Skip to content

Skip to table of contents

Defende lia­fuan diʼak iha ema-boot sira-nia oin

Defende lia­fuan diʼak iha ema-boot sira-nia oin

‘HAʼU hili tiha ona mane neʼe atu lori haʼu-nia naran ba nasaun sira, no liurai sira.’ (Apóstolu 9:15) Mane judeu neʼebé Naʼi Jesus temi mak ema neʼebé troka ninia fiar hodi sai fali ema kristaun, naran apóstolu Paulo.

Hanoin toʼok ita sente oinsá se ita mak presiza hasoru Liurai Roma Nero atu defende ita-nia fiar? Tuir loloos ema kristaun tenkesér defende duni sira-nia fiar hanesan Paulo. (1 Korinto 11:1) Dalan ida ita bele defende fiar mak haree oinsá mak Paulo defende ninia fiar iha ninia tempu.

Ema judeu moris tuir Moisés nia Ukun-Fuan. Maibé loron Pentekostes tinan 33 liutiha, ema neʼebé adora Maromak iha dalan neʼebé loos la presiza tan atu halo tuir Moisés nia Ukun-Fuan. (Apóstolu 15:28, 29; Galásia 4:9-11) Maski nuneʼe, Paulo no ema kristaun seluk la hatún Ukun-Fuan neʼe, tan neʼe mak sira bele livre atu haklaken iha ema judeu nia komunidade sira. (1 Korinto 9:20) Hodi nuneʼe mak Paulo mós bá beibeik sinagoga hodi haklaken, tanba iha fatin sira-neʼe mak nia bele hetan ema neʼebé hatene Abraão nia Maromak hodi nia bele uza Eskritura Ebraiku esplika ba sira.—Apóstolu 9:19, 20; 13:5, 14-16; 14:1; 17:1, 2.

Jesus nia apóstolu sira hili atu haklaken husi Jeruzalein. Sira baibain hanorin iha Maromak nia templu. (Apóstolu 1:4; 2:46; 5:20) Paulo mós bá-mai Jeruzalein, no iha Jeruzalein mak ema tahan nia hodi halaʼo prosesu legál neʼebé ikusmai lori nia ba Roma.

PAULO APROVEITA ROMA NIA LEI

Ema-boot sira husi Roma haree oinsá kona-ba fiar neʼebé Paulo haklaken daudauk? Atu hatene resposta, diʼak atu komprende kona-ba ema Roma nia hanoin kona-ba relijiaun. Sira la obriga ema atu husik sira ida-idak nia relijiaun, só bainhira relijiaun ida lori ameasa ba governu ka morál mak sira hapara relijiaun neʼe.

Governu Roma fó direitu barak ba ema judeu. Livru ida (Backgrounds of Early Christianity) hatete:  “Iha Roma nia ukun, ema judeu nia relijiaun hetan pozisaun espesiál ida. . . . Ema judeu sira iha liberdade atu halaʼo sira-nia relijiaun no sira la iha obrigasaun atu adora ema Roma nia maromak oioin. Iha sira-nia komunidade, sira bele moris tuir sira rasik nia lei.” Sira mós la presiza tama militár. *(Haree nota iha kraik.) Paulo uza Roma nia lei neʼebé fó liberdade ba ema judeu nia relijiaun hodi defende relijiaun kristaun iha ema-boot Roma sira-nia oin.

Ema sira neʼebé kontra Paulo koko dalan oioin atu book povu no ema-boot sira hodi kontra nia. (Apóstolu 13:50; 14:2, 19; 18:12, 13) Iha tempu ida, katuas kristaun husi kongregasaun iha Jeruzalein rona lia-anin husi ema judeu katak Paulo haklaken hela buat neʼebé “kontra Moisés nia Ukun-Fuan”. Istória sira-neʼe bele halo ema neʼebé foin tama kristaun hanoin katak Paulo la iha respeitu ba Maromak nia arranju sira. No tribunál Sinédriu mós bele hatete katak kristaun mak ema neʼebé kontra judeu nia relijiaun sira. Se neʼe mak akontese, ema judeu neʼebé halibur hamutuk ho ema kristaun bele hetan kastigu. Neʼe bele halo komunidade nega sira no bandu sira atu la bele haklaken tan iha templu ka iha sinagoga sira. Tan neʼe mak katuas kongregasaun sira husu Paulo atu bá templu no halo tuir buat ida atu hatudu katak lia-anin neʼebé ema koʼalia laloos, maski Maromak nia ukun-fuan la haruka nia atu halo nuneʼe.—Apóstolu 21:18-27.

Paulo halo tuir duni, no neʼe fó oportunidade ba nia hodi “defende liafuan diʼak” tuir lei. (Filipe 1:7) Iha templu, ema judeu kontra no hakarak atu oho nia. Tan neʼe komandante militár Roma nian kaer Paulo no lori nia. Bainhira prepara diʼak ona atu baku Paulo ho xikote, Paulo fó sai katak nia mós sidadaun Roma. Neʼe halo sira lori fali Paulo ba Sezareia, fatin neʼebé ema Roma halaʼo administrasaun kona-ba sidade Judeia nian. Husi fatin neʼe, Paulo iha oportunidade espesiál ida atu haklaken ho aten-brani ba ukun-naʼin sira. Karik iha tempu neʼebá mak ema neʼebé seidauk hatene loloos relijiaun kristaun bele hatene ho didiʼak kona-ba relijiaun neʼe.

Livru Apóstolu kapítulu 24 temi julgamentu hasoru Paulo neʼebé halaʼo iha governadór Roma ba rai-Judeia naran Feliks nia oin. Nia rona ona uitoan kona-ba ema kristaun nia fiar. Ema judeu sira kesar katak Paulo kontra ona Roma nia lei tolu. Sira dehan katak Paulo book ema judeu hotu hodi kontra governu Roma iha fatin oioin, nia mak ulun-naʼin ba seita perigu ida, no nia mós koko atu halo foʼer templu neʼebé governu Roma proteje daudauk. (Apóstolu 24:5, 6) Akuzasaun sira-neʼe bele halo nia hetan kastigu mate.

Ita bele aprende husi dalan neʼebé Paulo hatán ba akuzasaun sira-neʼe. Nia hatán ho kalma no respeitu. Nia temi kona-ba Moisés nia Ukun-Fuan no Profeta sira. Nia dehan katak nia iha direitu atu adora ‘ninia beiʼala sira-nia Maromak’. Neʼe mak direitu neʼebé lei Roma nian fó ba ema judeu. (Apóstolu 24:14) Liutiha tempu uitoan, Paulo mós iha oportunidade atu defende no haklaken ninia fiar iha governadór tuirmai Pórsio Festo nia oin, no mós iha Liurai Herodes Agripa nia oin.

Ikusmai tanba Paulo hakarak hetan julgamentu neʼebé justu, nia dehan: “Haʼu husu atu lori lia neʼe ba Liurai Roma nian!”—Apóstolu 25:11.

PAULO NIA JULGAMENTU IHA LIURAI ROMA NIA TRIBUNÁL

Ikusmai anju ida hatete ba Paulo: “Ó tenke hamriik iha Liurai Roma nia oin.” (Apóstolu 27:24) Bainhira Nero foin sai liurai Roma, nia hatete katak nia rasik sei la halaʼo julgamentu hotu. Durante tinan ualu, nia fahe knaar neʼe ba ema seluk atu halo. Livru ida (The Life and Epistles of Saint Paul) hatete katak kuandu Nero rasik mak simu kazu ida atu julga, baibain nia halaʼo iha nia rasik nia palásiu. Iha neʼebá nia hetan ajuda husi  grupu konsellu-naʼin ida neʼebé iha ona esperiénsia barak no iha mós influénsia boot.

Bíblia la hatete se Nero rasik mak julga Paulo ka nia fó fali ba ema seluk mak atu rona Paulo nia pedidu no depois mak fó-hatene fali nia. Maibé ita bele hatene Paulo esplika didiʼak katak nia adora ema judeu nia Maromak no nia mós fó laran-manas ba ema seluk atu hatudu respeitu ba governu. (Roma 13:1-7; Tito 3:1, 2) Dalan neʼebé Paulo defende liafuan diʼak iha ema-boot sira-nia oin hetan duni susesu, tanba tribunál Liurai Roma nian husik nia sai livre.—Filipe 2:24; Filemon 22.

ITA-NIA KNAAR ATU DEFENDE LIAFUAN DIʼAK

Jesus hatete ba ninia dixípulu sira: “Sira sei lori imi ba governadór no liurai sira-nia oin tanba haʼu. No, imi sei fó sasin ba sira no ba nasaun seluk.” (Mateus 10:18) Neʼe mak priviléjiu boot ida atu reprezenta Jesus. Ita-nia hakaʼas-an hodi defende liafuan diʼak bele ajuda manán kazu barak. Maibé atu manán ka lakon, ita-nia direitu atu haklaken mai husi Jeová. No só Maromak nia Ukun deʼit mak bele halakon terus no lori justisa.—Eclesiastes (Pengkhotbah) 8:9; Jeremias (Yeremia) 10:23.

Ohin loron, ita mós bele fó glória ba Jeová nia naran liuhusi defende ita-nia fiar. Ita tenke hanesan Paulo atu kalma, koʼalia husi laran, no fiar-an. Jesus hatete ba ninia dixípulu katak sira ‘la presiza prepara nanis kona-ba oinsá atu koʼalia hodi defende sira-nia an, tanba nia sei fó ba sira liafuan no matenek neʼebé sira-nia inimigu sira hotu la bele koʼalia buat ida atu hatán’.—Lucas 21:14, 15; 2 Timóteo 3:12; 1 Pedro 3:15.

Bainhira ema kristaun defende sira-nia fiar iha liurai, governadór, ka ema-boot sira-nia oin, neʼe mak dalan diʼak atu fó sasin ba ema neʼebé susar atu hasoru. Desizaun justu balu husi tribunál kontribui ba lei nia mudansa sira, neʼe fó protesaun ba ita-nia liberdade atu koʼalia no halaʼo adorasaun. Maibé, maski desizaun saida mak ita simu, ita hakarak hatudu aten-brani iha tempu julgamentu tanba neʼe sei halo Maromak kontente.

Ita fó glória ba Jeová nia naran bainhira ita defende ita-nia fiar

^ par. 8 Hakerek-naʼin James Parkes hatete: “Ema judeu sira . . . iha direitu atu halaʼo sira rasik nia relijiaun. Tuir loloos atu hetan priviléjiu hanesan neʼe baibain, tanba ema Roma nia toman mak atu fó liberdade ba rai ida-idak atu halaʼo sira-nia lei.”