Skip to content

Skip to table of contents

Lia-loos kona-ba Maromak no Kristu

Lia-loos kona-ba Maromak no Kristu

Maski ema adora maromak barak, maibé iha Maromak loos ida deʼit. (João 17:3) Nia mak “Ida neʼebé Aas Liu”, Kriadór ba buat hotu, no moris nia hun. Nia deʼit mak merese simu ita-nia adorasaun.—Daniel 7:18; Apokalipse 4:11.

Sé mak Maromak?

Maromak nia naran mosu iha testu testu orijinál MAIZUMENUS DALA 7.000

JEOVÁ Maromak nia naran

NAʼI, AMAN, MAROMAK​—Jeová nia títulu balu

Maromak nia naran saida? Maromak rasik hatete: “Haʼu mak Jeová. Neʼe mak haʼu-nia naran.” (Isaias 42:8) Maromak nia naran mosu maizumenus dala 7.000 iha Bíblia. Maibé tradusaun Bíblia barak halo sala hodi troka naran neʼe ho títulu, hanesan “Naʼi”. Maromak hakarak ita sai ninia belun, tan neʼe, nia anima ita atu “bolu ninia naran”.​—Salmo 105:1.

Jeová nia títulu sira. Bíblia dala ruma uza títulu sira atu koʼalia kona-ba Jeová, hanesan “Maromak”, “Kbiit Boot Liu Hotu”, “Kriadór”, “Aman”, “Naʼi” no “Ukun-Naʼin Boot Liu”. Bíblia temi orasaun barak, no ema neʼebé hatoʼo orasaun sira-neʼe koʼalia ba Jeová hodi uza títulu no mós ninia naran rasik.​—Daniel 9:4.

 Maromak hanesan saida? Maromak mak espíritu neʼebé matan labele haree. (João 4:24) Bíblia dehan katak “ema ida seidauk haree Maromak”. (João 1:18) Bíblia fó sai kona-ba Maromak nia sentimentu sira. Ema bele halo nia sente triste ka halo nia kontente.​—Provérbios 11:20; Salmo 78:40, 41.

Maromak nia hahalok furak sira. Maromak la todan ba sorin kona-ba ema husi nasaun, rasa no suku hotu. (Apóstolu 10:34, 35) Nia mós “laran-sadiʼa no laran-diʼak, la hirus lalais no nakonu ho domin neʼebé laran-metin no lia-loos”. (Éxodo 34:6, 7) Maibé Maromak iha hahalok haat neʼebé furak liu.

Kbiit. Tanba Maromak mak “Kbiit Boot Liu Hotu”, neʼe katak nia iha kbiit atu kumpre buat naran deʼit neʼebé nia promete.​—Génesis 17:1.

Matenek. Maromak nia matenek mak boot liu kriatura seluk nian. Bíblia dehan katak “Maromak mesak deʼit mak matenek”.​—Roma 16:27.

Justisa. Maromak sempre halo buat neʼebé loos. Ninia hahalok sira hotu “perfeitu” no nia “sempre hatudu justisa”.​—Deuteronómio 32:4.

Domin. Bíblia la dehan deʼit katak Maromak hatudu domin, maibé mós dehan katak “Maromak mak domin”. (1 João 4:8) Ninia domin neʼebé boot liu mak book nia atu halo buat hotu. Ninia domin mós lori benefísiu ba ita iha dalan oioin.

Maromak nia relasaun ho ema. Maromak mak ita-nia Aman iha lalehan neʼebé hadomi ita. (Mateus 6:9) Se ita tau fiar ba nia, ita bele sai ninia belun. (Salmo 25:14) Tuir loloos, Maromak konvida ita atu hakbesik nia iha orasaun no atu ‘entrega ita-nia laran-susar hotu ba nia, tanba nia hanoin ita’.​—1 Pedro 5:7; Tiago 4:8.

Oinsá mak Maromak no Kristu la hanesan?

Jesus laʼós Maromak. Jesus mak úniku tanba só nia mak Maromak kria rasik. Tan neʼe mak Bíblia bolu nia nuʼudar Maromak nia Oan. (João 1:14) Depois kria tiha Jesus, Maromak Jeová uza ninia Oan neʼe nuʼudar “badaen neʼebé matenek” atu kria buat seluk hotu, inklui mós anju no ema.​—Provérbios 8:30, 31; Koloso 1:15, 16.

 Jesus nunka hatete katak nia mak Maromak. Nia hatete: “Haʼu mai hodi reprezenta [Maromak], no nia mak haruka haʼu mai.” (João 7:29) Bainhira Jesus koʼalia ba ninia dixípulu, Jesus bolu Jeová, “haʼu-nia Aman no imi-nia Aman” no “haʼu-nia Maromak no imi-nia Maromak”. (João 20:17) Bainhira Jesus mate, Jeová halo nia moris-hiʼas no fó ba nia kbiit iha Jeová nia liman-loos.​—Mateus 28:18; Apóstolu 2:32, 33.

Jesus bele ajuda ita hakbesik ba Maromak

Jesus mai mundu atu hanorin ita kona-ba ninia Aman. Jeová rasik dehan kona-ba Jesus: “Neʼe mak haʼu-nia Oan-Mane neʼebé haʼu hadomi. Rona nia bá.” (Marcos 9:7) Jesus koñese Maromak diʼak liu fali kriatura seluk. Jesus dehan: “La iha ema ida mak hatene Aman, só Oan-Mane deʼit no mós ema neʼebé Oan-Mane hakarak hanorin kona-ba Aman.”​—Lucas 10:22.

Jesus haleno ho loloos Maromak nia hahalok sira. Jesus haleno ho didiʼak ninia Aman nia hahalok sira hotu, tan neʼe nia dehan: “Ema neʼebé haree ona haʼu, haree ona mós Aman.” (João 14:9) No hodi hatudu ida-neʼe liuhusi buat neʼebé Jesus halo no koʼalia, nia ajuda ema atu hakbesik ba Maromak. Nia dehan: “Haʼu mak dalan no lia-loos no moris. Ema ida labele hakbesik ba Aman se la liu husi haʼu.” (João 14:6) Nia mós dehan: “Ema neʼebé adora Aman iha dalan loos sei adora ho espíritu no lia-loos, tanba Aman buka ema sira hanesan neʼe atu adora nia.” (João 4:23) Jeová buka ema hanesan Ita neʼebé hakarak hatene lia-loos kona-ba nia.