Skip to content

Skip to table of contents

Ema kristaun tenke bá fatin santu atu adora Maromak ka lae?

Ema kristaun tenke bá fatin santu atu adora Maromak ka lae?

TINAN-TINAN, ema naʼin-6.000.000 liu mak halo viajen ba ai-laran tuan ida iha área Shima iha rai-Japaun. Sira halo nuneʼe atu bá vizita fatin santu ida naran Ise husi relijiaun xinto, neʼebé ema uza ba tinan 2.000 nia laran ona hodi adora sira-nia maromak-feto loro-matan nian naran Amaterasu Omikami. Bainhira toʼo iha fatin neʼe, sira presiza hamoos an hodi fase sira-nia liman no ibun. Tuirmai, sira hamriik iha fatin adorasaun nia oin, hakruʼuk, basa liman, no harohan ba maromak-feto neʼe. * Maibé ema neʼebé tuir relijiaun xinto, iha tempu hanesan, sira mós bele halaʼo adorasaun husi relijiaun sira seluk, hanesan buda ka kristaun.

Relijiaun barak iha ida-idak nia fatin santu sira, * no ema barak hakaʼas an atu bá vizita fatin sira-neʼe. Relijiaun kristaun mós iha igreja ka gruta neʼebé dedika ona ba Jesus, Maria, ka santu-santa sira. Liután neʼe, iha mós fatin istóriku sira neʼebé temi iha Bíblia, no mós fatin sira neʼebé ema fiar katak “milagre” ida mosu, ka fatin sira neʼebé rai sasán santu ruma. Ema barak bá vizita fatin sira-neʼe tanba sira fiar katak Maromak sei rona kedas ba orasaun neʼebé sira hatoʼo iha neʼebá. No iha mós ema neʼebé fiar katak neʼe mak dalan neʼebé sira fó sai sira-nia laran-metin.

Ema neʼebé vizita fatin santu ba relijiaun xinto, Ise, rai-Japaun, no Gruta Massabielle, Lourdes, rai-Fransa

Entaun, Maromak sei rona kedas orasaun neʼebé hatoʼo iha fatin santu sira-neʼe ka lae? Ita bele halo Maromak kontente se ita halo viajen dook ba fatin sira-neʼe ka lae? Ema kristaun presiza bá fatin espesiál ruma atu adora Maromak ka lae? Resposta ba pergunta sira-neʼe sei ajuda ita atu komprende kona-ba adorasaun neʼebé mak monu loos ba Maromak nia laran.

ADORA “HO ESPÍRITU NO LIA-LOOS”

Jesus nia liafuan ‘adora Maromak ho espíritu no lia-loos’, neʼe katak sá?

Hanoin toʼok kona-ba tempu neʼebé Jesus koʼalia ho feto samaritana ida, tanba neʼe sei ajuda ita atu hatene Maromak nia haree kona-ba adorasaun iha fatin santu sira. Jesus laʼo liuhusi Samaria no deskansa uitoan iha bee-matan ida neʼebé besik sidade Sikar. Tuirmai Jesus hahú koʼalia ho feto samaritana ida neʼebé mai atu kuru bee. Nuʼudar sira koʼalia hela, feto neʼe hatete ba Jesus katak ema judeu ho ema samaritanu nia adorasaun la hanesan, hodi dehan: “Ami-nia beiʼala sira halo adorasaun iha foho neʼe; maibé imi dehan  katak iha Jeruzalein deʼit mak fatin atu ema halo adorasaun.”—João 4:5-9, 20.

Foho neʼebé feto neʼe temi mak Foho Gerizím, dook husi Jeruzalein maizumenus kilómetru 50. Iha foho neʼe, ema samaritanu sira harii templu ida no halaʼo selebrasaun oioin hanesan loron neʼebé sira-nia beiʼala sira sai husi rai-Ejitu. Jesus hatán ba feto neʼe nia liafuan, hodi dehan: “Fiar haʼu bá: Loron sei toʼo mai bainhira imi la presiza tan atu adora Aman iha foho neʼe no mós iha Jeruzalein.” (João 4:21) Liafuan neʼe halo feto neʼe hakfodak tebes, liuliu tanba Jesus nuʼudar ema judeu ida mak hatete nuneʼe! Maibé tanbasá mak adorasaun iha templu Jeruzalein sei ramata?

Jesus hatutan tan: “Tempu besik ona, no neʼe mak agora, kuandu ema neʼebé adora Maromak iha dalan loos sei adora Aman ho espíritu no lia-loos, basá Aman buka ema sira hanesan neʼe atu adora nia.” (João 4:23) Ba tinan atus ba atus ona, ema judeu fiar katak templu iha Jeruzalein mak sira-nia fatin adorasaun. Tinan ida dala tolu, sira halo viajen ba templu neʼe atu hasaʼe sakrifísiu ba Maromak Jeová. (Êxodo [Keluaran] 23:14-17) Maibé Jesus hatete katak arranju hotu neʼe sei troka no “ema neʼebé adora Maromak iha dalan loos” sei adora Nia “ho espíritu no lia-loos”.

Ema judeu sira-nia templu mak uma boot ida neʼebé harii iha Jeruzalein. Maibé “espíritu ho lia-loos”, ema nia matan la bele haree, no neʼe laʼós buat neʼebé hamriik metin iha fatin ruma. Entaun, Jesus nia liafuan neʼe hatudu katak ema kristaun loos nia adorasaun sei la depende ba fatin ruma. Porezemplu, adora Maromak iha Foho Gerizím ka iha templu Jeruzalein, ka fatin seluk, neʼe la iha diferénsia ida.

Jesus mós dehan katak “tempu besik ona” atu halo mudansa kona-ba dalan neʼebé ema adora Maromak. Tempu neʼe bainhira? Neʼe mak tempu neʼebé Jesus saran ninia moris nuʼudar sakrifísiu, tanba ida-neʼe halo ramata adorasaun neʼebé tuir Moisés nia Ukun-Fuan. (Roma 10:4) Maibé Jesus mós dehan: “Neʼe mak agora.” Tanbasá? Tanba nuʼudar Mesias, Jesus hahú halibur ona ema neʼebé halo tuir ninia liafuan tuirmai neʼe: “Maromak mak espíritu, no sira neʼebé adora nia tenke adora ho espíritu no lia-loos.” (João 4:24) Entaun, adora ho espíritu no lia-loos, neʼe katak sá?

Jesus nia liafuan “adora ho espíritu”, neʼe la koʼalia kona-ba adora ho ita-nia espíritu badinas ka laran-manas. Maibé espíritu neʼe refere ba Maromak nia espíritu santu, neʼebé ajuda ita atu  halo buat neʼebé loos, inklui atu komprende didiʼak Ninia Liafuan Bíblia. (1 Korinto 2:9-12) No lia-loos neʼebé Jesus temi mak koñesimentu neʼebé loos kona-ba Bíblia nia hanorin. Sin, Maromak sei simu ita-nia adorasaun bainhira ita halo tuir Bíblia nia hanorin no hetan ajuda husi espíritu santu. Neʼe la depende ba fatin espesiál ruma.

EMA KRISTAUN NIA HAREE BA FATIN SANTU SIRA

Se nuneʼe, ema kristaun nia haree kona-ba adorasaun iha fatin santu sira tenkesér oinsá? Jesus nia liafuan neʼebé haruka ninia dixípulu sira atu adora ho espíritu no lia-loos, neʼe hatudu ho klaru katak ita-nia Aman Maromak la haree fatin ida espesiál liu fali fatin seluk. Liután neʼe, Maromak nia Liafuan haruka ita atu “halai husi adora estátua” no “hadook an husi estátua”. (1 Korinto 10:14; 1 João 5:21) Tan neʼe, ema kristaun neʼebé loos la halaʼo sira-nia adorasaun ba Maromak iha fatin neʼebé ema dehan “santu”, ka fatin neʼebé apoia adorasaun ba estátua ka sasán santu sira.

Maibé Maromak nia Liafuan mós la bandu ita atu iha fatin neʼebé ita gosta bá hodi halo orasaun, estuda ka hanoin kleʼan kona-ba Maromak. Fatin ida atu halaʼo reuniaun mós bele ajuda ita aprende liután kona-ba Maromak. Liután neʼe, la sala atu halo rate ba ema neʼebé mate ona. Neʼe atu fó-hanoin deʼit kona-ba ema neʼebé mate ona ka hatudu sai deʼit ita-nia domin ba ema neʼe. Maibé, se ita hanoin katak fatin ka sasán hanesan neʼe mak santu, neʼe kontra duni Jesus nia liafuan.

Tan neʼe, ita la presiza bá fatin neʼebé ema dehan “santu” atu Maromak bele rona kedas ita-nia orasaun. Maromak mós la fó bensaun espesiál ruma ba ema neʼebé hakaʼas an halo viajen ba fatin sira-neʼe. Tuir Bíblia, Maromak Jeová mak “Maromak neʼebé halo mundu no buat hotu neʼebé iha nia” no Nia “la hela iha templu neʼebé ema nia liman mak halo”. Maibé neʼe la hanetik ita atu hakbesik ba Maromak. Iha fatin naran deʼit, nia sei rona duni ita-nia orasaun tanba “nia la dook husi ita ida-idak”.—Apóstolu 17:24-27.

^ par. 2 Sira iha dalan oioin atu harohan ba maromak sira husi relijiaun xinto nian, no neʼe depende ba sira-nia fatin santu ida-idak.

^ par. 3 Haree kaixa “ Fatin santu sira” iha pájina 10.