Skip to content

Skip to table of contents

Hatudu laran-luak lori benefísiu boot

Hatudu laran-luak lori benefísiu boot

“BÍS bele bá, maibé mane Xina neʼe tenke hela!” Alexandra rona liafuan neʼe bainhira nia iha bís laran neʼebé atu liu fronteira entre rai rua iha Amérika Súl. Nia tun husi bís atu haree saida mak akontese. Mane joven Xina neʼe ladún hatene koʼalia lia-españól, maibé koko atu esplika ninia situasaun ba funsionáriu ida iha fronteira. Tanba Alexandra tuir kongregasaun língua Xina husi Testemuña ba Jeová, nia deside atu tradús bainhira sira koʼalia.

Mane Xina neʼe dehan katak ema hadau tiha ninia dokumentu no osan. Foufoun, funsionáriu imigrasaun deskonfia mane neʼe no mós Alexandra. Maibé ikusmai, funsionáriu fiar ba mane neʼe, no haruka nia atu selu multa tanba la lori dokumentu. Mane neʼe la iha osan, tan neʼe Alexandra fó-empresta osan $20. Mane neʼe sente agradese tebes no promete atu fó fali osan neʼebé boot liu. Alexandra esplika katak nia la hein atu simu kolen, maibé kontente deʼit atu ajuda. Nia mós fó ba mane neʼe livru balu kona-ba Bíblia no fó laran-manas atu estuda Bíblia ho Testemuña ba Jeová.

Bainhira ita rona istória kona-ba ema neʼebé hatudu laran-luak ba ema neʼebé sira la koñese, neʼe halo ita sente kontente. No klaru katak ema husi relijiaun hotu no sira neʼebé la iha relijiaun mós hatudu hahalok diʼak hanesan neʼe. Oinsá ho Ita? Ita kontente atu hatudu laran-luak ba ema seluk ka lae? Jesus hatete: “Kontente liu atu fó duké simu.” (Apóstolu 20:35) Tuir loloos, doutór sira mós hatete katak hahalok laran-luak sei lori diʼak ba ita-nia an.

“EMA NEʼEBÉ FÓ HO LARAN-HAKSOLOK”

Esperiénsia hatudu katak hahalok laran-luak iha relasaun metin ho haksolok. Apóstolu Paulo hakerek: “Maromak hadomi ema neʼebé fó ho laran-haksolok.” Paulo koʼalia kona-ba ema kristaun sira neʼebé ho laran-luak fó osan ba maluk fiar-naʼin neʼebé iha susar laran. (2 Korinto 8:4; 9:7) Paulo fó sai katak ema kristaun sira-neʼe sai kontente tanba sira bele hatudu laran-luak ba ema seluk.

Estudu ida fó sai katak bainhira ita hatudu laran-luak, neʼe sei book ita-nia kakutak atu sente kontente no haksolok. Estudu ida seluk fó sai katak “bainhira ema fó osan ba ema seluk, sira sente kontente liu duké uza osan neʼe ba sira-nia an rasik”.

Ita hanoin katak Ita-nia situasaun la permite atu fó buat ruma ba ema seluk ka lae? Tuir loloos, ema hotu bele sente kontente hodi sai “ema neʼebé fó ho laran-haksolok”. Maski prezente kiʼik deʼit, maibé se ita fó ho laran, ita bele sente kontente. Editora sira ba Livru Haklaken simu kontribuisaun hamutuk ho karta husi feto Testemuña ba Jeová ida. Karta neʼe hatete: “Ba tinan hirak-neʼe nia laran, buat neʼebé haʼu  bele halo mak tau osan uitoan iha kaixa kontribuisaun iha reuniaun-fatin.” Maski nuneʼe, nia hatutan tan: “Maromak Jeová fó fali buat barak liu fali osan neʼebé haʼu fó. . . . Obrigada barak tanba haʼu iha oportunidade atu fó ida-neʼe nuʼudar prezente. Neʼe halo haʼu sente kmaan.”

Tuir loloos, ita bele fó buat oioin ba ema seluk, laʼós deʼit osan.

HATUDU LARAN-LUAK BELE LORI SAÚDE DIʼAK

Hatudu laran-luak lori diʼak ba ema seluk no Ita-nia an rasik

Bíblia dehan: “Ema neʼebé laran-diʼak hetan buat diʼak ba ninia an, maibé ema neʼebé laran-aat sei lori problema ba ninia an rasik.” (Provérbios [Amsal] 11:17) Ema neʼebé laran-diʼak gosta fó sira-nia tempu, forsa no osan ba ema seluk no buka ema seluk nia diʼak. Ema hanesan neʼe ikusmai sei hetan benefísiu oioin, inklui mós saúde neʼebé diʼak.

Estudu hatudu katak, se ita ajuda ema seluk, ita bele iha saúde neʼebé diʼak no hamenus posibilidade atu sente moras no depresaun. Neʼe bele aplika mós ba ema neʼebé iha moras todan, inklui mós HIV. Nuneʼe mós ho tua-teen sira neʼebé hakaʼas an atu husik tua. Bainhira sira hatudu laran-luak, neʼe bele ajuda sira atu la sente depresaun no la fila fali ba toman neʼe.

Tanbasá mak hanesan neʼe? Estudu fó sai katak “sentimentu laran-sadiʼa, laran-diʼak no hanoin ema, bele ajuda ema nia kakutak atu la haburas hanoin neʼebé negativu”. Hodi hatudu laran-luak mós bele ajuda atu hamenus estrese no hatún tensaun. Liután neʼe, bainhira ema ida sente triste tebes tanba sai faluk, nia bele sente kontente fali lalais liu se nia hatudu laran-luak ba ema seluk.

Estudu sira-neʼe hatudu ho klaru katak hahalok laran-luak lori benefísiu ba ita.

NEʼE BOOK EMA SELUK ATU SAI LARAN-LUAK

Jesus hatete ba ninia dixípulu sira: “Fó ba ema seluk, no sira mós sei fó ba imi. Ho laran-diʼak sira sei fakar iha imi-nia bolsu, doko tan, hanehan tun, no sai nakonu liu. Basá buat neʼebé imi sukat ba ema, nuneʼe mós ema sei sukat ba imi.” (Lucas 6:38) Ita-nia hahalok laran-luak bele book ema seluk atu hatudu agradese no halo buat neʼebé hanesan. Ikusmai, neʼe sei hametin ita-nia relasaun diʼak ho ema seluk.

Hahalok laran-luak sei hametin Ita-nia relasaun diʼak ho ema seluk

Ema neʼebé estuda kona-ba relasaun umanu rekoñese katak “bainhira ema ida sempre ajuda ema seluk no hatudu laran-luak, ninia hahalok neʼe book ema seluk atu banati-tuir nia”. Tuir loloos, “hodi lee deʼit kona-ba ema ida nia hahalok laran-luak, neʼe mós bele book ita atu sai laran-luak”. Tan neʼe, “ema ida nia hahalok bele fó impaktu ba ema atus ba atus, inklui mós ema neʼebé nia la koñese”. Se ema barak liután  mak sai laran-luak, neʼe sei lori benefísiu boot tebes.

Mai ita hanoin kona-ba esperiénsia ida. Bainhira anin-boot estraga uma barak iha Florida, Estadus Unidus Amérika, grupu ida husi Testemuña ba Jeová bá neʼebá atu hadiʼa maluk sira-nia uma. Bainhira grupu neʼe hein hela materiál uma nian, sira haree katak viziñu ida nia moru sai aat ona, tan neʼe sira hadiʼa moru neʼe. Liutiha tempu balu, viziñu mane neʼe hakerek karta ba sede-jerál husi Testemuña ba Jeová, hodi dehan: “Haʼu sente agradese nafatin ba sira. Haʼu nunka hasoru ema neʼebé diʼak tebes hanesan sira.” Tanba sente agradese tebes, nia haruka osan kontribuisaun atu apoia Testemuña sira-nia serbisu.

BANATI-TUIR EZEMPLU NEʼEBÉ DIʼAK LIU HOTU

Estudu ida fó sai katak “ema moris mai iha ona hakarak atu ajuda ema seluk”. Tuir estudu neʼe, labarik sira neʼebé seidauk hatene koʼalia mós hatudu laran-luak ba ema seluk. Tanbasá? Bíblia hatete katak Maromak kria ema tuir “ninia ilas”. Neʼe katak ema moris mai iha nanis hahalok hanesan Maromak nian.—Gênesis (Kejadian) 1:27.

Ita-nia Kriadór Maromak Jeová nia hahalok furak ida mak laran-luak. Nia fó ita moris no buat hotu neʼebé ita presiza atu moris kontente. (Apóstolu 14:17; 17:26-28) Hodi estuda Maromak nia Liafuan Bíblia, ita bele hatene didiʼak ita-nia Aman iha lalehan no mós ninia hakarak ba ita. Ita mós bele hatene kona-ba buat neʼebé Maromak halo ona ba ita atu ita bele moris kontente iha futuru. * (1 João 4:9, 10) Sin, Jeová mak Maromak neʼebé laran-luak no nia kria ita tuir ninia ilas. Tan neʼe, se ita banati-tuir Maromak nia laran-luak, neʼe sei lori diʼak ba ita no halo Maromak kontente.—Ebreu 13:16.

Ita sei hanoin-hetan Alexandra ka lae? Bainhira nia ajuda mane Xina neʼe, ema seluk iha bís laran hatete katak nia estraga deʼit ninia osan. Maibé toʼo tiha iha sidade tuirmai, mane Xina neʼe kontaktu lalais ninia kolega sira no fó fali $20. Liután neʼe, mane neʼe mós hahú estuda Bíblia hodi halo tuir Alexandra nia sujestaun. Liutiha fulan tolu, bainhira Alexandra asiste Testemuña ba Jeová nia reuniaun boot língua Xina nian iha rai-Perú, nia hasoru fali mane neʼe. Hodi hatudu agradese ba Alexandra nia laran-diʼak, mane neʼe konvida Alexandra no ninia kolega sira atu han iha ninia restaurante.

Hatudu laran-luak no ajuda ema seluk lori haksolok boot mai ita. Oinsá tan se ita ajuda ema seluk atu hatene didiʼak kona-ba Maromak Jeová! (Tiago 1:17) Ita rasik hetan haksolok daudaun hodi hatudu laran-luak ka lae?

^ par. 21 Atu hetan informasaun liután, haree livru Tuir Loloos, Saida mak Bíblia Hanorin? Livru neʼe husi Testemuña ba Jeová no ita mós bele lee online iha sítiu www.jw.org/tdt. Klik LIVRU & VÍDEO > LIVRU & BROXURA SIRA.