Skip to content

Skip to table of contents

Importante atu komprende didiʼak Bíblia!

Importante atu komprende didiʼak Bíblia!

Labarik-feto ida haree suar neʼebé sai husi fábrika ida, no neʼe haree hanesan kalohan. Tan neʼe, nia hanoin katak fábrika neʼe mak fatin neʼebé halo kalohan. Labarik sira-nia hanoin neʼebé sala bele halo ita hamnasa tanba neʼe rona komik. Maibé, hanoin sala kona-ba buat neʼebé importante bele lori perigu ba ita-nia moris. Porezemplu, se ita komprende sala kona-ba oinsá atu uza ai-moruk ruma, ita bele hetan konsekuénsia neʼebé aat tebes.

Se ita iha hanoin sala kona-ba Maromak, neʼe mós bele lori perigu boot mai ita. Porezemplu iha tempu uluk, ema balu komprende sala Jesus nia hanorin, no ikusmai, duké buka-hatene liután, sira lakohi simu Jesus nia hanorin hotu. (João 6:48-68) Komprende sala halo sira lakon boot!

Se Ita toman ona atu lee Bíblia hodi buka Maromak nia matadalan, neʼe buat neʼebé diʼak tebes. Maibé problema mak dala ruma Ita bele komprende sala eskritura balu neʼebé Ita lee. Agora, mai ita koʼalia kona-ba eskritura tolu neʼebé ema barak komprende sala.

  • Ema balu neʼebé lee Bíblia nia mandamentu atu “taʼuk ba Maromak loos” komprende sala liafuan “taʼuk”, no hanoin katak sira presiza sente taʼuk tebetebes ba Maromak. (Eclesiastes [Pengkhotbah] 12:13) Maibé tuir loloos, Maromak lakohi ita atu sente hanesan neʼe. Nia dehan: “Keta taʼuk tanba haʼu hamutuk ho ó. Keta laran-taridu tanba haʼu mak ó-nia Maromak. Haʼu sei hametin ó, sin, haʼu sei ajuda ó.” (Isaías [Yesaya] 41:10) Tuir loloos, “taʼuk ba Maromak” signifika katak hatudu respeitu neʼebé kleʼan ba Maromak.

  • Mundu neʼe sei lakon mohu ho ahi ka lae?

    Ema balu hanoin sala kona-ba eskritura neʼebé dehan: “Iha tempu neʼebé hili tiha ona ba buat hotu, . . . tempu atu moris mai no tempu atu mate.” Sira hanoin katak Maromak mak deside nanis kona-ba ema ida-idak nia destinu. (Eclesiastes [Pengkhotbah] 3:1, 2) Maibé tuir loloos, eskritura neʼe esplika deʼit katak ita hotu neʼebé moris, ikusmai sei mate. Maromak nia Liafuan mós hanorin katak desizaun neʼebé ita halo bele lori rezultadu diʼak ka ladiʼak. Porezemplu, eskritura ida dehan: “Taʼuk ba Jeová sei hanaruk moris.” (Provérbios [Amsal] 10:27; Salmo [Mazmur] 90:10; Isaías [Yesaya] 55:3) Oinsá? Se ita hafolin Maromak nia Liafuan, neʼe sei book ita atu la hemu-lanu no la halo hahalok aat oioin, no neʼe ajuda duni ita atu hanaruk ita-nia moris.—1 Korinto 6:9, 10.

  • Bainhira lee eskritura neʼebé dehan katak “lalehan no mundu neʼebé iha agora marka tiha ona ba ahi”, ema balu komprende sala katak aban-bainrua Maromak sei halakon mundu neʼe. (2 Pedro 3:7) Maibé Maromak promete katak planeta mundu neʼe sei nunka lakon. Maromak “harii metin ona rai iha ninia hun leten; Rai neʼe sei la muda ba nafatin.” (Salmo [Mazmur] 104:5; Isaías [Yesaya] 45:18) Mundu neʼebé Maromak sei halakon ba nafatin mak ema aat sira, laʼós planeta mundu neʼe. No kuandu Bíblia temi liafuan “lalehan”, neʼe bele iha arti oioin, porezemplu lalehan neʼebé ita-nia matan haree, ka Maromak nia fatin. Maromak sei la husik lalehan atu lakon.

TANBASÁ MAK EMA BALU KOMPRENDE SALA BÍBLIA?

Hanesan Ita foin lee, dala ruma ema komprende sala eskritura balu husi Bíblia. Entaun, tanbasá mak Maromak husik buat neʼe akontese? Ema balu hanoin: ‘Se Maromak mak matenek liu hotu, nia bele fó informasaun oioin mai ita iha dalan neʼebé fasil ba ema atu komprende. Tansá mak Maromak la halo nuneʼe?’ Agora, mai ita haree  razaun tolu tansá mak ema balu komprende sala Bíblia.

  1. Maromak prepara Bíblia ba ema neʼebé haraik-an no hakarak aprende. Jesus hatete ba ninia Aman, hodi dehan: “Haʼu hahiʼi Ita-Boot iha ema nia oin, tanba Ita subar didiʼak buat sira-neʼe husi ema matenek sira, hodi fó sai ba labarik kiʼik sira.” (Lucas 10:21) Maromak leno ema atu hakerek Bíblia iha dalan neʼebé ema laran-moos deʼit mak bele komprende. Tan neʼe, “ema matenek sira” neʼebé baibain hatudu hahalok foti-an sei komprende sala Bíblia. Maibé ema neʼebé haraik-an hanesan “labarik kiʼik sira” no prontu atu aprende, sira bele komprende didiʼak liafuan husi Maromak. Bíblia hatudu katak Maromak iha matenek boot, loos ka lae?

  2. Bíblia mak livru ba ema neʼebé buka Maromak nia ajuda atu komprende. Jesus hatudu katak ema mós presiza hetan ajuda atu komprende buat neʼebé nia hanorin. Maibé oinsá? Jesus esplika: “Espíritu santu neʼebé Aman sei haruka ba imi hodi haʼu-nia naran, espíritu neʼe sei hanorin imi buat hotu.” (João 14:26) Maromak uza ninia espíritu santu, ka ninia forsa, atu ajuda ema atu komprende buat neʼebé sira lee iha Bíblia. Maibé Maromak sei la fó espíritu santu ba ema neʼebé la buka ajuda husi Nia, tan neʼe susar ba sira atu komprende Bíblia. Espíritu santu mós book ema kristaun sira atu ajuda ema neʼebé buka atu komprende liután Bíblia.—Apóstolu 8:26-35.

  3. Ita presiza hein toʼo tempu neʼebé loos atu komprende eskritura balu husi Bíblia. Porezemplu, anju ida haruka profeta Daniel atu hakerek Maromak nia mensajen kona-ba futuru, hodi dehan: “Daniel, rai liafuan sira-neʼe nuʼudar segredu, no tau selos hodi taka tiha livru neʼe toʼo tempu nia rohan.” Ba tinan atus ba atus, ema barak lee livru Daniel, maibé ladún komprende. Tuir loloos, Daniel rasik mós la komprende buat neʼebé nia hakerek. Nia ho haraik-an hakerek: “Haʼu rona, maibé haʼu la komprende.” Ikusmai, toʼo tiha tempu neʼebé Maromak hili ona mak ema sei komesa komprende liafuan sira neʼebé Nia fó-hatene nanis liuhusi Daniel. Anju neʼe esplika: “Laʼo bá, Daniel, tanba liafuan sira-neʼe tenke rai nuʼudar segredu no taka tiha ho selos toʼo tempu nia rohan.” Sé mak sei komprende Maromak nia liafuan sira-neʼe? Anju neʼe dehan: “La iha ema aat ida mak sei komprende; maibé sira neʼebé matenek mak sei komprende.” (Daniel 12:4, 8-10) Sin, toʼo tiha Maromak nia tempu neʼebé loos mak Nia ajuda ema atu komprende ho loloos eskritura balu husi Bíblia.

Dala ruma Testemuña ba Jeová mós komprende sala Bíblia tanba seidauk toʼo Maromak nia tempu atu husik ema komprende ninia liafuan. Maibé toʼo tiha tempu, Testemuña sira komprende ho klaru eskritura sira no hadiʼa sira-nia hanoin neʼebé sala. Hodi halo nuneʼe, sira banati-tuir apóstolu sira neʼebé ho haraik-an troka sira-nia hanoin neʼebé sala bainhira Jesus korrije sira.—Apóstolu 1:6, 7.

Labarik-feto nia hanoin kona-ba kalohan mak hanoin sala neʼebé kiʼik deʼit. Maibé buat neʼebé Bíblia hanorin mak importante tebes mai ita. Tan neʼe, ita labele sadere ba ita-nia matenek rasik, maibé presiza buka ajuda atu bele komprende Bíblia ho didiʼak. Buka ajuda husi ema neʼebé estuda Bíblia ho haraik-an, sadere ba Maromak nia espíritu santu, no fiar katak agora mak tempu neʼebé Maromak hakarak ita atu komprende Bíblia ho klaru liután. Keta dada an atu koʼalia ho Testemuña ba Jeová, no lee informasaun husi sítiu jw.org. Bíblia promete: “Se ó husu kbiit atu komprende . . . , ó sei hatene kona-ba Maromak.”—Provérbios (Amsal) 2:3-5.