Skip to content

Skip to table of contents

Saida mak Maromak sei halo?

Saida mak Maromak sei halo?

Bainhira iha susar laran, Ita la duvida katak Ita-nia belun diʼak ida sei ajuda. Karik ema balu hanoin katak Maromak laʼós belun ida tanba Maromak la halo buat ruma atu ajuda sira. Maibé, realidade mak Maromak halo ona buat barak ba ita-nia diʼak, laʼós neʼe deʼit, nia mós sei halo buat ruma ba problema no terus hotu neʼebé ita hasoru ohin loron. Saida mak Maromak sei halo?

HALAKON BUAT AAT HOTU

Maromak sei halakon hun ba buat aat hotu. Bíblia fó sai kona-ba buat aat nia hun bainhira hatete: “Aat-naʼin mak domina mundu tomak.” (1 João 5:19) “Aat-naʼin” mak Diabu Satanás neʼebé Jesus bolu nuʼudar “ukun-naʼin mundu neʼe nian”. (João 12:31) Satanás mak hun ba susar no problema hotu iha mundu neʼe. Saida mak Maromak sei halo?

Maromak Jeová sei uza ninia Oan-Mane, Jesus Kristu atu ‘halakon Diabu’. (Ebreu 2:14; 1 João 3:8) Tuir loloos, Bíblia hatudu katak Diabu hatene “ninia tempu hela uitoan deʼit ona” atu nia lakon. (Apokalipse 12:12) Maromak mós sei halakon buat aat hotu no mós sira neʼebé halo hahalok aat.​—Salmo 37:9; Provérbios 2:22.

HALO MUNDU SAI PARAÍZU

Depois halakon tiha buat aat hotu iha mundu, ita-nia Kriadór sei kumpre ninia hakarak ba ema atu iha moris perfeitu ba nafatin iha mundu. Buat diʼak saida mak sei akontese?

Moris seguru no dame. “Ema laran-maus sei simu rai nuʼudar sira-nian, no sira sei hetan ksolok boot ho dame neʼebé barak.”​—Salmo 37:11.

Iha hahán barak. “Sei iha ai-han barak iha rai; foho-tutun sira sei nakonu ho ai-han.”​—Salmo 72:16.

Iha uma no serbisu. “Sira sei harii uma no hela iha laran, no sira sei kuda uvas iha toʼos no han ninia fuan. . . . Sira neʼebé haʼu hili ona sei haksolok duni ho serbisu neʼebé sira halo ho sira-nia liman.”​—Isaias 65:21, 22.

Ita hakarak haree mundu sai hanesan neʼe ka lae? Lakleur tan, ita hotu sei goza moris hanesan neʼe loroloron.

HALAKON MORAS NO MATE

Ohin loron, ema barak sai moras no mate, maibé ida-neʼe sei la akontese tan. Maromak sei ajuda ninia povu atu hetan bensaun liuhusi Jesus nia sakrifísiu atu nuneʼe “ema hotu neʼebé hatudu fiar ba nia sei la lakon, maibé hetan moris rohan-laek”. (João 3:16) Rezultadu mak saida?

La iha tan moras. “La iha ema ida iha rai mak sei dehan: ‘Haʼu moras.’ Povu neʼebé hela iha rai neʼe sei hetan duni perdua ba sira-nia sala.”​—Isaias 33:24.

Ema sei la mate tan. “Nia sei halakon mate ba nafatin, no Jeová, Naʼi Ukun-Naʼin Boot Liu, sei hamaran matan-been husi ema hotu nia oin.”​—Isaias 25:8.

Ema sei moris ba nafatin. “Prezente neʼebé Maromak fó mak moris rohan-laek liuhusi Kristu Jesus ita-nia Naʼi.”​—Roma 6:23.

Ema mate sei moris fila fali. “Maromak sei fó moris-hiʼas ba ema neʼebé hatudu hahalok loos no mós ema neʼebé hatudu hahalok la loos.” (Apóstolu 24:15) Ema sei hetan benefísiu neʼe tanba Jesus nia sakrifísiu.

Oinsá mak Maromak sei kumpre buat sira-neʼe hotu?

 MAROMAK NIA UKUN SEI HAMRIIK BA NAFATIN

Maromak sei kumpre ninia hakarak ba ema no mundu liuhusi ninia Ukun iha lalehan, ho Jesus Kristu nuʼudar Liurai. (Salmo 110:1, 2) Neʼe mak governu ka ukun ida neʼebé Jesus hanorin ba ninia dixípulu sira: “Ami Aman iha lalehan, . . . halo Ita-nia Ukun toʼo mai rai.”​—Mateus 6:9, 10.

Maromak sei uza ninia Ukun atu halakon terus no susar hotu iha mundu tomak. Neʼe mak governu neʼebé diʼak liu hotu! Tan neʼe mak Jesus hakaʼas an atu haklaken “liafuan diʼak kona-ba Maromak nia Ukun” durante ninia serbisu haklaken iha mundu no nia mós hanorin ninia dixípulu sira atu halo buat neʼebé hanesan.​—Mateus 4:23; 24:14.

Tanba ninia domin neʼebé boot tebes ba ita, Maromak Jeová promete atu kumpre buat furak sira-neʼe. Ida-neʼe book Ita atu hakarak hatene didiʼak nia no hakbesik ba nia ka lae? No benefísiu saida mak Ita sei hetan? Informasaun tuirmai sei esplika liután.

SAIDA MAK MAROMAK SEI HALO? Maromak sei halakon moras no mate, ema sei moris ho unidade iha ninia Ukun okos, no mundu sei sai paraízu