Skip to content

Skip to table of contents

Maromak nia hahalok hanesan saida?

Maromak nia hahalok hanesan saida?

Bainhira ita aprende liután kona-ba ema ida nia hahalok, ita koñese ema neʼe diʼak liu, no ita-nia relasaun nuʼudar belun sai metin liu. Nuneʼe mós se ita aprende liután kona-ba Jeová nia hahalok diʼak sira, ita hatene nia mak hanesan saida, no ita-nia relasaun nuʼudar belun sai metin liu. Husi Maromak nia hahalok furak sira, iha hahalok haat neʼebé kmanek liu: ninia kbiit, matenek, justisa no domin.

MAROMAK IHA KBIIT BOOT

“Jeová, Naʼi Ukun-Naʼin Boot Liu! Ita-Boot halo lalehan no rai ho Ita-nia kbiit boot.”​JEREMIAS 32:17.

Ita bele haree Maromak nia forsa liuhusi kriasaun sira. Porezemplu, bainhira hamriik iha loron manas, Ita sente oinsá? Ita sente manas. Tuir loloos, Ita sente daudaun rezultadu husi Jeová nia forsa. Saida mak ita hatene kona-ba loro-matan nia forsa? Parte kiʼik husi loro-matan mak manas tebetebes, maizumenus grau 15.000.000 Celcius. Kada segundu ida, loro-matan hasai enerjia neʼebé makaʼas hanesan bomba nukleár millaun ba millaun.

Tuir loloos, husi fitun millaun ba millaun iha ita-nia universu, iha fitun barak mak boot liu fali ita-nia loro-matan. Sientista sira hatete katak fitun neʼebé boot liu hotu mak naran UY Scuti, nia luan maizumenus dala 1.700 liu fali ita-nia loro-matan. Se UY Scuti troka fatin ho ita-nia loro-matan, nia sei taka tomak mundu toʼo liu planeta Júpiter. Informasaun neʼe ajuda ita komprende  liután Jeremias nia liafuan katak Maromak Jeová kria lalehan no rai ka universu ho ninia kbiit boot.

Benefísiu saida mak ita hetan husi Maromak nia kbiit? Ita-nia moris depende ba kriasaun seluk, hanesan loro-matan, ai-horis, bee no buat seluk tan. Maromak mós uza ninia kbiit atu ajuda ema iha dalan fíziku. Oinsá? Iha apóstolu sira-nia tempu, Maromak fó Kbiit ba Jesus atu halo milagre furak oioin. Eskritura dehan: “Agora ema matan-delek sira haree fali, ema ain-kudeʼik sira laʼo, ema moras-lepra sira sai moos, ema tilun-diuk sira rona, ema mate moris fali.” (Mateus 11:5) Oinsá ho ohin loron? Bíblia hatete: “Nia fó kbiit ba ema neʼebé kole.” Bíblia hatutan: “Ema neʼebé tau esperansa ba Jeová sei hetan fali kbiit.” (Isaias 40:29, 31) Maromak bele fó ba ita “kbiit neʼebé la hanesan baibain” atu ajuda ita tahan hasoru susar oioin iha ita-nia moris. (2 Korinto 4:7) Ita mós hakarak hakbesik ba Maromak domin nian neʼebé uza ninia kbiit ba ita-nia diʼak ka lae?

MAROMAK NIA MATENEK

“Oh Jeová, Ita-nia serbisu sira barak tebes! Ita halo buat sira-neʼe hotu ho matenek.”​SALMO 104:24.

Se ita aprende liután kona-ba buat neʼebé Maromak halo ona, ita sei admira ho Maromak nia matenek. Tuir loloos, sientista balu estuda kona-ba Jeová nia kriasaun no kopia tuir ida-neʼe atu inventa buat foun ka hadiʼa liután buat neʼebé sira inventa ona. Ita bele haree ida-neʼe husi ezemplu sira hanesan kámera nia lente ka aviaun nia modelu.

Ema nia matan mak kriasaun neʼebé furak tebes

Husi Maromak nia kriasaun hotu, kriasaun neʼebé furak liu mak ema nia isin-lolon. Porezemplu, hanoin toʼok kona-ba prosesu atu forma bebé iha inan nia knotak. Prosesu neʼe hahú ho sélula ida, sélula ida iha informasaun kompletu ka DNA. Tuirmai sélula ida-neʼe komesa fahe an no sai barak, maibé sira-nia modelu hanesan deʼit. Depois neʼe, sélula sira-neʼe bele forma fali sélula oioin neʼebé la hanesan, porezemplu sélula raan, sélula uat no sélula ruin. Tuirmai, sélula sira-neʼe komesa forma orgaun sira. Durante fulan sia deʼit, sélula ida deʼit bele forma bebé ho sélula millaun ba millaun iha ninia isin. Ida-neʼe book ema barak atu sente hanesan ho Bíblia nia hakerek-naʼin ida neʼebé hatete: “Haʼu hahiʼi Ita tanba Ita halo haʼu iha dalan neʼebé kmanek.”​—Salmo 139:14.

Benefísiu saida mak ita hetan husi Maromak nia matenek? Nuʼudar Kriadór, Maromak hatene buat neʼebé ita presiza atu bele kontente. Maromak uza ninia kbiit atu komprende no koñesimentu atu fó ita konsellu liuhusi ninia Liafuan Bíblia. Porezemplu, nia anima ita: “Kontinua . . . fó perdua ba malu ho laran tomak.” (Koloso 3:13) Konsellu neʼe diʼak ka lae? Sin. Doutór sira deskobre katak fó perdua bele ajuda ita toba diʼak, hamenus tensaun, no hamenus posibilidade atu kona moras depresaun no moras seluk. Maromak mak hanesan belun diʼak neʼebé matenek, nia sempre fó ajuda no konsellu neʼebé diʼak. (2 Timóteo 3:16, 17) Ita hakarak atu iha belun diʼak hanesan neʼe ka lae?

 MAROMAK NIA JUSTISA

“Jeohadomi justisa.”​—SALMO 37:28.

Maromak sempre halo buat neʼebé loos. Tuir loloos, “Maromak neʼebé loos nunka halo buat neʼebé aat, Ida neʼebé Kbiit Boot Liu Hotu nunka halo sala!” (Job 34:10) Maromak nia tesi-lia sempre loos, hanesan ema neʼebé hakerek salmu dehan ba Jeová: “Ita sei tesi-lia ba povu hodi la todan ba sorin.” (Salmo 67:4) Tanba “Jeová haree ema nia laran”, ema labele lohi Maromak, nia sempre hatene lia-loos no nia sei tesi-lia ho loloos. (1 Samuel 16:7) Laʼós neʼe deʼit, Maromak mós haree hahalok la justisa hotu neʼebé akontese iha mundu, no nia promete katak lakleur tan “ema aat . . . sei lakon husi rai.”​—Provérbios 2:22.

Maski nuneʼe, Maromak laʼós juís neʼebé gosta fó kastigu. Nia hatudu laran-sadiʼa iha tempu neʼebé loos. Bíblia hatete: “Jeová laran-sadiʼa no laran-diʼak”, maski ba ema aat sira, se sira arrepende an ho laran tomak. Neʼe hatudu justisa, loos ka lae?​—Salmo 103:8; 2 Pedro 3:9.

Benefísiu saida mak ita hetan husi Maromak nia justisa? Apóstolu Pedro hatete: “Maromak la todan ba sorin, no iha nasaun hotu, Maromak simu ema hotu neʼebé hamtaʼuk nia no halo buat neʼebé loos.” (Apóstolu 10:34, 35) Ita hetan benefísiu husi Maromak nia justisa tanba nia nunka todan ba sorin. Maromak simu ita hotu no ita bele sai ninia povu maski ita mai husi suku, rasa, língua, nasaun, situasaun no edukasaun neʼebé la hanesan.

Maromak la todan ba sorin, no rezultadu mak ita hotu bele hetan benefísiu husi ida-neʼe

Tanba Maromak hakarak ita atu komprende no hetan benefísiu husi ninia hahalok justisa, nia fó ba ita konxiénsia. Bíblia esplika katak konxiénsia mak ukun-fuan ida neʼebé ‘hakerek ona iha ita-nia laran’, no neʼe “fó sasin” bainhira ita halo hahalok neʼebé loos ka sala. (Roma 2:15) Oinsá ita bele hetan benefísiu? Treinu beibeik ita-nia konxiénsia, tanba ida-neʼe bele ajuda ita atu hadook an husi hahalok neʼebé perigu ka la loos. No kuandu  ita halo sala ida, konxiénsia bele book ita atu arrepende an no hadiʼa ita-nia hahalok. Importante liu mak hodi komprende Jeová ninia justisa ajuda ita atu hakbesik liután ba nia!

MAROMAK MAK DOMIN

“Maromak mak domin.”​1 JOÃO 4:8.

Maromak iha kbiit, matenek no justisa, maibé Bíblia la hatete katak Maromak mak kbiit, matenek ka justisa. Bíblia hatete katak Maromak mak domin. Tanbasá? Ho kbiit, Maromak bele halo buat oioin no ninia justisa no matenek mak dirije ninia dalan atu halo buat sira-neʼe. Maibé Jeová nia domin mak book nia atu halo buat sira-neʼe. Ita bele haree ninia domin husi buat hotu neʼebé nia halo.

Maski Jeová la presiza buat ruma, ninia domin book nia atu kria anju sira iha lalehan no ema iha rai, no sira hetan benefísiu husi ninia domin no laran-diʼak. Ho domin, nia kria mundu neʼebé úniku nuʼudar ema nia hela-fatin. No nia kontinua hatudu domin ba ema hotu hodi “halo loro-matan saʼe ba ema aat no mós ba ema diʼak, no halo udan tun ba ema laran-loos no mós ba ema aat”.​—Mateus 5:45.

Laʼós neʼe deʼit, “Jeová iha domin neʼebé boot tebes no laran-sadiʼa”. (Tiago 5:11) Nia hatudu ninia domin ba sira neʼebé ho hakarak rasik atu koñese no hakbesik ba nia. Maromak haree ema ida-idak. “Tuir loloos nia la dook husi ita ida-idak.”​—Apóstolu 17:27.

Benefísiu saida mak ita hetan husi Maromak nia domin? Ita bele haree loro-matan monu neʼebé furak. Ita kontente tanba rona bebé nia hamnasa. Ita haksolok tanba hafolin domin iha família laran. Maski ita-nia moris la depende ba buat sira-neʼe, maibé buat sira-neʼe aumenta ita-nia kontente.

Ita mós hetan benefísiu seluk husi Maromak nia domin, neʼe mak orasaun. Bíblia anima ita: “Keta hanoin resin kona-ba buat ida, maibé iha situasaun hotu husu ajuda husi Maromak liuhusi orasaun no harohan no mós fó agradese.” Hanesan aman ida neʼebé hatudu domin, nia hakarak ita husu ajuda ba nia bainhira hasoru problema. Tuirmai ho domin neʼebé la hanoin an deʼit, Jeová promete atu fó ba ita “dame neʼebé aas liu ema nia hanoin hotu”.​—Filipe 4:6, 7.

Informasaun kona-ba Maromak nia hahalok importante sira hanesan kbiit, matenek, justisa no domin ajuda Ita atu koñese liután nia ka lae? Atu hatudu liután Ita-nia agradese ba Maromak, ami konvida Ita atu aprende kona-ba buat neʼebé nia halo ona no buat neʼebé nia sei halo ba Ita-nia diʼak.

MAROMAK NIA HAHALOK HANESAN SAIDA? Se kompara ho kriasaun hotu, Jeová iha forsa boot tebes, justisa no matenek liu. Maibé ninia hahalok neʼebé boot liu hotu mak domin