak, Bíblia hatete: “Tanba ninia dalan sira hotu mak loos. Maromak laran-metin, nia  sempre hatudu justisa, nia iha hahalok loos no laran-loos.”​—Deuteronômio (Ulangan) 32:4.

Bíblia hatudu sai Maromak nia hakarak ba mundu liuhusi liafuan sira-neʼe: “Kona-ba lalehan, neʼe mak Jeová nian, maibé nia fó ona rai ba ema nia oan-mane sira.” (Salmo [Mazmur] 115:16) Sin, Maromak kria mundu furak nuʼudar ema nia hela-fatin permanente no Maromak kria buat oioin atu taka ita-nia presiza hodi ita bele goza moris ba nafatin.​—Gênesis (Kejadian) 2:8, 9.

“Kona-ba lalehan, neʼe mak Jeová nian, maibé nia fó ona rai ba ema nia oan-mane sira.”​—Salmo (Mazmur) 115:16

Bíblia mós fó sai ho klaru Maromak nia hakarak kona-ba ema. Maromak haruka kaben-naʼin primeiru atu halo nakonu mundu no “domina rai neʼe, domina . . . kriatura hotu neʼebé book an iha rai”. (Gênesis [Kejadian] 1:28) Tau matan no halo luan paraízu iha mundu mak knaar neʼebé furak tebes! Laʼós neʼe deʼit, Adão ho Eva no mós sira-nia bei-oan sira iha oportunidade atu moris ba nafatin iha mundu, laʼós iha lalehan.

TANBASÁ MAK EMA MATE?

Se nuneʼe, tanbasá mak ita mate? Bíblia esplika katak iha kriatura espíritu ida neʼebé ikusmai sai kontradór no koko atu estraga Maromak nia arranju iha Eden. Oinsá?

Satanás book ita-nia inan-aman primeiru, Adão no Eva atu apoia nia hodi kontra Maromak. Satanás hatete katak Maromak subar husi sira direitu atu deside buat diʼak no aat. Tuirmai sira hili atu apoia Satanás no kontra Maromak. Rezultadu saida mak sira hetan? Ikusmai sira mate, hanesan buat neʼebé Maromak hatete nanis ona. Sira lakon sira-nia oportunidade atu moris ba nafatin iha mundu paraízu.​—Gênesis (Kejadian) 2:17; 3:1-6; 5:5.

Adão no Eva nia hahalok kontra iha jardín Eden kona ema hotu toʼo ohin loron. Maromak nia liafuan hatete: “Liuhusi ema ida [Adão] mak sala tama iha mundu, no mate tanba sala. Nuneʼe mate habelar ba ema hotu.” (Roma 5:12) Ita mate tanba ita mak Adão ho Eva nia bei-oan sira, laʼós tanba Maromak nia planu.

ITA BELE MORIS BA NAFATIN IHA MUNDU

Adão no Eva nia hahalok kontra la hapara Maromak nia hakarak ba ema no mundu. Maromak nia domin neʼebé perfeitu no ninia hahalok justisa book nia atu prepara dalan ida hodi nuneʼe ita bele livre husi sala no mate. Apóstolu Paulo esplika: “Sala nia kolen mak mate, maibé prezente neʼebé Maromak fó mak moris rohan-laek liuhusi Kristu Jesus ita Naʼi.” (Roma 6:23) Tanba domin, Maromak “fó nia Oan-Mane mesak [Jesus Kristu], atu nuneʼe ema hotu neʼebé hatudu fiar iha nia sei la lakon maibé hetan moris rohan-laek”. (João 3:16) Hodi fó ninia an nuʼudar sakrifísiu, Jesus taka fali buat hotu neʼebé Adão halakon ona. *

Lakleur tan, Maromak nia promesa kona-ba mundu paraízu sei sai loos. Ita mós bele hola parte iha futuru furak neʼe se ita halo tuir Jesus nia liafuan neʼebé hatete: “Laʼo liuhusi odamatan kloot bá, basá dalan boot no luan mak lori ema ba mate, no ema barak laʼo liuhusi nia. Maibé odamatan kloot no dalan kiʼik tebes mak lori ema ba moris, no ema uitoan deʼit mak hetan nia.” (Mateus 7:13, 14) Sin, Ita-nia futuru depende ba desizaun neʼebé Ita halo. Saida mak Ita sei halo?

^ par. 17 Atu hetan informasaun liután kona-ba saida mak Jesus nia sakrifísiu bele halo ba ita, haree kapítulu 5 husi livru Tuir Loloos, Saida mak Bíblia Hanorin? Livru neʼe husi Testemuña ba Jeová, no bele haree mós iha sítiu www.jw.org/tdt.