Skip to content

Skip to table of contents

 LISAUN ESTUDU 19

Domin no justisa bainhira hasoru hahalok aat

Domin no justisa bainhira hasoru hahalok aat

“Ita mak Maromak neʼebé la gosta hahalok aat; ema aat labele sai Ita-nia bainaka.”​—SAL 5:4.

KNANANUK 119 Ita tenke iha fiar

IHA LISAUN NEʼE *

1-3. (a) Tuir Salmo 5:4-6, Jeová sente oinsá kona-ba hahalok aat? (b) Tanbasá mak abuza labarik kontra “Kristu nia ukun-fuan”?

MAROMAK JEOVÁ odi hahalok aat hotu. (Lee Salmo 5:4-6.) Nia odi tebes abuzu seksuál, neʼe mak krime neʼebé aat tebes. Tanba banati-tuir Jeová, Testemuña ba Jeová mós hakribi abuzu seksuál ba labarik no sei la tolera se hatene ema iha kongregasaun laran halo hahalok neʼe.​—Rom 12:9; Ebr 12:15, 16.

2 Hahalok abuzu seksuál ba labarik mak kontra duni “Kristu nia ukun-fuan”. (Gal 6:2) Tanbasá? Hanesan ita aprende ona iha lisaun antes neʼe, Kristu nia ukun-fuan, katak buat hotu neʼebé Jesus hanorin liuhusi liafuan no hahalok mak bazeia ba domin no justisa. Tanba ema Kristaun loos halo tuir ukun-fuan neʼe, sira trata labarik iha dalan neʼebé halo labarik sira sente seguru no domin. Maibé abuzu seksuál ba labarik mak hahalok hanoin an deʼit, hahalok la justu neʼebé halo labarik sira la sente seguru no domin.

3 Triste katak abuzu seksuál ba labarik mak problema sériu neʼebé akontese iha mundu tomak, no mós kona ema Kristaun loos. Tanbasá? Tanba “ema aat” sai barak liután, no balu koko atu tama ba kongregasaun. (2 Tim 3:13) Liután neʼe, ema balu neʼebé sai parte ba kongregasaun mós monu ba hakarak isin nian neʼebé sala no abuza labarik iha dalan seksuál. Mai ita aprende tanbasá hahalok neʼe mak sala neʼebé sériu. Tuirmai ita sei aprende saida mak katuas  sira halo bainhira mosu sala sériu, hanesan abuzu seksuál ba labarik, no oinsá inan-aman sira bele proteje sira-nia oan. *

SALA SÉRIU

4-5. Tanbasá abuzu seksuál mak sala hasoru vítima?

4 Abuzu seksuál ba labarik lori konsekuénsia ba tempu kleur. Neʼe lori susar ba vítima no ema neʼebé hadomi vítima, hanesan sira-nia família no irmaun-irmán sira. Abuzu seksuál ba labarik mak sala neʼebé sériu.

5 Sala hasoru vítima. * Sala atu fó-terus ka hakanek ema seluk. Hanesan ita sei aprende iha lisaun tuirmai, ema neʼebé abuza labarik iha dalan seksuál lori konsekuénsia aat ba labarik nia moris tomak. Nia aproveita labarik nia konfiansa ba nia, no halo labarik la sente seguru. Ita tenke proteje labarik husi hahalok aat hanesan neʼe, no ita tenke fó kmaan no ajuda labarik sira neʼebé sai ona vítima.​—1 Tes 5:14.

6-7. Tanbasá abuzu seksuál mak sala hasoru kongregasaun no autoridade sira?

6 Sala hasoru kongregasaun. Ema iha kongregasaun neʼebé abuza labarik iha dalan seksuál hafoʼer kongregasaun nia naran. (Mt 5:16; 1 Ped 2:12) Neʼe mak hahalok la justu duni ba ema Kristaun rihun ba rihun neʼebé “luta makaʼas hodi defende fiar”! (Jud 3) Ami la husik deʼit ema neʼebé halo hahalok aat atu nafatin iha kongregasaun laran se sira la arrepende an no hafoʼer kongregasaun nia naran.

7 Sala hasoru autoridade sira. Ema Kristaun “tenke hakruʼuk ba autoridade sira”. (Rom 13:1) Ita hatudu katak ita hakruʼuk ba autoridade sira kuandu ita respeitu no halo tuir estadu nia lei. Se ema ida iha kongregasaun kontra lei, hanesan abuza labarik iha dalan seksuál, nia halo sala kontra autoridade sira. (Kompara ho Apóstolu 25:8.) Maski katuas sira la iha podér atu fó kastigu ba ema neʼebé kontra lei estadu nian, maibé sira la proteje ema neʼebé abuza labarik iha dalan seksuál atu hetan kastigu tanba ninia sala. (Rom 13:4) Ema neʼebé halo sala koʼa buat neʼebé nia kari.​—Gal 6:7.

8. Jeová hanoin oinsá kona-ba sala neʼebé ema ida halo hasoru ema seluk?

8 Aat liután mak sala neʼe hasoru Maromak. (Sal 51:4, nota) Bainhira ema ida halo sala hasoru ema seluk, nia mós halo sala hasoru Jeová. Hanoin toʼok ezemplu ida husi Ukun-Fuan neʼebé Maromak fó ba ema Izraél. Ukun-Fuan dehan katak ema neʼebé lohi ninia maluk, ema neʼe “la hatudu laran-metin ba Jeová”. (Lev 6:2-4) Entaun, se ema ida iha kongregasaun abuza labarik iha dalan seksuál, nia la laran-metin ba Maromak tanba nia lohi labarik no halo labarik la sente seguru. Ema iha kongregasaun neʼebé abuza labarik iha dalan seksuál hafoʼer duni Jeová nia naran. Tan neʼe mak ita tenke rekoñese katak abuzu seksuál ba labarik mak sala neʼebé aat tebes hasoru Maromak.

9. Durante tinan barak ona, Jeová nia organizasaun fó sai informasaun saida, no tanbasá?

 9 Durante tinan barak, Jeová nia organizasaun fó sai ona informasaun barak neʼebé bazeia ba Eskritura kona-ba abuzu seksuál ba labarik. Porezemplu, artigu husi Livru Haklaken no Matan-moris bá! esplika ona oinsá vítima ba abuzu seksuál bele tahan sira-nia laran-kanek, oinsá ema seluk bele ajuda no anima sira, no oinsá inan-aman bele proteje sira-nia oan. Katuas kongregasaun sira mós hetan ona treinu husi Bíblia kona-ba saida mak sira tenke halo bainhira ema abuza labarik iha dalan seksuál. Organizasaun kontinua hafoun matadalan kona-ba saida mak katuas sira presiza halo. Tanbasá? Tanba organizasaun hakarak atu matadalan sira-neʼe tuir duni Kristu nia ukun-fuan.

KATUAS SIRA-NIA KNAAR BAINHIRA EMA HALO SALA SÉRIU

10-12. (a) Bainhira katuas sira hatene ema halo sala sériu, katuas sira tenke hanoin-hetan saida, no sira-nia objetivu mak saida? (b) Tuir Tiago 5:14, 15, katuas sira hakaʼas an atu halo saida?

10 Bainhira katuas sira hatene katak ema ida halo sala sériu, sira presiza hanoin-hetan Kristu nia ukun-fuan neʼebé haruka sira atu trata Maromak nia bibi-malae ho domin no halo buat neʼebé loos no justu iha Maromak nia oin. Tan neʼe, sira presiza hanoin kona-ba buat oioin bainhira sira rona kona-ba sala sériu ruma. Katuas sira-nia objetivu prinsipál mak atu halo santu Maromak nia naran. (Lev 22:31, 32; Mt 6:9) Sira mós hakarak ajuda irmaun-irmán atu iha relasaun diʼak ho Maromak no hakarak ajuda vítima.

11 Liután neʼe, se ema iha kongregasaun mak halo sala sériu, katuas sira koko atu buka-hatene se nia arrepende an ona ka lae, no ajuda nia atu hadiʼa ninia relasaun ho Jeová. (Lee Tiago 5:14, 15.) Ema Kristaun neʼebé monu ba hakarak neʼebé sala no halo sala sériu mak hanesan ema neʼebé moras iha dalan espirituál. Neʼe katak nia la iha tan relasaun diʼak ho Jeová. * Tan neʼe, ita bele kompara katuas sira ho doutór. Sira hakaʼas an atu “halo ema moras [katak ema neʼebé halo sala sériu] sai diʼak fali”. Sira-nia konsellu neʼebé bazeia ba Eskritura bele ajuda ema atu hadiʼa fali ninia relasaun ho Maromak se ema neʼe arrepende duni ninia sala.​—Após 3:19; 2 Kor 2:5-10.

12 Klaru katak, katuas sira kaer responsabilidade boot. Sira hadomi tebes Maromak nia bibi-malae neʼebé Maromak haruka sira atu tau matan. (1 Ped 5:1-3) Sira hakarak sira-nia irmaun-irmán sente seguru iha kongregasaun. Tan razaun neʼe, sira sei halo kedas buat ruma bainhira rona katak ema ida halo sala sériu, inklui abuzu seksuál ba labarik. Saida mak sira halo? Hanoin toʼok pergunta sira neʼebé temi iha  parágrafu 13,  15, no  17.

13-14. Katuas sira tenke halo tuir estadu nia lei kona-ba kesar ba autoridade sira bainhira rona ema abuza labarik ka lae? Esplika toʼok.

 13 Katuas sira tenke halo tuir estadu nia lei atu kesar ba autoridade sira bainhira rona ema abuza labarik ka lae? Sin. Iha nasaun neʼebé iha lei kona-ba kesar ema neʼebé abuza labarik iha dalan seksuál, katuas sira tenke halo tuir. (Rom 13:1) Lei neʼe la kontra Maromak nia ukun-fuan. (Após 5:28, 29) Entaun bainhira katuas sira hatene kona-ba  abuzu seksuál, sira tenke buka kedas matadalan oinsá sira bele halo tuir lei neʼe.

14 Katuas sira fó-hatene ba vítima no sira-nia inan-aman no mós ema seluk neʼebé hatene kona-ba problema neʼe katak sira iha direitu atu kesar ba autoridade sira. Maibé oinsá se ema ida kesar ema iha kongregasaun laran no ikusmai komunidade hatene kona-ba problema neʼe? Ema Kristaun neʼebé kesar la presiza sente katak nia hafoʼer Jeová nia naran. Tuir loloos, ema neʼebé abuza labarik iha dalan seksuál mak hafoʼer Maromak nia naran.

15-16. (a) Tuir 1 Timóteo 5:19, tanbasá mak tenke iha sasin naʼin-rua antes katuas sira forma grupu tesi-lia nian? (b) Saida mak katuas sira halo bainhira sira rona katak ema iha kongregasaun abuza labarik?

 15 Tanbasá katuas kongregasaun presiza iha sasin naʼin-rua atu prova katak ema ida halo sala sériu? Tanba neʼe mak Bíblia nia matadalan kona-ba justisa. Se ema ida la fó sai ninia sala, presiza sasin naʼin-rua antes katuas sira bele forma grupu tesi-lia nian. (Deut 19:15; Mt 18:16; lee 1 Timóteo 5:19.) Neʼe katak tenke iha ona sasin naʼin-rua antes katuas sira kesar ba autoridade bainhira rona ema ida abuza labarik ka lae? Lae. Matadalan neʼe la aplika ba katuas ka ema seluk neʼebé hakarak kesar ba autoridade kona-ba krime neʼebé sira rona.

16 Bainhira katuas sira rona katak ema iha kongregasaun laran abuza labarik iha dalan seksuál, sira presiza halo tuir estadu nia lei kona-ba kesar problema neʼe, no tuirmai mak sira buka-hatene no deside tuir Bíblia se presiza forma grupu tesi-lia nian ka lae. Se ema neʼe nega, katuas sira sei rona fali ba sasin sira. Katuas sira sei forma grupu tesi-lia nian se iha sasin naʼin-rua​, katak sasin husi ema neʼebé duun no mós ema seluk neʼebé hatene ka vítima seluk. * Maski la iha sasin naʼin-rua, neʼe la dehan katak buat neʼebé ema duun la loos. Maski labele prova kona-ba abuza seksuál ba labarik tanba la iha sasin naʼin-rua, maibé katuas sira rekoñese katak karik sala sériu akontese duni no hakanek ema seluk. Katuas sira kontinua fó apoia ba vítima. Liután neʼe, katuas sira kontinua matan-moris hodi proteje kongregasaun husi ema neʼebé ema seluk duun abuza labarik iha dalan seksuál.​—Após 20:28.

17-18. Esplika toʼok kona-ba knaar husi grupu tesi-lia nian.

 17 Grupu tesi-lia nian iha knaar saida? Liafuan “tesi-lia” la signifika katuas sira mak juís neʼebé deside se ema neʼebé abuza labarik iha dalan seksuál tenke hetan kastigu husi autoridade sira tanba kontra lei. Katuas sira entrega kazu krime neʼe ba autoridade sira no husik sira halo desizaun. (Rom 13:2-4; Tito 3:1) Katuas sira tesi-lia ka deside deʼit kona-ba ema neʼe tenke hasai husi kongregasaun ka lae.

18 Bainhira katuas sira envolve iha grupu tesi-lia nian, sira-nia knaar mak iha ligasaun ho buat espirituál. Hodi tuir matadalan husi Eskritura, katuas sira sei deside se ema neʼebé abuza labarik iha dalan seksuál arrepende an ona ka lae. Se nia la arrepende an, kongregasaun sei hasai nia no fó sai avizu iha kongregasaun. (1 Kor 5:11-13) Se nia arrepende an, nia sei la hasai husi kongregasaun.  Maibé, katuas sira sei fó-hatene ba nia katak karik nia sei nunka kumpre kritéria atu hetan priviléjiu iha kongregasaun. Tanba hanoin labarik sira-nia diʼak, karik katuas sira sei fó-hatene inan-aman sira iha kongregasaun katak sira presiza tau matan sira-nia oan bainhira hamutuk ema neʼe. Bainhira halo nuneʼe, katuas sira kuidadu atu la fó sai kona-ba sé mak uluk hetan abuzu seksuál.

OINSÁ PROTEJE ITA-NIA OAN

Inan-aman proteje sira-nia oan husi abuzu seksuál hodi esplika informasaun kona-ba relasaun seksuál ba sira tuir sira-nia idade. Atu halo nuneʼe, inan-aman bele uza informasaun neʼebé Maromak nia organizasaun prepara ona. (Haree parágrafu 19-22)

19-22. Saida mak inan-aman sira bele halo atu proteje sira-nia oan? (Haree foto iha livru oin.)

19 Sé mak iha responsabilidade atu proteje labarik sira? Inan-aman. * Ita-nia oan mak prezente husi Maromak, no “liman-rohan husi Jeová”. (Sal 127:3) Ita iha responsabilidade atu proteje Ita-nia oan. Saida mak Ita bele halo atu proteje Ita-nia oan husi abuzu seksuál?

20 Primeiru, buka-hatene kona-ba abuzu seksuál. Buka-hatene ema hanesan saida mak abuza labarik no dalan neʼebé sira uza atu lohi labarik. Matan-moris hodi haree perigu sira. (Prov 22:3; 24:3) Hanoin-hetan katak, dala barak ema neʼebé abuza labarik iha dalan seksuál mak ema neʼebé labarik koñese no tau fiar.

21 Segundu, koʼalia nakloke ba malu. (Deut 6:6, 7) Neʼe inklui rona didiʼak ba Ita-nia oan. (Tgo 1:19) Hanoin-hetan katak baibain labarik sira taʼuk atu kesar kona-ba abuzu seksuál. Karik sira taʼuk katak ema sei la fiar sira, ka ema neʼebé abuza sira mak ameasa sira. Se Ita hanoin katak buat aat ruma akontese ba Ita-nia oan, ho laran-diʼak husu pergunta no rona didiʼak ba sira-nia resposta.

22 Terseiru, hanorin Ita-nia oan. Esplika informasaun kona-ba relasaun seksuál ba sira tuir sira-nia idade. Hanorin Ita-nia oan saida mak sira tenke dehan no halo se ema ida koko atu kaer sira-nia isin neʼebé privadu. Uza informasaun neʼebé Maromak nia organizasaun fó kona-ba oinsá proteje Ita-nia oan.—Haree kaixa “ Hanorin Ita-nia an no Ita-nia oan”.

23. Testemuña sira hanoin oinsá kona-ba abuza labarik, no pergunta saida mak ita sei hatán iha lisaun tuirmai?

23 Testemuña ba Jeová haree abuzu seksuál ba labarik nuʼudar sala neʼebé aat tebes. Testemuña sira halo tuir Kristu nia ukun-fuan, tan neʼe sira la proteje ema neʼebé abuza labarik atu hetan konsekuénsia husi sira-nia sala. Maibé, saida mak ita bele halo atu ajuda vítima? Lisaun tuirmai sei hatán ba pergunta neʼe.

KNANANUK 102 ‘Tau matan ema neʼebé fraku’

^ par. 5 Ita sei aprende oinsá proteje oan sira atu la sai vítima ba hahalok abuzu seksuál. Ita sei aprende oinsá katuas sira proteje kongregasaun no mós oinsá inan-aman bele proteje sira-nia oan.

^ par. 3 ESPLIKASAUN BA FRAZE: Abuzu seksuál ba labarik katak ema boot uza labarik atu halo kontente ninia hakarak seksuál nian. Neʼe inklui relasaun seksuál, hahalok seksuál ho ibun ka kidun, book oin-lulik, susun, ka kidun, ka hahalok foʼer seluk. Baibain vítima mak labarik-feto, maibé labarik-mane sira mós hetan abuzu. No baibain ema neʼebé abuza labarik mak mane, maibé feto balu mós abuza labarik.

^ par. 5 ESPLIKASAUN BA FRAZE: Iha lisaun neʼe no lisaun tuirmai, liafuan “vítima” refere ba ema neʼebé hetan abuzu seksuál kuandu sira labarik. Fraze neʼe uza atu hatudu katak labarik neʼe hetan terus no ema aproveita nia no nia la halo sala.

^ par. 11 Se ema ida moras iha dalan espirituál, neʼe la dehan katak nia sei la hetan konsekuénsia. Ema neʼebé halo sala tenke simu konsekuénsia ba ninia desizaun no hahalok sala no sei hatán ba Jeová.​—Rom 14:12.

^ par. 16 Bainhira katuas sira koʼalia ho ema neʼebé karik abuza labarik, sira nunka obriga labarik neʼe atu mai koʼalia hamutuk ho sira. Inan-aman ka ema seluk neʼebé labarik neʼe fiar mak bele konta fali ba katuas sira kona-ba buat neʼebé labarik dehan. Atu nuneʼe, labele hakanek liután labarik nia laran.

^ par. 19 Informasaun neʼe mós aplika ba inan-aman hakiak.