Skip to content

Skip to table of contents

 ESPERIÉNSIA

“Ami mak neʼe! Haruka ami bá!”

“Ami mak neʼe! Haruka ami bá!”

ITA hanoin hela atu aumenta Ita-nia serbisu ba Jeová hodi muda ba fatin neʼebé presiza haklaken-naʼin liután ka lae? Se nuneʼe, Ita bele hetan benefísiu husi irmaun Jack no irmán Marie-Line nia esperiénsia.

Jack no Marie-Line serbí Maromak tempu-tomak hamutuk husi tinan 1988. Sira lalais atu sai toman ho situasaun foun no simu ona knaar oioin iha rai-Guadalupe no rai-Guiana Franseza. Agora sukursál Fransa mak tau matan ba rai rua neʼe. Mai ita husu Jack no Marie-Line.

Saida mak book imi atu komesa serbí tempu-tomak?

Marie-Line: Haʼu boot iha rai-Guadalupe. Kuandu haʼu sei labarik haʼu haklaken beibeik ho haʼu-nia amá durante loron tomak. Haʼu-nia amá mak ema neʼebé haklaken ho badinas. Tanba haʼu hadomi ema, haʼu komesa serbí nuʼudar pioneiru iha tinan 1985 bainhira haʼu remata eskola.

Jack: Kuandu haʼu labarik, haʼu sempre hamutuk ho irmaun-irmán sira neʼebé serbí tempu-tomak no sira gosta tebes haklaken. Uluk haʼu foti beibeik pioneiru estra iha tempu feriadu. Iha findesemana, haʼu, amá no irmaun ida husi ami-nia kongregasaun saʼe bís atu bá haklaken ho pioneiru sira. Ami haklaken loron tomak no depois bá tasi. Haʼu kontente tebes iha tempu neʼebá.

Haʼu no Marie-Line kaben iha tinan 1988, no lakleur depois neʼe haʼu hanoin: ‘La iha buat ida mak hanetik ami, entaun diʼak se ami aumenta ami-nia serbisu haklaken.’ Haʼu komesa serbí nuʼudar pioneiru hamutuk ho Marie-Line. Tinan ida liutiha, ami tuir eskola pioneiru. Depois neʼe ami simu knaar atu serbí nuʼudar pioneiru tempu-tomak iha rai-Guadalupe no tuirmai simu konvite atu muda ba rai-Guiana Franseza.

Ba tinan barak imi serbí iha fatin oioin. Saida mak ajuda imi atu sai toman ho ida-neʼe?

Marie-Line: Irmaun sira iha Betel iha rai-Guiana Franseza hatene katak eskritura neʼebé ami gosta liu mak Isaias 6:8. Entaun bainhira sira telefone ami, baibain sira husu uluk ami iha dalan neʼebé komik: “Imi hanoin-hetan eskritura neʼebé imi gosta liu ka lae?” Kuandu sira koʼalia hanesan neʼe, ami hatene ona katak ami sei muda ba fatin foun, tan  neʼe ami hatán: “Ami mak neʼe! Haruka ami bá!”

Ami la kompara fatin foun ho fatin sira neʼebé uluk ami serbí tanba se ami halo nuneʼe karik ami sei la gosta fatin foun neʼe. Ami mós hakaʼas an atu habelun ho irmaun-irmán sira iha fatin foun.

Jack: Uluk, irmaun-irmán balu lakohi ami atu muda, tan neʼe sira koko anima ami atu la muda. Maibé kuandu ami muda husi rai-Guadalupe, irmaun ida fó-hanoin ami kona-ba Jesus nia liafuan iha Mateus 13:38 neʼebé dehan: “Toʼos mak mundu.” Entaun kuandu ami muda ba fatin foun, ami hanoin-hetan katak ami nafatin halo serbisu iha toʼos espirituál maski fatin la hanesan. Buat neʼebé importante liu mak ema iha haklaken-fatin.

Bainhira ami toʼo iha fatin foun, ami haree ema moris ho kontente. Tan neʼe ami koko atu halaʼo moris hanesan sira. Maski karik ami la toman ho sira-nia hahán, maibé ami han no hemu buat neʼebé sira han no hemu, maibé iha tempu hanesan, ami mós kuidadu ami-nia saúde. Ami sempre hakaʼas an atu koʼalia buat pozitivu kona-ba fatin ida-idak neʼebé ami serbí.

Marie-Line: Ami aprende buat barak husi irmaun-irmán lokál. Haʼu hanoin-hetan buat neʼebé akontese iha rai-Guiana Franseza. Udan tun makaʼas, tan neʼe ami hanoin atu hein udan para mak foin bá haklaken. Maibé irmán ida husu: “Ita prontu ona ka?” Haʼu hakfodak no husu: “Oinsá?” Nia hatán: “Kaer sombriña no ita sei saʼe bisikleta.” Entaun haʼu aprende atu lori bisikleta ho liman ida no liman ida seluk kaer sombriña. Se lae, haʼu labele haklaken durante tempu udan.

Imi muda ba fatin foun dala 15 ona. Imi iha sujestaun balu neʼebé bele ajuda ema seluk?

Marie-Line: Dala ruma muda ba fatin foun mak susar. Maibé importante atu buka uma neʼebé hakmatek, atu nuneʼe ita bele sente kmaan bainhira fila husi haklaken.

Jack: Baibain haʼu pinta fali didin sira iha uma foun. Dala ruma irmaun sira husi sukursál hatene katak ami sei la hela kleur iha fatin ida no hatete: “Jack, lalika pinta uma neʼe.”

Marie-Line matenek tebes atu haloot ami-nia sasán. Nia rai buat hotu iha kaixa no hakerek iha kaixa sasán saida mak iha laran, porezemplu nia hakerek liafuan “hariis-fatin”,  “dapur”, no “kuartu”. Entaun kuandu ami toʼo iha uma foun, ami bele rai kedas kaixa sira iha fatin neʼebé loos. Nia mós halo lista kona-ba saida mak iha kaixa ida-idak atu ami bele hetan lalais sasán neʼebé ami presiza.

Marie-Line: Tanba haʼu sai toman atu haloot ami-nia sasán, neʼe ajuda ami atu komesa haklaken kedas kuandu toʼo iha fatin foun.

Oinsá imi organiza tempu atu bele ‘kumpre didiʼak imi-nia serbisu ba Maromak’? —2 Tim 4:5.

Marie-Line: Iha loron-segunda, ami deskansa no prepara ba reuniaun. No ami bá haklaken husi loron-tersa toʼo loron-domingu.

Jack: Maski ami presiza kumpre ami-nia oras, maibé ami la tau fokus ba ida-neʼe. Haklaken mak importante liu iha ami-nia moris. Husi tempu neʼebé ami sai husi uma toʼo tempu neʼebé ami fila, ami hakaʼas an atu haklaken ba ema hotu neʼebé ami hasoru.

Marie-Line: Porezemplu, se ami laʼo pasiar, haʼu sempre lori panfletu sira. Dala ruma ema hakbesik ami no husu publikasaun, maski ami seidauk fó sai katak ami mak Testemuña. Tan neʼe ami hakaʼas an hatudu hahalok diʼak no hatais ho respeitu. Ema nota buat sira-neʼe.

Jack: Ami mós fó sasin liuhusi hatudu laran-diʼak ba ami-nia viziñu. Haʼu hili lixu sira no soe iha foʼer-fatin, no mós dasa ai-tahan sira haleʼu ami-nia uma. Dala ruma ami-nia viziñu nota no husu: “Ita bele fó Bíblia ida ba haʼu ka?”

Dala barak imi haklaken iha fatin neʼebé izoladu. Bele konta esperiénsia ruma?

Jack: Iha rai-Guiana Franseza, susar tebes atu bá haklaken iha área balu. Dala barak ami presiza halo viajen kilómetru 600 iha dalan aat durante semana ida. Ami-nia viajen ba knua St. Élie iha ai-laran Amazonas mak furak tebes. Ami presiza saʼe karreta no ró ba oras balu. Ema barak iha área neʼe halo serbisu atu keʼe rai hodi buka osan-mean. Entaun atu hatudu agradese ba publikasaun neʼebé ami fahe, sira fó osan-mean nuʼudar kontribuisaun! Iha kalan, ami loke vídeo ida husi ita-nia organizasaun no ema barak mai atu haree.

Marie-Line: Tinan balu liubá, Jack simu knaar atu hatoʼo diskursu Memoriál nian iha knua naran Camopi. Ami presiza saʼe ró ba oras haat liuhusi Mota Oyapock. Viajen neʼe kapás tebes.

Jack: Parte balu husi mota neʼe mak la kleʼan, iha fatuk sira no bee suli makaʼas, entaun dala ruma viajen neʼe perigu. Haʼu admira atu haree parte husi mota neʼebé suli makaʼas. Ró-naʼin matenek tebes atu liu fatin neʼe ho seguru. Ami kontente tebes tanba bele halo viajen neʼe. Ema neʼebé tuir Memoriál mak Testemuña naʼin-neen no mós ema naʼin-50, inklui mós ema Ameríndios balu.

Marie-Line: Joven sira mós bele hetan esperiénsia furak hanesan neʼe se sira aumenta sira-nia serbisu ba Jeová. Iha situasaun hanesan neʼe ita presiza tau fiar ba Jeová, no ita-nia fiar sai metin liután. Ami haree beibeik Jeová ajuda ami.

Imi aprende ona língua balu. Imi matenek atu aprende língua foun ka?

Jack: Lae duni. Haʼu aprende língua sira-neʼe atu bele bá haklaken no ajuda kongregasaun. Tempu ida haʼu presiza dirije Livru Haklaken iha língua Sranantongo * maski haʼu seidauk simu knaar atu lee Bíblia iha língua neʼe. Haʼu husu irmaun ida se ema bele komprende haʼu ka lae. Nia hatán: “Dala ruma ami la komprende Ita, maibé Ita halo diʼak tebes.” Labarik sira ajuda tebes. Bainhira haʼu koʼalia sala, sira hasé haʼu, maibé irmaun-irmán sira la hasé haʼu. Haʼu aprende buat barak husi labarik sira.

Marie-Line: Iha área ida, haʼu iha estudante Bíblia sira neʼebé koʼalia língua Fransés, Portugés no Sranantongo. Irmán ida fó sujestaun ba haʼu atu estuda uluk ho ema neʼebé koʼalia língua neʼebé haʼu ladún hatete didiʼak. No tuirmai mak estuda ho ema neʼebé koʼalia língua  neʼebé haʼu hatene didiʼak. Neʼe mak sujestaun neʼebé matenek.

Loron ida, haʼu presiza estuda Bíblia ho ema ida neʼebé koʼalia língua Sranantongo no tuirmai estuda ho ema neʼebé koʼalia língua Portugés. Bainhira haʼu komesa estuda segundu, irmán neʼebé akompaña haʼu hatete: “Marie-Line, haʼu hanoin iha problema ida.” Afinál haʼu koʼalia daudaun Sranantongo ba feto husi rai-Brazíl duké koʼalia Portugés.

Iha fatin oioin neʼebé imi serbí, irmaun-irmán sira hadomi tebes imi. Saida mak ajuda imi atu hakbesik ba sira?

Jack: Provérbios 11:25 hatete: “Ema laran-luak sei moris diʼak.” Ami la dada an atu ajuda ema seluk. Kona-ba tau matan ba Reuniaun-Fatin, ema balu hatete ba haʼu: “Husik haklaken-naʼin sira halo ida-neʼe.” Maibé haʼu hatán: “Haʼu mós haklaken-naʼin. Se presiza, haʼu mós hakarak ajuda.” Maski ita hotu presiza tempu atu mesamesak, maibé ami lakohi husik ida-neʼe hanetik ami atu ajuda ema seluk.

Marie-Line: Ami hakaʼas an atu hatudu interese ba irmaun-irmán sira. Neʼe ajuda ami hatene se sira presiza ema ruma atu tau matan ba sira-nia oan, ka tula sira-nia oan husi eskola. No ami bele troka ami-nia planu atu bele ajuda. Hodi halo nuneʼe ami sai belun diʼak no prontu ajuda sira kuandu sira presiza.

Imi simu bensaun saida tanba serbí iha fatin neʼebé presiza haklaken-naʼin liután?

Jack: Ami simu bensaun barak tanba serbí tempu-tomak. Ami hetan oportunidade atu haksolok ho Jeová nia kriasaun. Maski ami hasoru susar oioin, maibé ami bele sente kmaan tanba hatene Maromak nia povu apoia ami iha fatin hotu neʼebé ami bá.

Kuandu haʼu joven, haʼu tama komarka iha rai-Guiana Franseza tanba neutrál nafatin. Haʼu nunka imajina katak haʼu sei fila fali ba rai neʼe nuʼudar misionáriu no haklaken iha komarka sira. Loos duni, Jeová haraik bensaun barak!

Marie-Line: Ajuda ema seluk lori ksolok boot mai haʼu. Ami kontente tebes atu halo serbisu ba Jeová. Neʼe mós ajuda ami atu hametin ami-nia relasaun nuʼudar feen-laʼen. Dala ruma Jack husu haʼu se ami bele konvida feen-laʼen neʼebé presiza hetan anima atu mai han ho ami. Dala barak haʼu mós iha hanoin neʼebé hanesan.

Jack: Tinan balu liubá, doutór fó-hatene katak haʼu iha kankru. Dala ruma haʼu hatete ba Marie-Line: “Doben, se aban haʼu mate, maski haʼu seidauk ‘katuas loos’, maibé haʼu sei mate ho kontente tanba hatene katak haʼu uza haʼu-nia moris atu serbí Jeová no neʼe buat neʼebé folin-boot.”—Gén 25:8.

Marie-Line: Jeová fó ba ami knaar oioin no husik ami halo buat oioin neʼebé ami nunka imajina. Ami kontente tebes atu serbí Jeová. Ami prontu atu bá fatin naran deʼit neʼebé Jeová nia organizasaun husu tanba ami fiar metin katak Jeová sei sempre ajuda ami!

^ par. 32 Sranantongo mak língua ida neʼebé kahur ho língua Inglés, Olandés, Portugés no língua oioin husi Áfrika. Uluk atan sira mak kria língua neʼe.