Skip to content

Skip to table of contents

 INFORMASAUN IHA OIN | LEE BÍBLIA LORI BENEFÍSIU BA ITA

Oinsá atu hahú lee Bíblia?

Oinsá atu hahú lee Bíblia?

Saida deʼit mak Ita presiza halo atu tempu lee Bíblia nian bele lori ksolok no benefísiu? Haree toʼok sujestaun lima tuirmai neʼe.

Buka fatin neʼebé diʼak. Buka fatin neʼebé hakmatek no kalma. Hakaʼas an atu la husik buat ida atrapalla Ita hodi Ita bele tau atensaun ba buat neʼebé Ita lee. Diʼak mós atu lee iha fatin neʼebé iha naroman no anin neʼebé fresku.

Prepara Ita-nia neon. Bíblia mak karta husi ita-nia Aman iha lalehan, tan neʼe ita presiza hatudu hahalok hanesan labarik ida neʼebé prontu atu aprende husi ninia aman. Se Ita hanoin katak informasaun husi Bíblia ladún iha folin, koko toʼok atu hadiʼa Ita-nia hanoin no sai prontu atu simu hanorin husi Maromak.—Salmo (Mazmur) 25:4.

Halo orasaun antes atu lee. Bíblia mak livru neʼebé fó sai Maromak nia hanoin, tan neʼe ita presiza Maromak nia ajuda atu komprende. Maromak promete katak nia sei “fó duni espíritu santu ba sira neʼebé husu ba nia”. (Lucas 11:13) Espíritu santu bele ajuda ita atu komprende Maromak nia hanoin, no ikusmai ita sei hatene ho loloos “buat kleʼan husi Maromak”.—1 Korinto 2:10.

Lee atu komprende. Keta lee liu deʼit. Hanoin didiʼak kona-ba eskritura sira neʼebé Ita lee. Porezemplu, kuandu Ita lee istória kona-ba ema ida, husu Ita-nia an: ‘Ema neʼe hatudu hahalok saida? Oinsá mak haʼu bele uza ida-neʼe iha haʼu-nia moris rasik?’

Halo planu kona-ba buat neʼebé Ita hakarak atu aprende. Atu bele hetan benefísiu husi lee Bíblia, Ita bele halo planu, hanesan: ‘Haʼu hakarak hatene liután kona-ba Maromak.’ ‘Haʼu hakarak sai ema neʼebé iha hahalok diʼak, ka sai laʼen (ka feen) neʼebé diʼak liután.’ Tuirmai, hili parte husi Bíblia neʼebé Ita bele lee atu ajuda Ita kumpre Ita-nia planu. *

Sujestaun lima neʼe sei ajuda ita atu komesa lee Bíblia. Maibé, hodi halo saida deʼit mak ita bele haburas ita-nia hakarak atu lee Bíblia? Haree toʼok sujestaun balu tan husi informasaun tuirmai.

^ par. 8 Se Ita ladún hatene parte ida-neʼebé mak diʼak ba Ita atu lee, husu ajuda husi Testemuña ba Jeová.