Skip to content

Skip to table of contents

Belun diʼak mak belun iha tempu hotu

Belun diʼak mak belun iha tempu hotu

Gianni no Maurizio sai kolega diʼak maizumenus ba tinan 50 ona. Maibé tempu ida sira besik atu lakon relasaun diʼak neʼe. Maurizio dehan: “Durante tempu susar ida, haʼu halo sala boot neʼebé halo ami hadook malu.” Gianni hatutan hodi dehan: “Maurizio mak uluk fó estuda Bíblia ba haʼu. Nia mak haʼu-nia mestre neʼebé diʼak. Tan neʼe, haʼu hakfodak tebes kona-ba buat neʼebé nia halo. Haʼu sente triste tebes tanba haʼu hatene katak ami la bele sai belun tan. Haʼu sente hanesan buat ida lakon husi haʼu.”

BELUN diʼak mak buat neʼebé folin-boot tebes, no neʼe laʼós buat neʼebé mosu derrepente deʼit. Kuandu buat ruma atu hakotu Ita-nia relasaun ho Ita-nia belun, saida mak bele ajuda Ita atu hametin fali relasaun neʼe? Ita bele aprende husi ema balu neʼebé temi iha Bíblia. Foufoun sira iha relasaun neʼebé diʼak ba malu, maibé sira-nia relasaun diʼak ba malu mós hetan ameasa.

BAINHIRA BELUN IDA MONU BA SALA

Uluk, David mak bibi-atan ida no ikusmai sai liurai, ita bele fiar katak nia iha kolega barak. Jónatas mak ninia belun ida. (1 Samuel 18:1) Profeta Natan mós David nia belun ida. Bíblia la esplika horibainhira mak nia sai David nia belun, maibé iha tempu ida, David koʼalia sai ninia sentimentu ba Natan hanesan baibain ita koʼalia ba ita-nia belun ida. David iha hakarak atu harii uma ida ba Jeová. Tan neʼe nia husu sujestaun ba Natan nuʼudar belun diʼak no tanba Natan mós iha Jeová nia espíritu santu.2 Samuel 7:2, 3.

Maibé, iha buat ida akontese neʼebé fó ameasa ba sira-nia relasaun. Liurai David monu ba sala-foʼer ho Batseba, tuirmai nia oho Batseba nia laʼen Urias. (2 Samuel 11:2-21) Ba tinan barak ona David hatudu laran-metin ba Jeová no nia sempre hatudu hahalok justisa. Maibé loron ida nia monu ba sala  boot! Saida mak akontese ba liurai diʼak neʼe? Nia la hatene katak buat neʼebé nia halo mak buat sériu ka lae? Ka nia hanoin katak nia bele subar ninia sala husi Maromak?

Natan sei halo saida? Nia sei husik ema seluk mak atu fó sai ba liurai kona-ba liurai nia sala ka lae? Tuir loloos, iha ema balu hatene duni oinsá David halo planu hodi oho Urias. Entaun, oinsá mak Natan hakarak mete no estraga ninia relasaun diʼak ho David? Karik halo nuneʼe mós bele halakon Natan nia moris, tanba David oho ona Urias neʼebé la halo sala.

Natan mak profeta ida no Maromak nia lia-naʼin. Nia hatene katak se nia mak nonook deʼit, neʼe bele estraga ninia relasaun diʼak ho David no ninia konxiénsia rasik mós bele fó sala ba nia. Ninia belun David halo ona buat neʼebé Jeová la gosta. No Liurai neʼe tenke hadiʼa lalais ninia relasaun diʼak ho Jeová. Iha tempu hanesan neʼe, David presiza duni belun neʼebé loos, no Natan mak belun neʼe. Natan hahú koʼalia problema neʼe ho ai-knanoik neʼebé kona tebes David nia laran tanba uluk David mak bibi-atan ida. Natan fó sai Maromak nia mensajen ba David iha dalan neʼebé ajuda David atu komprende katak, sala neʼebé nia halo boot tebes no neʼe book David atu halo buat ruma.2 Samuel 12:1-14.

Ita sei halo saida se Ita hatene katak Ita-nia belun monu ba sala boot ka halo sala neʼebé sériu? Karik Ita bele hanoin katak fó sai ninia sala bele estraga Ita-nia relasaun diʼak ho belun neʼe. Ka Ita hanoin, se fó-hatene ninia sala ba katuas kongregasaun neʼebé bele ajuda nia, neʼe hanesan Ita sai traidór. Entaun Ita sei halo saida?

Gianni dehan: “Haʼu sente Maurizio la hanesan uluk ona. Nia la koʼalia nakloke tan ba haʼu hanesan uluk. Haʼu deside atu koʼalia rasik ba nia maski halo neʼe la fasil ba haʼu. Haʼu hanoin: ‘Haʼu bele koʼalia saida ba nia? Karik nia sei sai hirus tebes!’ Maibé hodi hanoin fali ba buat hotu neʼebé ami estuda hamutuk, neʼe halo haʼu aten-brani hodi koʼalia ho nia. Maurizio mós uluk halo hanesan ho haʼu bainhira haʼu presiza ninia ajuda. Haʼu lakohi lakon ami-nia relasaun nuʼudar belun, maibé haʼu hakarak ajuda nia tanba haʼu hanoin nia.”

Maurizio hatete: “Gianni koʼalia husi laran no nia koʼalia loos. Haʼu hatene katak konsekuénsia husi haʼu-nia desizaun neʼebé ladiʼak laʼós tanba ninia sala ka Jeová nia sala. Tan neʼe haʼu simu dixiplina no ikusmai hadiʼa fali haʼu-nia relasaun diʼak ho Jeová.”

BAINHIRA BELUN IDA MONU BA SUSAR

David mós iha belun neʼebé laran-metin ba nia bainhira nia monu ba susar. Belun sira-neʼe ida mak Husai, Bíblia bolu nia nuʼudar “David nia belun”. (2 Samuel 16:16; 1 Crônicas [Tawarikh] 27:33) Karik nia mak ema boot ida iha palásiu no nia mós Liurai David nia belun neʼebé besik. Dala ruma nia mak halaʼo liurai nia orden neʼebé segredu.

Bainhira David nia oan-mane Absalão hadau ninia kadunan, ema Izraél barak apoia Absalão, maibé Husai lae. Iha tempu neʼebé David halai husi Absalão, Husai bá atu hasoru David. David sente laran-kanek tanba ema neʼebé sai traidór mak ninia oan rasik no ema balu neʼebé nia tau fiar. Maibé Husai laran-metin nafatin ba David, no nia bá ho aten-brani atu halo traidór sira-nia planu sai runguranga. Husai halo hanesan neʼe laʼós tanba neʼe mak ninia responsabilidade, maibé tanba nia laran-metin duni ba David nuʼudar ninia belun.2 Samuel 15:13-17, 32-37; 16:15–17:16.

Ita kontente haree katak ohin loron, irmaun-irmán sira mós apoia malu tanba domin, laʼós tanba neʼe mak sira-nia knaar ka responsabilidade. Liuhusi sira-nia hahalok, sira hatudu katak sira-nia maluk importante tebes ba sira.

Neʼe mak irmaun Federico sente bainhira  ninia belun Antonio ajuda nia tahan hasoru susar balu iha ninia moris. Nia hatete: “Iha tempu neʼebé Antonio muda mai ami-nia kongregasaun, lakleur ami sai belun neʼebé diʼak. Ami serbí hamutuk nuʼudar atan ba kongregasaun, no ami kontente hodi serbisu hamutuk. Lakleur Antonio hetan fali knaar atu serbí nuʼudar katuas. Nia mak ezemplu diʼak ba haʼu.” Ikusmai Federico monu ba sala. Nia buka kedas ajuda, maibé nia la kumpre tan kritériu atu serbí nuʼudar pioneiru ka atan ba kongregasaun. Antonio sente oinsá kona-ba neʼe?

Bainhira Federico hasoru susar, ninia belun Antonio rona ba nia no fó laran-manas ba nia

Federico dehan: “Haʼu bele haree katak Antonio hanoin tebes haʼu. Nia koko makaʼas atu ajuda haʼu hodi la sente laran-tun. Nia hakarak tebes ajuda hadiʼa haʼu-nia relasaun diʼak ho Jeová no nia nunka hadook an husi haʼu. Nia sempre fó laran-manas ba haʼu atu hametin fali haʼu-nia relasaun ho Jeová no labele rende an.” Antonio dehan: “Haʼu gasta tempu barak ho Federico. Haʼu hakarak nia hatene katak nia bele koʼalia nakloke ba haʼu kona-ba buat naran deʼit.” Diʼak tebes hodi haree katak neineik-neineik Federico hametin fali ninia relasaun diʼak ho Jeová, no ikusmai kumpre fali kritériu atu serbí nuʼudar pioneiru no atan ba kongregasaun. Antonio hatete: “Maski agora ami serbí iha kongregasaun ketak-ketak, maibé ami sai belun diʼak liu fali uluk.”

ITA SENTE LARAN-KANEK KA LAE?

Ita sente oinsá se Ita-nia belun diʼak ida fila kotuk ba Ita iha tempu neʼebé Ita presiza tebes nia? Neʼe sei halo Ita sente laran-kanek tebes, loos ka lae? Ita bele fó perdua ba belun neʼe ka lae? Ita-nia relasaun ho nia bele sai metin fali hanesan tempu uluk ka lae?

Hanoin fali saida mak akontese ba Jesus iha loron balu antes nia mate. Nia uza tempu barak hodi hamutuk deʼit ho ninia apóstolu sira neʼebé laran-metin, no neʼe hametin sira-nia relasaun ba malu. Tan neʼe Jesus bolu sira nuʼudar belun. (João 15:15) Maibé saida mak akontese bainhira ema kaer Jesus? Apóstolu hotu halai husi Jesus. Uluk, Pedro koʼalia rasik katak nia sei nunka atu husik ninia Mestre, maibé iha kalan ema kaer  Jesus, nia nega Jesus!Mateus 26:31-33, 56, 69-75.

Jesus hatene nanis katak nia sei hasoru terus mesamesak. Tuir loloos nia iha razaun atu sente triste ka laran-kanek. Maibé liuhusi liafuan sira neʼebé nia koʼalia ba ninia dixípulu sira iha tempu nia hetan fali moris-hiʼas, ita bele haree katak Jesus nunka sai laran-tun, ka rai hirus ba ninia dixípulu sira. Jesus nunka keʼe sai fali ninia dixípulu sira-nia fraku, inklui mós saida mak sira halo ba nia iha kalan neʼebé ema kaer nia.

Jesus la halo nuneʼe ba sira, maibé nia ajuda Pedro no apóstolu sira atu hatene katak nia hatudu nafatin fiar ba sira. Nia fó matadalan ba sira kona-ba oinsá atu halaʼo serbisu neʼebé importante tebes atu hanorin ema. Ba Jesus, apóstolu sira mak ninia belun nafatin. Apóstolu sira nunka haluha kona-ba domin neʼebé nia hatudu ba sira. Sira hakaʼas an tebes atu la halo tan sira-nia Naʼi sente laran-tun. Sira halo duni serbisu neʼebé Jesus fó ba sira ho susesu.Apóstolu 1:8; Koloso 1:23.

Irmán ida naran Elvira, nia sei hanoin-hetan tempu neʼebé problema ida mosu entre nia ho ninia belun Giuliana. Nia dehan: “Bainhira nia hatete ba haʼu katak haʼu halo ona buat ida neʼebé hakanek nia, haʼu sente triste tebes. Haʼu la fó sala ba nia tanba nia hirus haʼu. Maibé buat neʼebé halo haʼu hakfodak mak nia hanoin liu kona-ba haʼu no nia lakohi buat ruma akontese ba haʼu tanba haʼu-nia desizaun neʼebé la matenek. Haʼu agradese tebes tanba nia la tau fokus ba haʼu-nia hahalok neʼebé halo nia laran-kanek, maibé nia hanoin liu kona-ba oinsá haʼu-nia hahalok neʼe sei estraga haʼu-nia an. Haʼu agradese ba Jeová tanba haʼu iha belun neʼebé hanoin liu ba haʼu-nia diʼak duké hanoin kona-ba nia rasik nia sentimentu.”

Se nuneʼe, Ita bele halo saida se problema ida mosu entre Ita ho Ita-nia belun diʼak? Ita presiza koʼalia nakloke ba malu ho didiʼak. Neʼe sei halo Ita sai belun hanesan Natan no Husai neʼebé laran-metin iha tempu susar. Ita mós sei sai belun hanesan Jesus neʼebé prontu atu fó perdua ba malu. Ita mak belun hanesan neʼe ka lae?