Skip to content

Skip to table of contents

Kontinua luta atu hetan Jeová nia bensaun

Kontinua luta atu hetan Jeová nia bensaun

“Ó luta ho Maromak no ema toʼo ikusmai ó manán.”—GÊNESIS (KEJADIAN) 32:28.

KNANANUK: 23, 38

1, 2. Jeová nia atan sira luta hasoru saida deʼit?

MAROMAK nia atan laran-metin hotu, husi Abel toʼo ita, luta daudauk hasoru susar oioin. Apóstolu Paulo hatete katak ema kristaun ebreu sira tahan ona susar no terus barak tan deʼit atu halo buat neʼebé Jeová simu no atu hetan ninia bensaun. (Ebreu 10:32-34) Paulo kompara ema kristaun nia luta hanesan ho atleta sira-nia halai-taru, riba-malu, no bokse neʼebé ema halo iha rai-Grésia. (Ebreu 12:1, 4) Ohin loron, ita halai-taru daudauk ba moris nian, no iha inimigu barak mak hakarak dada ita-nia atensaun hodi halo ita laran-tun, no halakon ita-nia ksolok hodi ita la bele simu ita-nia kolen iha futuru.

2 Inimigu neʼebé ita presiza luta makaʼas liu mak hasoru Satanás ho ninia mundu aat neʼe. (Éfeso 6:12) Importante tebes atu kontinua luta hasoru mundu nia hanoin no hahalok aat sira, inklui mós hahalok sala-foʼer, fuma, lanu, no droga. Ita mós tenke kontinua luta makaʼas hasoru ita rasik nia fraku no sentimentu laran-tun.—2 Korinto 10:3-6; Koloso 3:5-9.

3. Oinsá mak Maromak fó treinu ita atu luta hasoru inimigu sira?

3 Ita bele luta manán hasoru inimigu forte sira-neʼe ka lae?  Bele, maibé tenke luta ho forsa makaʼas! Tan neʼe mak apóstolu Paulo kompara ninia an hanesan ho ema neʼebé luta iha bokse. Nia dehan: “Haʼu tuku laʼós hanesan tuku anin deʼit.” (1 Korinto 9:26) Hanesan neʼe mós ho ita. Ita tenke luta makaʼas hasoru ita-nia inimigu sira hanesan luta iha bokse. Liuhusi Bíblia, Jeová sei ajuda no fó treinu ba ita oinsá atu luta. Nia mós ajuda ita liuhusi ita-nia livru, reuniaun, no reuniaun boot sira. Ita presiza aproveita didiʼak ajuda sira-neʼe, selae, bainhira ita atu luta hasoru ita-nia inimigu sira, ita sei la tuku hetan sira, maibé tuku anin deʼit.

4. Ita tenke halo saida hodi buat aat la bele manán ita?

4 Ita tenke matan-moris iha tempu hotu. Tanbasá? Tanba karik iha tempu neʼebé ita seidauk prepara didiʼak ka bainhira ita fraku hela mak ita-nia inimigu sira sei ataka ita. Tan neʼe Bíblia fó avizu hodi dehan: “Keta husik buat aat manán imi, maibé kontinua manán buat aat ho buat neʼebé diʼak.” (Roma 12:21) Liafuan sira-neʼe fó laran-manas ba ita katak se ita mak kontinua luta, ita bele manán! Maibé, se ita mak la matan-moris ona no lakohi luta ona, Satanás, ninia mundu, no ita-nia fraku sira mak sei sai forsa liu fali ita. Tan neʼe, hiʼit nafatin ita-nia liman hodi Satanás la halo taʼuk ita!—1 Pedro 5:9.

5. (a) Saida mak bele ajuda ita atu kontinua luta hodi hetan bensaun husi Maromak? (b) Sesé deʼit nia ezemplu mak bele ajuda ita?

5 Hanoin nafatin kona-ba tansá mak ita hakarak luta, neʼe mós bele ajuda ita atu manán. Ita-nia razaun atu luta mak tanba ita hakarak halo buat neʼebé Maromak simu no atu hetan ninia bensaun. Eskritura iha Ebreu 11:6 hatete: “Ema neʼebé hakbesik ba Maromak tenke fiar katak Maromak iha, no fiar mós katak Maromak sei fó kolen ba sira neʼebé buka nia ho laran.” Liafuan “buka nia ho laran” signifika katak ita tenke hakaʼas an tebes atu bele halo buat neʼebé Maromak simu. (Apóstolu 15:17) Ita bele haree husi Bíblia kona-ba ema barak neʼebé hakaʼas an tebes atu buka bensaun husi Jeová. Ema hanesan Jacob, Rakel, José, no apóstolu Paulo. Sira hotu hasoru ona problema neʼebé todan iha sira-nia moris. Maibé ikusmai sira hotu hetan duni susesu. Sira-nia ezemplu hatudu ba ita katak, se ita mak hakaʼas an, ita mós bele hetan bensaun husi Jeová. Oinsá? Mai ita haree toʼok.

TAHAN SEI LORI BENSAUN

6. Saida mak ajuda Jacob atu tahan, no tanbasá mak neʼe la saugati deʼit ba nia? (Haree dezeñu iha pájina 8.)

6 Jacob tahan no luta makaʼas tanba nia hadomi Jeová, hafolin ninia relasaun ho Jeová, no nia fiar metin Jeová nia promesa atu fó bensaun ba ninia bei-oan. (Gênesis [Kejadian] 28:3, 4) Nia besik toʼo ona idade 100, nia hakaʼas an nafatin atu luta, nia mós riba-malu ho anju ida tan deʼit atu hetan bensaun husi Maromak. (Lee Gênesis [Kejadian] 32:24, 26, 28. [1]) Ho Jacob nia forsa rasik nia bele luta hasoru anju ho forsa boot ida ka lae? La bele! Maibé nia hakarak nafatin luta makaʼas atu hetan bensaun husi Maromak. Tanba ninia hakaʼas-an neʼe, Jeová fó duni bensaun ba nia hodi troka ninia naran ba fali Izraél. Naran neʼe signifika katak “Ida neʼebé Luta Hasoru Maromak” ka “Maromak Luta Hasoru Nia”. Jacob hetan duni kolen neʼebé ita hotu buka, neʼe mak Jeová simu nia no fó bensaun ba nia.

7. (a) Rakel hasoru problema saida? (b) Nia halo saida, no ikusmai nia hetan bensaun saida?

 7 Jacob nia feen, Rakel mós hein atu haree oinsá mak Jeová sei haraik bensaun ba ninia laʼen. Maibé nia hasoru daudauk problema ida. Nia seidauk iha oan, no iha tempu neʼebá, se feto mak la bele iha oan, neʼe halo sira sente laran-susar tebes. Entaun, oinsá mak Rakel kontinua luta hasoru situasaun neʼebé halo nia laran-tun neʼe? Nia nunka lakon ninia esperansa. Nia luta nafatin hodi halo orasaun beibeik ba Jeová. Jeová rona duni Rakel nia orasaun sira, tanba ikusmai Jeová haraik bensaun ba nia hodi iha oan. Tan neʼe mak Rakel hatete: “Haʼu luta makaʼas . . . no haʼu mak manán!”—Gênesis (Kejadian) 30:8, 20-24.

8. José hasoru problema saida deʼit iha ninia moris, no ninia ezemplu hanorin ita saida?

8 Karik tanba ezemplu laran-metin husi Jacob no Rakel mak ajuda sira-nia oan José atu tahan hasoru problema sira neʼebé nia hasoru iha ninia moris. Bainhira nia sai tinan 17, nia komesa hasoru susar todan iha ninia moris. Ninia maun sira laran-moras ba nia, no faʼan nia sai ema nia atan. Tuirmai ema hatama nia ba tinan barak iha komarka iha Ejitu. (Gênesis [Kejadian] 37:23-28; 39:7-9, 20, 21) Maski nuneʼe, José nunka sai laran-tun, ka hanoin atu selu fali buat hotu neʼebé ema halo ba nia. Nia hafolin no hanoin beibeik kona-ba ninia relasaun diʼak ho Jeová. (Levítico [Imamat] 19:18; Roma 12:17-21) José nia ezemplu hatudu katak, maski husi kiʼik ita moris ho terus, no toʼo agora haree hanesan laiha esperansa nafatin, maibé ita bele kontinua luta no tahan. Ita bele fiar katak loron ida Jeová sei fó bensaun ba ita-nia luta sira-neʼe.—Lee Gênesis (Kejadian) 39:21. [2]

9. Iha dalan saida mak ita bele banati-tuir Jacob, Rakel, no José nia ezemplu?

9 Karik ita mós tahan daudauk hasoru susar no terus ruma. Karik ema trata ita iha dalan neʼebé la justu, diskriminasaun ruma, ka ema goza ita. Ka tanba ema laran-moras, sira duun matak ita. Duké sai laran-tun, diʼak atu hanoin kona-ba saida mak ajuda Jacob, Rakel, no José hodi bele kontinua serbí Jeová ho ksolok. Maromak fó forsa no bensaun ba sira tanba sira hafolin sira-nia relasaun diʼak ho nia. Sira luta la para no halo tuir sira-nia orasaun hotu. Ita hela daudauk iha loron ikus sira, tan neʼe importante tebes atu kaer metin ita-nia esperansa ba futuru. Ita mós prontu atu luta makaʼas ba Jeová nia bensaun ka lae?

ATU HETAN BENSAUN, TENKESÉR LUTA

10, 11. (a) Tanbasá mak ita presiza luta atu hetan Maromak nia bensaun? (b) Saida mak bele ajuda ita atu halo desizaun neʼebé loos?

10 Ita presiza luta makaʼas hasoru saida deʼit atu bele hetan Jeová nia bensaun? Karik ema balu presiza luta hasoru hakarak isin nian. Balu fali presiza luta makaʼas hasoru sira-nia hanoin negativu kona-ba serbisu haklaken. Balu tan presiza luta hasoru problema ho saúde ka tanba sira sente maluk la iha. Iha mós ema balu neʼebé sente susar atu bele fó perdua ba ema seluk. Maski ita foin serbí Jeová ka serbí nia ba tempu kleur ona, ita hotu tenkesér luta hasoru buat sira neʼebé halo susar ba ita atu bele serbí Jeová, hodi nia bele fó kolen ba sira neʼebé laran-metin ba nia.

Ita luta daudauk ba Maromak nia bensaun ka lae? (Haree parágrafu 10, 11)

11 Ita hotu rekoñese katak la fasil atu moris nuʼudar ema kristaun no atu halo desizaun neʼebé loos, tanba ita-nia laran  neʼebé la perfeitu sempre dada ita ba dalan neʼebé sala. (Jeremias [Yeremia] 17:9) Se ita mak sente daudauk hanesan neʼe, halo orasaun atu husu Jeová fó espíritu santu ba ita. Orasaun no espíritu santu bele fó kbiit ba ita atu halo buat neʼebé loos hodi ita bele simu Jeová nia bensaun. Diʼak atu moris tuir ita-nia orasaun, koko atu lee Bíblia loroloron, no buka tempu atu estuda mesak no halaʼo Adorasaun Família nian.—Lee Salmo (Mazmur) 119:32. [3]

12, 13. Saida mak ajuda irmaun no irmán ida kontrola hakarak neʼebé sala?

12 Iha ezemplu barak neʼebé hatudu oinsá mak Maromak nia Liafuan, ninia espíritu santu, no ita-nia livru sira ajuda ona irmaun-irmán barak hodi luta manán hakarak neʼebé sala. Mane joven tinan 17 lee informasaun ida kona-ba oinsá atu luta hasoru hakarak neʼebé sala. (Sedarlah! 8 Dezembru 2003) Lee tiha, nia sente oinsá? Nia dehan: “Haʼu luta hela hasoru hanoin neʼebé sala. Bainhira haʼu lee katak ‘ba ema barak, la fasil atu luta manán hasoru hakarak neʼebé sala’, haʼu sente haʼu laʼós mesak deʼit. Neʼe halo haʼu sente haʼu iha família boot ida iha mundu tomak.” Nia mós lee tan informasaun ida kona-ba dalan moris neʼebé Maromak hakribi. (Sedarlah! 8 Outubru 2003) Husi informasaun neʼe nia aprende katak ema balu luta daudauk problema neʼe kleur ona, hanesan “ai-tarak” isin nian. (2 Korinto 12:7) Maski sira luta daudauk atu iha hahalok santu, maibé sira mós la lakon esperansa kona-ba futuru. Nia dehan: “Tanba razaun neʼe mak haʼu hanoin haʼu bele iha laran-metin husi loron ida ba fali loron seluk. Haʼu agradese tebes ba Jeová hodi ajuda ita moris liu loron ida-idak iha mundu aat neʼe.”

 13 Irmán ida husi Estadus Unidus hatete: “Haʼu hakarak fó obrigada ba imi tanba imi sempre fó buat neʼebé ami presiza iha tempu neʼebé loos. Dala barak haʼu sente informasaun sira neʼebé imi hakerek, hanesan imi hakerek ba haʼu. Haʼu luta ona ba tinan barak atu halakon haʼu-nia hakarak atu halo buat neʼebé Jeová odi. Dala ruma haʼu hakarak foti liman deʼit atu la luta tan. Haʼu hatene katak Jeová laran-sadiʼa no prontu atu fó perdua, maibé tanba iha laran, haʼu iha hakarak neʼebé sala no haʼu la odi hakarak aat neʼe, tan neʼe haʼu sente haʼu la serve atu simu ajuda husi Jeová. Luta neʼe fó impaktu ba haʼu-nia moris tomak. . . . Maibé bainhira lee tiha informasaun husi Livru Haklaken 15 Marsu 2013 kona-ba ‘Ita iha “laran atu hatene” Jeová ka lae?’, haʼu sente katak Jeová hakarak duni atu ajuda haʼu.”

14. (a) Paulo sente oinsá kona-ba buat neʼebé nia tenke luta hasoru? (b) Oinsá mak ita bele luta manán hasoru ita-nia fraku sira?

14 Lee Roma 7:21-25. Apóstolu Paulo rasik komprende katak la fasil atu luta hasoru hakarak neʼebé sala no hasoru ita-nia fraku. Maibé nia fiar katak, se nia halo orasaun hodi sadere ba Jeová no tau fiar ba Jesus nia sakrifísiu, nia bele manán hasoru luta neʼe. Oinsá ho ita? Ita mós bele luta manán hasoru ita-nia fraku sira ka lae? Bele. Se ita banati-tuir Paulo nia ezemplu hodi sadere deʼit ba Jeová, laʼós ita-nia kbiit, no tau fiar ba Jesus nia sakrifísiu, ita bele manán duni.

15. Oinsá mak orasaun bele ajuda ita laran-metin no tahan hasoru susar no terus sira?

15 Dala ruma Maromak hakarak ita atu hatudu oinsá ita sente kona-ba problema ruma. Porezemplu, bainhira ita ka ema ruma iha ita-nia família moras todan ka hasoru hela situasaun la justu ruma, ita sei halo saida? Se ita mak tau fiar tomak ba Jeová, ita sei husu makaʼas ba nia atu fó kbiit mai ita hodi bele laran-metin, la lakon ksolok no iha nafatin relasaun neʼebé metin ho nia. (Filipe 4:13) Ezemplu husi ema kristaun sira husi tempu uluk no ohin loron hatudu katak orasaun bele ajuda duni hametin ita no fó kbiit ba ita atu kontinua tahan.

LUTA NAFATIN BA JEOVÁ NIA BENSAUN

16, 17. Ita hakarak kontinua atu halo saida?

16 Diabu hakarak tebes atu haree ita sai laran-tun no halo ita hatún ita-nia liman hodi la luta tan. Tan neʼe ita tenkesér “kaer metin ba buat neʼebé diʼak”. (1 Tesalónika 5:21) Ita bele luta manán hasoru Satanás, ninia mundu aat, no hasoru hakarak aat sira. Se ita mak sadere deʼit ba Maromak nia kbiit no ajuda, ita sei manán duni.—2 Korinto 4:7-9; Galásia 6:9.

17 Tan neʼe, kontinua luta ba oin. Kontinua tahan nafatin. Fiar ho laran tomak bá katak Jeová sei “fakar tun ba imi bensaun toʼo imi la falta tan buat ida”.—Malaquias (Maleakhi) 3:10.

^ [1] (parágrafu 6) Gênesis 32:24, 26, 28 24 Ikusmai hela Jacob mesak deʼit. Tuirmai mane ida hahú luta ho nia toʼo loro-matan saʼe. 26 Depois neʼe mane neʼe dehan: “Husik haʼu, tanba loro-matan saʼe ona.” Ho ida-neʼe Jacob dehan: “Haʼu sei la husik Ita toʼo Ita haraik bensaun mai haʼu.” 28 Tuirmai nia dehan: “Ó-nia naran laʼós tan Jacob maibé Izraél, tanba ó luta ho Maromak no ema toʼo ikusmai ó manán.”

^ [2] (parágrafu 8) Gênesis 39:21 Maibé Jeová nafatin hamutuk ho José no kontinua hatudu domin neʼebé laran-metin ba José no halo xefe boot ba komarka neʼe kontente ho José.

^ [3] (parágrafu 11) Salmo 119:32 Haʼu sei buka tuir Ita-nia mandamentu sira ho laran-manas tanba Ita loke luan haʼu-nia laran.