Skip to content

Skip to table of contents

Faʼan ema husi rai Áfrika atu sai fali atan iha Amérika mak negósiu neʼebé boot

Sai livre husi moris nuʼudar atan iha tempu uluk no agora

Sai livre husi moris nuʼudar atan iha tempu uluk no agora

Barbara * muda ba Europa tanba ema promete katak nia sei serbisu iha tesi fuuk fatin. Maibé ikusmai, sira baku nia durante loron sanulu, no ameasa nia katak sira sei halo violénsia ba ninia família se nia lakohi serbisu nuʼudar feto-aat.

Dezeñu kona-ba atan sira iha rai Ejitu antigu

Kalan-kalan, Barbara tenke faʼan an atu bele manán osan euro 200 toʼo 300 hodi selu fali debe hamutuk euro 40.000 ba ninia patraun. * Barbara esplika: “Haʼu hanoin beibeik atu halai, maibé haʼu taʼuk sira sei halo aat ba haʼu-nia família. Haʼu la bele halo buat ida.” Ohin loron iha mundu tomak, iha maizumenus ema naʼin-4.000.000 mak sai atan hanesan ho Barbara.

Maizumenus tinan 4.000 liubá, joven mane ida naran José mós hasoru situasaun susar. Ninia maun sira faʼan nia no nia sai atan iha ema-boot Ejitu ida nia uma. La hanesan ho Barbara, foufoun José nia patraun trata nia iha dalan neʼebé diʼak. Maibé ikusmai José tama komarka tanba patraun nia feen duun katak José koko atu estraga nia.—Gênesis (Kejadian) 39:1-20; Salmo (Mazmur) 105:17, 18.

Maski José mak atan ida iha tempu antigu no Barbara mak atan ida iha tempu modernu, maibé sira naʼin-rua mak vítima ba ema kaan-teen sira neʼebé faʼan ema hanesan sasán.

FUNU NO ATAN SIRA

Funu mak dalan neʼebé fasil liu ba nasaun sira atu hetan atan. Iha tempu antigu, Liurai Ejitu Tutmés III halo funu hasoru ema Kanaán no lori ba rai-Ejitu ema naʼin-90.000 nuʼudar atan. Ema Ejitu obriga ema Kanaán sira-neʼe atu keʼe rai, harii templu no halo bee-dalan sira.

Durante Roma nia ukun, ukun-naʼin sira lori atan barak husi nasaun neʼebé sira manán tiha,  no dala ruma sira halo funu hodi bele aumenta sira-nia atan. Iha tinan 100 liutiha Kristu, porsentu 50 husi populasaun iha sidade Roma mak atan. Ema Ejitu no Roma trata aat sira-nia atan. Porezemplu, atan neʼebé serbisu ba ema Roma hodi keʼe rai, maizumenus moris toʼo tinan 30 deʼit.

Dalan neʼebé ema trata atan sira aumenta aat ba beibeik. Maizumenus husi tinan 1500 toʼo tinan 1900, negósiu hodi faʼan ema husi rai Áfrika atu sai fali atan iha rai Amérika mak negósiu neʼebé boot tebes iha mundu tomak. Peskiza ida husi UNESCO fó sai katak durante tempu neʼe, ema naʼok no faʼan maizumenus ema naʼin-30.000.000, neʼe inklui mane, feto no mós labarik sira. Durante sira-nia viajen husi rai Áfrika toʼo Amérika, ema rihun ba rihun mak mate. Atan ida naran Olaudah Equiano esplika: “Haʼu rona feto sira hakilar no lian husi ema neʼebé besik atu iis kotu. Situasaun neʼe aat tebetebes.”

Halo negósiu atu faʼan ema mak problema toʼo ohin loron. Tuir Organizasaun Traballadór Internasionál (ILO), ohin loron mane, feto no labarik sira maizumenus naʼin-21.000.000 mak serbisu makaʼas nuʼudar atan ba oras barak ho kondisaun neʼebé la diʼak, no simu osan uitoan deʼit ka dala ruma la simu osan. Atan sira-neʼe serbisu nuʼudar feto-aat, serbisu atu keʼe rai, serbisu iha fábrika ropa nian ka bloku nian, ka serbisu iha ema nia uma. Maski ilegál, maibé ida-neʼe aumenta ba beibeik.

Ohin loron ema rihun ba rihun mak sai atan

HALAI ATU LIVRE

Atan barak halo funu hasoru sira-nia naʼi atubele sai livre. Iha tinan 73 molok Kristu, mane ida naran Espártaco hamutuk ho atan maizumenus naʼin-100.000 koko atu kontra hasoru Roma, maibé sira la hetan susesu. Antes tinan 1800, atan sira iha illa Hispaniola neʼebé serbisu iha toʼos-tohu komesa kontra hasoru sira-nia naʼi neʼebé trata aat sira. Sira halo funu durante tinan 13, toʼo ikusmai sira hetan independénsia nuʼudar nasaun Haití iha tinan 1804.

Povu Izraél hamutuk naʼin-3.000.000 mak hetan susesu neʼebé boot liu hodi sai livre husi moris nuʼudar atan iha rai-Ejitu. Bíblia esplika katak sira moris iha “situasaun neʼebé aat no halo serbisu oioin nuʼudar atan”. (Êxodo [Keluaran] 1:11-14) Liurai Ejitu ida mós haruka parteira sira atu oho ema Izraél nia bebé mane hotu hodi  povu Izraél labele aumenta barak liután.—Êxodo (Keluaran) 1:8-22.

Ema Izraél nia istória kona-ba sai livre husi rai-Ejitu mak úniku tebes, tanba Maromak rasik mak salva sira. Maromak dehan ba Moisés: “Haʼu hatene didiʼak kona-ba terus neʼebé sira hasoru. Haʼu sei tun ba neʼebá hodi salva sira.” (Êxodo [Keluaran] 3:7, 8) Toʼo ohin loron, tinan-tinan ema judeu iha mundu tomak komemora tempu importante neʼe.—Êxodo (Keluaran) 12:14.

TEMPU ATAN NIAN SEI LA IHA TAN

Bíblia esplika katak Maromak sempre hatudu justisa no nia nunka troka. (2 Crônicas [Tawarikh] 19:7; Malaquias [Maleakhi] 3:6) Maromak haruka Jesus atu “haklaken ba atan sira katak sira sei livre” no atu “halo livre ema neʼebé hetan terus”. (Lucas 4:18) Tuir loloos, eskritura neʼe koʼalia kona-ba ema nia kondisaun nuʼudar atan ba sala no mate. Maromak haruka Jesus atu halo ema livre husi sala no mate. Jesus hatete: “Lia-loos sei halo imi livre.” (João 8:32) Ohin loron, lia-loos neʼebé Jesus hanorin mós halo ema livre iha dalan oioin.—Haree kaixa “ Sai livre husi moris nuʼudar atan ba droga”.

Tuir loloos, Maromak ajuda duni José atu sai livre. Ita bele lee kona-ba neʼe iha livru Gênesis (Kejadian) kapítulu 39 toʼo 41. Barbara nia dalan atu sai livre husi moris nuʼudar atan mós úniku. Oinsá?

Barbara tenke sai husi rai ida iha Europa no nia bá rai-España. Iha neʼebá, nia hasoru Testemuña ba Jeová no komesa estuda Bíblia. Nia hakarak tebes atu moris ho morál neʼebé diʼak, tan neʼe nia troka ninia serbisu no husu ninia patraun atu hamenus osan neʼebé nia tenke selu fulan-fulan atu selu ninia debe. Loron ida, Barbara nia patraun telefone nia no hatete katak Barbara la presiza selu tan ninia debe, no nia mós husu perdua ba Barbara. Tanbasá? Afinál, patraun neʼe mós komesa estuda Bíblia ho Testemuña ba Jeová! Barbara dehan: “Lia-loos halo ita livre iha dalan oioin neʼebé kapás loos!”

Bainhira ema Ejitu haterus ema Izraél, neʼe halo Maromak Jeová sente triste tebes. Ohin loron, nia mós sente hanesan bainhira nia haree buat neʼebé la justu. Tan neʼe, Maromak promete atu halo mudansa boot. Bíblia dehan: “Tuir ninia promesa, ita hein lalehan foun no rai foun, no iha neʼebá sei iha nafatin hahalok loos.”—2 Pedro 3:13

^ par. 2 Naran neʼe laʼós naran neʼebé loos.

^ par. 3 Iha tempu neʼebá euro nia folin atu hanesan ho dolar Amerikanu.