Skip to content

Skip to table of contents

Evidénsia kona-ba Bíblia nia profesia neʼebé sai loos

Evidénsia kona-ba Bíblia nia profesia neʼebé sai loos

IHA MONUMENTU IDA IHA ROMA, RAI-ITÁLIA, NEʼEBÉ DADA EMA HUSI MUNDU TOMAK ATU VIZITA RAI NEʼE. MONUMENTU NEʼE HARII ATU HATUDU RESPEITU BA UKUN-NAʼIN ROMA IDA NARAN TITO.

Monumentu Tito nian iha dezeñu rua neʼebé bahat iha monumentu neʼe, neʼebé hatudu kona-ba akontesimentu famozu ida. Maski ema barak la hatene, maibé tuir loloos, iha ligasaun entre monumentu neʼe ho Bíblia. Monumentu Tito nian mak evidénsia kona-ba Bíblia nia profesia neʼebé sai loos.

SIDADE NEʼE HETAN TESI-LIA

Maizumenus iha tinan 30 liutiha Kristu, governu Roma ukun área husi Bretaña no Gália (agora rai-Fransa) toʼo rai-Ejitu, no área sira-neʼe riku tebes no mós hakmatek. Maibé iha área ida neʼebé mak halo ukun-naʼin Roma ulun-moras, neʼe mak distritu Judeia.

Livru ida (Encyclopedia of Ancient Rome) hatete: “Iha Roma nia ukun okos, só ema iha distritu Judeia deʼit mak la gosta malu ho ema Roma. Ema judeu la gosta ukun-naʼin jentiu sira tanba sira la hatudu respeitu ba ema judeu nia kostume, no ema Roma mós la gosta ema judeu tanba sira ulun-toos.” Ema judeu barak tau esperansa ba polítiku-naʼin judeu ida atu salva sira husi ema Roma no hadau fali Izraél nia liberdade. Maibé iha tinan 33 liutiha Kristu, Jesus Kristu deklara katak Jeruzalein sei hasoru susar boot.

Jesus hatete: “Loron sei mai kuandu ó-nia inimigu harii lutu ho ai-meik hodi haleʼu ó, no sira sei ataka ó husi fatin hotu. Sira sei harahun ó no ó-nia oan sira, no sira sei la husik fatuk ida tula iha fatuk seluk nia leten.”​Lucas 19:43, 44.

Jesus nia liafuan neʼe halo ninia dixípulu sira konfuzaun. Loron rua liutiha, bainhira sira laʼo sai husi Jeruzalein nia templu neʼebé furak loos, ida husi sira hatete: “Mestre, haree toʼok ba fatuk no uma sira-neʼe!” Templu nia fatuk bele naruk toʼo metru 11, luan metru 5 no aas metru 3! Maski nuneʼe, Jesus hatán: “Kona-ba buat sira neʼebé imi haree daudaun neʼe, loron sei toʼo mai bainhira fatuk sira la tula tan iha fatuk ida nia leten, sira hotu sei naksobu.”​Marcos 13:1; Lucas 21:6.

Jesus esplika liután ba sira hodi dehan: “Kuandu imi haree soldadu sira haleʼu Jeruzalein, imi hatene bá katak nia besik ona atu lakon. Iha oras neʼe, ema neʼebé iha Judeia presiza halai ba foho, no sira neʼebé iha sidade laran tenke sai, no sira neʼebé iha toʼos labele tama fali ba sidade.” (Lucas 21:20, 21) Jesus nia liafuan sai loos ka lae?

SIDADE NEʼE NAKSOBU

Tinan 33 liu tiha ona no Judeia nafatin iha Roma nia ukun okos. Iha tinan 66 liutiha Kristu, Roma nia administradór ida iha Judeia naran Géssio Floro, hadau osan husi osan-fatin templu nian, no neʼe halo ema judeu sira sai hirus tebes. Lakleur deʼit, funu-naʼin judeu sira hobur tama ba Jeruzalein, ataka soldadu Roma sira-nia postu, no deklara katak sira livre ona husi Roma.

Maizumenus fulan tolu liutiha, Céstio Galo dirije tropa Roma hamutuk naʼin–30.000 liu atu hakbesik ba Jeruzalein no halakon ema neʼebé kontra governu Roma. Lakleur deʼit  ema Roma tama ba sidade no sobu moru parte liʼur husi templu. Maibé derrepente deʼit sira para no dada an. Ema judeu sira neʼebé kontra governu sente kontente no duni tuir tropa Roma sira. No bainhira ema judeu kontradór sira no tropa Roma sai husi sidade, ema kristaun sira halo tuir Jesus nia avizu hodi sai husi Jeruzalein, hakur Mota Jordaun no bá foho sira.​—Mateus 24:15, 16.

Tinan tuirmai, Jenerál Roma ida naran Vespasiano no ninia oan-mane Tito halo planu atu ataka fali Judeia. Maibé liutiha tempu balu, iha tinan 68 liutiha Kristu Liurai Nero mate, entaun Vespasiano tenke fila fali ba Roma atu sai nuʼudar liurai, tan neʼe nia entrega planu atu ataka Judeia ba ninia oan-mane Tito no tropa naʼin–60.000.

Iha fulan-Juñu tinan 70 liutiha Kristu. Tito haruka ninia soldadu sira atu taa ai-hun hotu iha Judeia nia foho sira, no sira uza ai sira-neʼe nuʼudar lutu neʼebé naruk kilómetru 7 atu haleʼu Jeruzalein. Iha fulan-Setembru, soldadu Roma domina sidade no sunu tiha sidade hamutuk ho templu no harahun templu nia moru ba pedasuk, hanesan buat neʼebé Jesus hatete nanis ona. (Lucas 19:43, 44) Matenek-naʼin balu kalkula katak “maizumenus ema naʼin–250.000 toʼo 500.000 mak mate iha sidade Jeruzalein no distritu Judeia tomak”.

UKUN ROMA MANÁN

Iha tinan 71 liutiha Kristu, Tito fila fali ba Itália no ema Roma simu nia ho laran-haksolok tebetebes. Ema hotu neʼebé iha sidade laran selebra ida-neʼe, neʼe mak selebrasaun ida neʼebé boot liu iha sidade kapitál.

Ema barak hobur atu haree buat neʼebé akontese iha Roma nia estrada boot sira. Ema bele haree ró boot sira, palku boot ho roda neʼebé enfeita ho buat oioin kona-ba funu, no sasán sira husi Jeruzalein nia templu.

Bainhira Vespasiano mate, Tito mak sai fali liurai iha tinan 79 liutiha Kristu. Maibé tinan rua liutiha, derrepente deʼit Tito mate. No ninia alin-mane, Domiciano mak troka fali ninia fatin atu sai nuʼudar liurai no nia harii monumentu ida atu hatudu respeitu ba Tito.

MONUMENTU TITO NIAN OHIN LORON

Monumentu Tito nian ohin loron

Ohin loron, ema rihun ba rihun neʼebé vizita Roma gosta tebes Monumentu Tito nian. Ema balu haree monumentu neʼe nuʼudar arte neʼebé furak tebetebes, ema seluk haree ida-neʼe nuʼudar liman-rohan husi Roma nia forsa no ema seluk tan haree ida-neʼe nuʼudar lembransa kona-ba Jeruzalein no ninia templu.

Ba ema barak neʼebé lee Bíblia, Monumentu Tito nian iha signifika seluk. Ida-neʼe hanesan evidénsia neʼebé hatudu katak Bíblia nia profesia sempre sai loos no hatudu ho klaru katak profesia neʼe mai duni husi Maromak.​—2 Pedro 1:19-21.