Skip to content

Skip to table of contents

Sé mak merese atu simu hahiʼi no respeitu?

Sé mak merese atu simu hahiʼi no respeitu?

“Kriatura hotu tenke fó glória, hahiʼi no respeitu ba Ida neʼebé tuur iha kadunan neʼe no ba Bibi-Oan neʼebé iha kbiit ba nafatin.”APOKALIPSE 5:13.

KNANANUK: 9, 14

1. Baibain ita hatudu hamtaʼuk no respeitu kleʼan ba sé, no iha lisaun neʼe ita sei buka-hatene saida?

IHA dalan saida mak ita hatudu respeitu ba ema? Ita respeitu ema hodi hamtaʼuk sira no hanoin diʼak kona-ba sira. Ita hatudu respeitu neʼebé kleʼan ba ema neʼebé iha knaar ka pozisaun importante, ka sira neʼebé hatudu hahalok ruma neʼebé merese atu simu respeitu kleʼan. Iha lisaun neʼe ita sei buka-hatene sé mak merese atu simu ita-nia respeitu no hahiʼi, no tanbasá.

2, 3. (a) Tanbasá mak Jeová merese liu atu simu hahiʼi? (Haree dezeñu iha leten.) (b) Sé mak Bibi-Oan neʼebé temi iha Apokalipse 5:13, no tanbasá mak ita tenke fó hahiʼi ba nia?

2 Sé mak merese atu simu hahiʼi? Apokalipse 5:13 hatete katak “Ida neʼebé tuur iha kadunan” no “Bibi-Oan” mak merese atu simu hahiʼi. “Ida neʼebé tuur iha kadunan” refere ba Jeová. Iha Apokalipse kapítulu 4 fó-hatene razaun ida tanbasá mak Jeová, “Ida neʼebé moris ba nafatin”, merese atu simu hahiʼi. Kriatura sira iha lalehan dehan: “Jeová, ami-nia Maromak, Ita-Boot merese simu glória, hahiʼi no kbiit, tanba Ita kria ona buat hotu, no tanba Ita-nia hakarak mak buat hotu iha no kria tiha.”Apokalipse 4:9-11.

3 “Bibi-Oan” neʼebé temi iha Apokalipse 5:13 mak Jesus Kristu.  Oinsá mak ita hatene? Bainhira Jesus iha rai, Bíblia bolu nia nuʼudar “Bibi-Oan neʼebé Maromak fó atu hasai tiha mundu nia sala”. (João 1:29) Jesus merese duni atu simu hahiʼi tanba la iha ukun-naʼin ida husi mundu neʼe mak hakarak mate ba ninia povu hanesan Jesus. Tan neʼe mak Bíblia uza liafuan hahiʼi nian ba Jesus hodi dehan: “Nia mak Liurai ba sira neʼebé ukun nuʼudar liurai no Naʼi ba sira neʼebé ukun nuʼudar naʼi.” (1 Timóteo 6:14-16) Karik Ita-nia sentimentu mós hanesan ho kriatura iha lalehan rihun ba rihun neʼebé hananu: “Bibi-Oan neʼebé sai tiha nuʼudar sakrifísiu merese atu simu kbiit, riku, matenek, forsa, hahiʼi, glória no bensaun.”Apokalipse 5:12.

4. Tanbasá mak ita tenkesér hatudu respeitu neʼebé kleʼan ba Jeová no Kristu?

4 Iha João 5:22, 23 hatete katak Jeová hili ona Kristu atu sai juíz ba ema hotu. Tan neʼe mak ita tenke hatudu respeitu neʼebé kleʼan ba Jesus. Bainhira ita hatudu respeitu ba Jesus, ita mós hatudu respeitu ba Jeová, no halo nuneʼe bele lori moris rohan-laek ba ita.Lee Salmo (Mazmur) 2:11, 12. *

5. Tanbasá mak ita tenkesér hatudu respeitu ba ema hotu?

5 Maromak kria ema tuir ninia ilas. (Gênesis [Kejadian] 1:27) Tan neʼe mak ita bele hatudu hahalok balu hanesan Maromak nian. Porezemplu, ita bele hatudu domin, laran-diʼak, no hanoin ema. Maromak mós kria ita ho konxiénsia, neʼe mak kbiit iha laran neʼebé fó-hatene ita katak ita halo buat neʼebé loos ka sala. (Roma 2:14, 15) Ema barak gosta haree buat neʼebé moos no furak, no sira gosta atu iha dame ho ema seluk. Ema iha sentimentu hanesan neʼe tanba Jeová mak Maromak neʼebé dame no la runguranga. Loos duni, Jeová kria ema hotu ho kbiit atu bele banati-tuir nia. Tan neʼe mak ita mós tenkesér hatudu respeitu ba malu.Salmo (Mazmur) 8:5.

RESPEITU NEʼEBÉ LOOS

6, 7. Oinsá mak ema kristaun neʼebé loos nia haree kona-ba respeitu la hanesan ho ema barak?

6 Ita hatene katak ema hotu tenke hatudu respeitu ba malu, maibé ita tenke kuidadu oinsá ita-nia hanoin kona-ba ema. Satanás nia mundu book ema barak atu hatudu hahalok hanesan ninian, tan neʼe mak ema barak fó hahiʼi ba ema seluk hanesan adora fali ema sira-neʼe. Sira halo tuir dalan neʼebé polítiku-naʼin, ulun-naʼin relijiaun, atleta, no artista sira-nia hatais, jeitu, no hahalok.

7 Ema kristaun neʼebé loos hatene katak sala atu fó hahiʼi ba ema iha dalan hanesan neʼe. Bainhira iha rai, Jesus deʼit mak hatudu ezemplu neʼebé perfeitu ba ita atu halo tuir. (1 Pedro 2:21) Ita presiza hanoin-hetan katak “ema hotu halo sala ona no la bele hetan Maromak nia glória”. (Roma 3:23) Se ita mak hatudu respeitu liu ba ema toʼo fó hahiʼi ba sira, neʼe halo Jeová la kontente. Tan neʼe, ita la bele adora ema.

8, 9. (a) Oinsá mak Testemuña ba Jeová haree ema husi governu? (b) Iha situasaun saida mak ita la bele halo tuir ema?

8 Ema balu neʼebé ita presiza hatudu respeitu tanba sira-nia pozisaun mak hanesan ema husi governu. Sira halo serbisu neʼebé diʼak hodi mantein dame no tau matan ba sidadaun nia presiza sira. Sira-nia serbisu neʼe lori diʼak ba ema  hotu, tan neʼe mak apóstolu Paulo hakarak ema kristaun atu hakruʼuk ba ema husi governu nuʼudar “ukun-naʼin sira”. Nia mós hakarak ita atu halo tuir sira-nia lei. Nia dehan: “Fó ba ema hotu buat neʼebé sira merese simu, selu impostu ba sira neʼebé husu impostu; . . . fó hahiʼi ba sira neʼebé husu atu simu hahiʼi.”Roma 13:1, 7.

9 Nuʼudar Testemuña ba Jeová, ita hakarak hakaʼas an atu hatudu respeitu ba ema sira husi governu. Rai ida-idak nia kostume la hanesan, tan neʼe ita presiza halo tuir lei husi rai ida-idak. Maibé, se sira mak husu ita atu halo buat ruma neʼebé kontra Jeová nia ukun-fuan, ita la bele halo, tanba ita hakarak halo tuir no respeitu Jeová liu fali ema.Lee 1 Pedro 2:13-17.

10. Jeová nia atan sira husi tempu uluk hatudu ezemplu diʼak saida mai ita ohin loron?

10 Ita bele aprende husi Jeová nia atan sira iha tempu uluk oinsá atu hatudu respeitu ba ema sira husi governu. Ezemplu ida mak kona-ba José no Maria. Iha tempu neʼebé governu Roma halaʼo sensus atu hatene ema naʼin-hira mak moris iha Roma nia ukun, José no Maria fila ba Jeruzalein atu rejistu sira-nia naran, maski Maria besik ona atu tuur ahi. (Lucas 2:1-5) Apóstolu Paulo mak ezemplu ida tan neʼebé hatudu respeitu ba ukun-naʼin sira. Bainhira ema duun katak nia halo ona buat neʼebé kontra lei, nia defende ninia an no hatudu respeitu ba Liurai Herodes Agripa no Festo, governadór Roma ba provínsia Judeia.Apóstolu 25:1-12; 26:1-3.

11, 12. (a) Tansá mak ita la hatudu respeitu ba ulun-naʼin relijiaun liu fali ema baibain? (b) Testemuña ida hatudu respeitu ba polítiku-naʼin ida, no neʼe lori rezultadu diʼak saida?

11 Oinsá ho ulun-naʼin relijiaun sira, ita tenke hahiʼi sira ka lae? Ita hatudu respeitu ba sira hanesan baibain ita hatudu ba ema seluk. Maibé se ita mak hatudu respeitu ba sira liu fali ema baibain, neʼe sala, maski sira hakarak ita atu halo nuneʼe ba sira. Tanbasá? Tanba relijiaun falsu la hanorin lia-loos kona-ba Maromak no ninia Liafuan, Bíblia. Tan neʼe, Jesus koʼalia hasoru mestre relijiaun sira iha ninia tempu hodi bolu sira laran-makerek no ulun-naʼin neʼebé ladiʼak. (Mateus 23:23, 24) Maibé kona-ba ema husi governu, bainhira ita hatudu respeitu ba sira, dala ruma neʼe bele lori rezultadu neʼebé diʼak ba Testemuña ba Jeová.

12 Ezemplu kona-ba neʼe mak Doutór Heinrich Gleissner, polítiku-naʼin ida husi rai-Áustria. Iha tempu Funu Mundiál Segundu, ema Nazi sira kaer nia no lori nia iha komboiu bá komarka. Iha komboiu laran nia hasoru irmaun Leopold Engleitner, Testemuña laran-manas ida husi Áustria. Ho respeitu, irmaun Leopold esplika ninia fiar ba Heinrich, no Heinrich rona didiʼak. Bainhira funu neʼe ramata, Heinrich uza ninia pozisaun iha governu hodi fó ajuda beibeik ba Testemuña sira iha rai-Áustria. Karik Ita bele hanoin kona-ba ezemplu seluk neʼebé hatudu katak bainhira ita respeitu ema husi governu, neʼe lori rezultadu neʼebé diʼak.

HATUDU RESPEITU BA EMA SELUK

13. Ita tenke hatudu respeitu liuliu ba sé, no tanbasá?

13 Ita tenke hatudu respeitu ba ita-nia irmaun-irmán sira. Liuliu ba sira neʼebé dirije ita, hanesan katuas kongregasaun, katuas área, irmaun sira husi Grupu Koordenadór ba Sukursál, no irmaun sira husi Grupu Administradór.  (Lee 1 Timóteo 5:17.) Sira hotu serbisu atu tau matan ba Jeová nia povu, no Bíblia bolu sira nuʼudar “prezente”. (Éfeso 4:8) Tan neʼe mak, maski sira mai husi rai neʼebé la hanesan, edukasaun la hanesan, riku ka kiak, ita hakarak hatudu respeitu ba sira. Kona-ba neʼe, ita bele aprende ezemplu diʼak husi ema kristaun iha apóstolu sira-nia tempu. Sira hatudu respeitu neʼebé kleʼan ba irmaun sira neʼebé dirije Maromak nia povu, no ita mós hakarak halo nuneʼe. Maibé ita tenke kuidadu atu la haree irmaun sira-neʼe hanesan anju bainhira ita hamutuk ho sira. Ita hatudu duni respeitu ba irmaun sira-neʼe tanba sira-nia serbisu makaʼas no haraik-an.Lee 2 Korinto 1:24; Apokalipse 19:10.

14, 15. Tanbasá mak katuas kongregasaun la hanesan ho ulun-naʼin relijiaun barak?

14 Irmaun sira-neʼe hanesan bibi-atan neʼebé haraik-an tebes. Sira lakohi ema haree sira hanesan artista. Tan neʼe mak sira la hanesan ho ulun-naʼin relijiaun ohin loron ka husi Jesus nia tempu. Kona-ba ulun-naʼin relijiaun sira, Jesus dehan: “Sira buka tuur-fatin neʼebé importante liu, no iha sinagoga laran, sira gosta atu tuur iha oin. Sira hakarak atu ema kumprimenta sira iha merkadu.”Mateus 23:6, 7.

15 Maibé katuas kristaun sira la hanesan neʼe. Sira halo tuir duni Jesus nia liafuan neʼebé hatete: “Keta husik ema bolu imi mestre, tanba imi-nia Mestre ida deʼit, no imi hotu mak maun-alin. Liután neʼe, keta bolu ema ida iha rai nuʼudar aman, tanba imi-nia Aman ida deʼit, neʼebé iha lalehan. Nuneʼe mós keta husik ema bolu imi ulun-naʼin, tanba imi-nia Ulun-Naʼin ida deʼit, Kristu. Maibé, ida neʼebé boot liu iha imi-nia leet tenke sai imi-nia atan. Ema neʼebé foti an, Maromak sei hatún, no ema neʼebé haraik an, Maromak sei foti aas.” (Mateus 23:8-12) Tan neʼe mak irmaun-irmán sira hadomi no hatudu respeitu neʼebé kleʼan ba katuas kongregasaun iha mundu tomak, tanba katuas sira-neʼe haraik an no halo tuir Jesus nia liafuan.

Se katuas kongregasaun mak haraik an no halo tuir Jesus nia liafuan, irmaun-irmán sira mós sei hadomi no respeitu sira (Haree parágrafu 13-15)

16. Tanbasá mak ita presiza hakaʼas an beibeik atu hatudu respeitu ba ema?

16 Karik ita presiza tempu atu hatene oinsá bele hatudu respeitu neʼebé loos ba ema seluk. Ema kristaun iha apóstolu sira-nia tempu mós hanesan neʼe. (Apóstolu 10:22-26; 3 João 9, 10) Maibé ita bele fiar katak se ita hatudu respeitu ba ema tuir Jeová nia hakarak, neʼe sei lori rezultadu diʼak ba ita.

 REZULTADU DIʼAK HUSI HATUDU RESPEITU

17. Tanbasá mak diʼak atu hatudu respeitu ba ema neʼebé iha pozisaun husi ita-nia komunidade?

17 Se ita mak hatudu respeitu ba ema neʼebé iha pozisaun iha ita-nia komunidade, karik sira sei fó apoiu ba ita-nia direitu atu haklaken. Karik sira mós sei hanoin pozitivu kona-ba ita-nia serbisu neʼe. Porezemplu, tinan hirak liubá, pioneiru ida husi rai-Alemaña naran Birgit tuir ninia oan-feto nia graduasaun. Profesora sira hatete ba nia katak iha tinan barak ona Testemuña nia oan sira bá eskola iha neʼebá, no sira kontente tebes ho alunu sira-neʼe. Sira dehan katak Testemuña nia oan sira halo sira-nia eskola sai fatin neʼebé hakmatek tebes. Tan neʼe Birgit esplika ba sira katak, “Ami hanorin ami-nia oan atu hatudu hahalok diʼak husi Bíblia, neʼe inklui hatudu respeitu ba mestre no mestra sira.” Profesora ida dehan katak se alunu hotu mak hanesan Testemuña nia oan, neʼe halo fasil tebes ba sira atu hanorin. Profesora sira-neʼe respeitu tebes Testemuña nia oan, tan neʼe, semana balu liutiha, mestra ida bá tuir ita-nia reuniaun boot loron tolu nian.

18, 19. Kona-ba hatudu respeitu ba katuas kongregasaun, ita tenke hanoin-hetan saida?

18 Prinsípiu sira husi Maromak nia Liafuan bele ajuda ita hatene oinsá atu hatudu respeitu ba katuas kongregasaun sira. (Lee Ebreu 13:7, 17.) Ita tenkesér gaba sira kona-ba sira-nia serbisu makaʼas. Se ita mak halo tuir matadalan neʼebé sira fó, neʼe sei ajuda sira atu halaʼo sira-nia knaar ho haksolok. Bíblia mós hatete katak ita tenke banati-tuir sira-nia fiar. Maibé neʼe la dehan katak ita tenke halo tuir dalan neʼebé sira hatais no hadiʼa an, sira-nia jeitu atu hatoʼo diskursu, ka jeitu neʼebé sira koʼalia ho ema. Se ita mak halo nuneʼe, ema bele hanoin sala katak ita halo tuir deʼit ema duké halo tuir Kristu. Ita presiza hanoin-hetan katak katuas sira mós ema sala-naʼin hanesan ita.

19 Se ita hatudu respeitu ba katuas sira no la haree sira hanesan artista, neʼe sei ajuda sira. Tanbasá? Tanba neʼe sei halo fasil ba sira atu haraik an nafatin no la halo sira hanoin katak sira mak diʼak liu fali ema seluk ka buat neʼebé sira halo mak sempre loos.

20. Tanbasá mak diʼak bainhira ita hatudu respeitu ba ema seluk?

20 Hatudu respeitu ba ema seluk bele ajuda ita atu la hanoin an deʼit no iha hahalok haraik-an bainhira ema ruma gaba ita. Hatudu respeitu neʼebé loos bele proteje ita atu la sidi se ita haree ema neʼebé ita respeitu halo buat ruma neʼebé halo ita triste. Buat ida tan mak, neʼe bele ajuda ita atu iha unidade iha Jeová nia organizasaun. Maromak nia organizasaun hatudu ezemplu neʼebé diʼak ba ita kona-ba la fó hahiʼi demais ba ema.

21. Razaun importante liu hotu atu hatudu respeitu ba ema seluk mak saida?

21 Razaun importante liu hotu atu hatudu respeitu ba ema seluk mak atu halo Jeová kontente. Neʼe mak buat neʼebé nia hakarak ita atu halo no mós bele ajuda ita atu laran-metin ba nia. Hodi nuneʼe, Jeová bele hatán ba Satanás neʼebé hatete katak la iha ema ida mak bele laran-metin ba Jeová. (Provérbios [Amsal] 27:11) Ema barak iha mundu la hatene saida mak dalan neʼebé loos atu hatudu respeitu ba ema. Maibé ita agradese tebes ba Jeová tanba nia hanorin ita oinsá atu hatudu respeitu iha dalan neʼebé loos!

^ par. 4 Salmo 2:11, 12 11 Serbí Jeová ho taʼuk, no haksolok ho nakdedar. 12 Hatudu respeitu ba oan-mane, se lae Maromak sei sai hirus no imi sei lakon mohu tiha, tanba Nia sei sai hirus lalais. Ksolok ba ema hotu neʼebé buka protesaun husi Nia.