Skip to content

Skip to table of contents

Tanbasá importante atu hatene kona-ba Maromak?

Tanbasá importante atu hatene kona-ba Maromak?

Toʼo agora, ita lee ona informasaun sira neʼebé bele ajuda ita atu hatán pergunta, sé mak Maromak neʼebé loos? Ita hahú hodi aprende husi Bíblia katak Maromak nia naran mak Jeová no ninia hahalok neʼebé boot liu mak domin. Ita mós lee ona informasaun kona-ba buat neʼebé Maromak halo ona no buat neʼebé nia sei halo ba ema nia diʼak. Maski iha buat barak tan neʼebé ita presiza aprende kona-ba Maromak, karik ita hanoin tanbasá importante ba ita atu aprende liután kona-ba Maromak.

Jeová promete katak “se ó buka nia, ó sei hetan nia”. (1 Krónikas 28:9) Hanoin toʼok kona-ba prezente furak liu neʼebé Ita sei hetan kuandu Ita buka-hatene no aprende kona-ba Maromak, Ita bele “sai belun diʼak ho nia”! (Salmo 25:14) Tanbasá habelun ho Jeová mak importante ba Ita?

Kontente neʼebé loos. Jeová mak “Maromak neʼebé kontente”. (1 Timóteo 1:11) Hodi hakbesik ba nia no banati-tuir nia sei halo Ita sente kontente, no neʼe diʼak ba Ita-nia saúde. (Salmo 33:12) Ita mós bele iha moris neʼebé kontente hodi hadook an husi toman aat sira, no mantein relasaun diʼak ho ema seluk. Karik Ita mós konkorda ho salmu nia hakerek-naʼin ida neʼebé hatete: “Hakbesik ba Maromak mak diʼak mai haʼu.”​—Salmo 73:28.

Nia hanoin no tau matan Ita. Jeová promete ba ninia atan sira: “Haʼu sei haree ba ó bainhira haʼu fó konsellu ba ó.” (Salmo 32:8) Jeová hanoin no tau matan ba ninia atan ida-idak. (Salmo 139:1, 2) Bainhira Ita iha relasaun neʼebé diʼak ho Jeová, Ita sei haree rasik katak nia sempre apoia Ita.

Futuru neʼebé furak. Jeová ajuda Ita atu iha moris neʼebé kontente agora, nia mós loke dalan ba Ita atu iha futuru neʼebé furak tebes. (Isaias 48:17, 18) Bíblia hatete: “Neʼe mak moris rohan-laek: Katak sira hatene didiʼak kona-ba Ita, Maromak loos mesak deʼit, no mós Jesus Kristu neʼebé Ita haruka mai.” (João 17:3) Iha tempu susar neʼe, esperansa ba futuru neʼebé Maromak promete mak hanesan ankor neʼebé halo ita “loos no metin”.​—Ebreu 6:19.

Neʼe mak razaun balu neʼebé importante atu hatene didiʼak Maromak no haburas relasaun diʼak ho nia. Atu hatene informasaun liután, Ita bele hakbesik no koʼalia ba Testemuña ba Jeová ruma ka loke ami-nia sítiu www.jw.org/tdt.