Skip to content

Skip to table of contents

 ESPERIÉNSIA

Jeová fó mai haʼu bensaun neʼebé haʼu la imajina

Jeová fó mai haʼu bensaun neʼebé haʼu la imajina

HAʼU hakarak sai pioneiru ida. Maibé haʼu hanoin, neʼe sei halo haʼu kontente ka lae. Haʼu gosta haʼu-nia serbisu iha rai-Alemaña, neʼe mak atu esporta ai-han ba rai balu iha rai-Áfrika, hanesan Dar es Salaam, Elisabethville no Asmara. Haʼu nunka hanoin katak loron ida haʼu sei serbí Jeová tempu-tomak iha área sira-neʼe no área seluk tan iha Áfrika tomak!

Bainhira haʼu halakon haʼu-nia dúvida neʼe no komesa hahú serbí nuʼudar pioneiru, haʼu-nia moris troka iha dalan neʼebé haʼu nunka imajina. (Éf 3:20) Maibé karik ita hanoin oinsá ida-neʼe bele akontese. Haʼu sei konta kona-ba neʼe.

Haʼu moris iha Berlín, Alemaña, fulan balu depois Funu Mundiál Segundu iha tinan 1939. Bainhira funu besik remata iha tinan 1945, aviaun funu nian komesa harahun sidade Berlín ho bomba. Sira soe bomba iha ami-nia área. Haʼu no haʼu-nia família bá subar iha fatin neʼebé seguru. Ami presiza muda ba Erfurt, haʼu-nia amá nia rai atu bele sente seguru.

Ho haʼu-nia inan-aman no alin-feto iha Alemaña, maizumenus tinan 1950

Haʼu-nia amá laran-manas tebes atu buka lia-loos. Nia lee kona-ba filozofia no aprende ona kona-ba relijiaun barak maibé nia la satisfeitu. Maizumenus tinan 1948, Testemuña ba Jeová naʼin-rua mai vizita ami-nia uma. Haʼu-nia amá konvida sira tama no husu pergunta barak. La toʼo oras ida, haʼu-nia amá hatete mai haʼu no haʼu-nia alin-feto, “Haʼu hetan ona lia-loos!” Lakleur, ami hahú tuir reuniaun sira iha Erfurt.

Iha tinan 1950 ami fila fali ba Berlín, no ami tuir kongregasaun Berlín-Kreuzberg. No lakleur ami muda fali ba kongregasaun Berlín-Tempelhof. Iha neʼebá mak haʼu-nia amá hetan batizmu, maibé haʼu dada an. Tanbasá?

OINSÁ MAK HAʼU BELE KONTROLA SENTIMENTU MOE

Haʼu halo mudansa kiʼik deʼit tanba haʼu moedór. Maski haʼu sai haklaken-naʼin ba tinan rua ona, haʼu nunka koʼalia ba uma-naʼin kuandu haklaken. Situasaun troka bainhira haʼu koñese irmaun-irmán sira neʼebé hatudu aten-brani no laran-metin ba Jeová. Balu tama komarka Nazi nian ka komarka iha Alemaña Leste. Sira balu tau sira-nia an iha  perigu laran hodi hatama subasubar ita-nia publikasaun sira ba Alemaña Leste. Sira-nia ezemplu book tebes haʼu. Haʼu hanoin, se sira bele halo sakrifísiu boot, neʼe katak haʼu mós bele hamenus haʼu-nia sentimentu moe.

Haʼu hahú kontrola sentimentu neʼe bainhira haʼu partisipa iha kampaña espesiál iha tinan 1955. Iha karta ida, neʼebé fó sai iha Informant, * irmaun Nathan Knorr hatete katak neʼe mak kampaña boot liu neʼebé ita-nia organizasaun sei halo. Nia hatete, se haklaken-naʼin hotu hola parte, “neʼe sei sai fulan haklaken nian neʼebé furak liu iha ita-nia istória”. Neʼe loos duni! Lakleur depois neʼe, haʼu dedika haʼu-nia an ba Jeová, no iha tinan 1956, haʼu hetan batizmu hamutuk haʼu-nia apá no alin-feto. Maibé lakleur neʼe haʼu presiza halo desizaun importante ida.

Ba tinan barak, haʼu rekoñese katak haʼu tenke hahú foti pioneiru, maibé haʼu sempre hanoin atu halo ida-neʼe iha tempu seluk deʼit. Primeiru, haʼu deside atu aprende uluk oinsá atu esporta no importa sasán iha Berlín. No tuirmai, haʼu hakarak halo serbisu lai atu nuneʼe haʼu iha esperiénsia barak antes foti pioneiru. Tan neʼe, iha tinan 1961, haʼu simu serbisu ida iha Hamburg, Alemaña. Tanba haʼu gosta tebes haʼu-nia serbisu, neʼe halo susar ba haʼu atu foti pioneiru. Saida mak haʼu tenke halo?

Haʼu agradese tebes tanba Jeová uza irmaun laran-diʼak sira atu ajuda haʼu atu tau uluk Jeová iha haʼu-nia moris. Haʼu-nia kolega balu foti ona pioneiru no sira hatudu ezemplu diʼak mai haʼu. No mós, irmaun Erich Mundt, neʼebé uluk iha komarka, fó laran-manas mai haʼu atu tau fiar ba Jeová. Nia konta bainhira iha komarka, irmaun barak neʼebé sadere ba sira-nia an rasik ikusmai sai fraku. Maibé sira neʼebé tau fiar tomak ba Jeová hatudu laran-metin nafatin no sai hanesan riin neʼebé metin iha kongregasaun.

Bainhira haʼu hahú pioneiru, tinan 1963

No mós, irmaun Martin Poetzinger, neʼebé ikusmai serbí nuʼudar Grupu Administradór, fó laran-manas beibeik ba irmaun sira hodi dehan: “Aten-brani mak hahalok neʼebé folin-boot liu!” Depois hanoin didiʼak kona-ba liafuan sira-neʼe, haʼu deside atu para serbisu no foti pioneiru iha Juñu 1963. Neʼe mak desizaun neʼebé diʼak liu hotu! Fulan rua liutiha, antes haʼu komesa buka serbisu foun, haʼu simu konvite atu serbí nuʼudar pioneiru tempu-tomak. Tinan balu liutiha, Jeová halo buat neʼebé haʼu labele imajina. Haʼu simu konvite atu tuir Eskola Gilead, klase 44.

APRENDE LISAUN IMPORTANTE IHA GILEAD

“Keta lalais atu rende an iha knaar neʼebé Ita halaʼo.” Neʼe mak lisaun importante liu neʼebé haʼu aprende husi irmaun Nathan Knorr no Lyman Swingle. Irmaun sira-neʼe fó laran-manas mai ami atu halo susesu ami-nia knaar. Irmaun Knorr hatete: “Ita sei tau fokus ba saida? Buat foʼer oioin? Kiak? Ka Ita sei hanoin kona-ba ai-hun, ai-funan neʼebé furak, no ema nia oin-midar? Aprende atu hadomi ema!” Loron ida, irmaun Swingle esplika mai ami kona-ba tanbasá mak ema ida bele rende an. Nia esplika ho sentimentu neʼebé kleʼan toʼo nia matan-been nakonu. Nia tenke para uitoan atu sai kalma fali. Neʼe kona loos haʼu-nia laran no book haʼu atu la halo Kristu no nia alin sira triste.—Mt 25:40.

Haʼu, Claude, no Heinrich iha ami-nia knaar nuʼudar misionáriu iha Lubumbashi, Kongu, tinan 1967

Bainhira ami simu ami-nia knaar, irmaun naʼin-tolu husu kona-ba ami sei serbí iha neʼebé. Sira fó komentáriu neʼebé pozitivu ba knaar hotu, maibé bainhira haʼu hatete: “Haʼu sei serbí iha rai-Kongu (Kinxasa),” derrepente sira sai sériu no hatete: “Oh, Kongu! Hein katak Jeová sei hamutuk ho Ita!” Iha tempu neʼebá, akontese daudaun funu no ema oho malu iha Kongu (Kinxasa). Maibé haʼu hanoin nafatin buat neʼebé haʼu aprende ona. Lakleur depois ami graduasaun iha fulan-Setembru 1967, irmaun Heinrich Dehnbostel, Claude Lindsay, no haʼu bá Kongu nia sidade kapitál, Kinxasa.

 TREINU NEʼEBÉ KAPÁS BA MISIONÁRIU

Bainhira ami toʼo iha Kinxasa, ami aprende língua Fransés ba fulan tolu. Tuirmai ami bá fali Lubumbashi, antes neʼe nia naran mak Elisabethville, besik fronteira Zámbia iha Kongu parte súl. Ami hela iha uma misionáriu nian iha sidade neʼe.

Ami kontente atu sai nuʼudar ema primeiru neʼebé mak haklaken iha fatin barak iha Lubumbashi. Lakleur deʼit, ami iha ona estudante Bíblia barak liu fali ami-nia kbiit. Ami mós haklaken ba ema husi governu ka polísia sira. Sira barak mak hatudu respeitu ba Maromak nia Liafuan no ami-nia serbisu haklaken. Ema barak maioria koʼalia língua Swahili, entaun haʼu no irmaun Claude Lindsay aprende atu koʼalia língua neʼe. Lakleur depois neʼe, ami hetan knaar atu serbí iha kongregasaun neʼebé koʼalia língua Swahili.

Maski ami iha esperiénsia barak neʼebé furak, ami mós hasoru dezafiu. Ami sempre hasoru ho soldadu sira neʼebé lanu ka polísia duun matak ami kona-ba buat neʼebé ami la halo. Iha loron ida, bainhira ami halaʼo hela reuniaun iha uma misionáriu nian, polísia mai serka ami no lori ami ba eskritóriu polísia nian. Iha neʼebá sira haruka ami tuur deʼit iha rai toʼo tuku sanulu kalan, depois sira husik ami fila.

Iha tinan 1969, haʼu hetan knaar atu bá vizita kongregasaun sira. Iha knaar neʼe haʼu mós tau matan ba área iha rai-fuik Áfrika, no dalan atu bá neʼebá mak liuhusi duʼut laran no tahu laran. Iha suku ida, kuandu kalan  manu-inan ho ninia oan mós toba iha haʼu-nia kama okos. Haʼu nunka haluha kuandu iha dadeer, manu-inan neʼe sempre fanu haʼu ho ninia lian barullu. Haʼu kontente tebes kuandu iha kalan haʼu no irmaun sira seluk tuur haneruk ahi no koʼalia kona-ba lia-loos.

Dezafiu ida tan mak kona-ba sira neʼebé finje sai Testemuña ba Jeová, maibé hola parte iha grupu ida naran Kitawala. * Sira balu neʼebé envolve an ho grupu neʼe hetan batizmu no kaer knaar nuʼudar katuas ba kongregasaun. Ikusmai irmaun-irmán sira hatene kona-ba sira barak neʼebé hanesan ‘fatuk neʼebé subar’. (Judas 12) Jeová hamoos duni ema sira-neʼe husi kongregasaun no ema barak liután mak tama lia-loos.

Iha tinan 1971, haʼu hetan knaar atu serbí iha sukursál Kinxasa, no haʼu-nia serbisu mak tau matan ba karta sira, organiza livru sira, no knaar seluk tan. Iha Betel, haʼu aprende oinsá atu organiza serbisu sira iha nasaun boot neʼebé ninia administrasaun la laʼo ho diʼak. Dala ruma, presiza hein ba fulan barak atu kongregasaun simu karta sira. Karta sira-neʼe aviaun sei hatún iha ró ida no presiza hein ba semana barak atu ró neʼe toʼo. Maski hasoru susar oioin, serbisu nafatin laʼo ho diʼak.

Haʼu orgullu tebes bainhira haree irmaun sira organiza didiʼak reuniaun boot sira maski ho osan neʼebé limitadu. Sira halo rasik plataforma, uza duʼut atu didin, no mós halo fatin atu tuur. Sira uza au atu harii no uza biti atu taka uma nia leten. Sira mós uza ai nia kulit nuʼudar pregu. Haʼu gaba tebes irmaun-irmán sira-neʼe nia badinas no matenek. Neʼe halo haʼu hadomi tebes sira. Haʼu hanoin tebes sira bainhira haʼu tenke muda ba fatin seluk tanba simu knaar foun.

SERBÍ IHA RAI-KÉNIA

Iha tinan 1974, haʼu hetan knaar foun iha sukursál iha Nairobi, Kénia. Ami presiza halo buat barak tanba sukursál tau matan ba serbisu haklaken iha nasaun sanulu, balu governu bandu ona ita-nia serbisu. Dala ruma haʼu presiza bá vizita rai balu, liuliu rai-Etiópia. Iha neʼebá ita-nia irmaun barak mak ema fó-terus sira no hasoru susar oioin. Sira balu hetan asaun neʼebé la diʼak ka tenke tama komarka; balu ema oho. Maibé sira iha fiar neʼebé metin nafatin tanba sira iha relasaun neʼebé diʼak ho Jeová no ema seluk.

Iha tinan 1980, buat furak akontese ba haʼu-nia moris bainhira haʼu kaben ho Gail Matheson, husi rai-Kanadá. Ami naʼin-rua tuir eskola Gilead iha klase neʼebé hanesan. Ami sempre haruka karta ba malu. Gail serbí nuʼudar misionária iha rai-Bolívia. Depois tinan 12 liutiha, ami hasoru malu fali iha Novaiorke. Lakleur, ami kaben iha Kénia. Haʼu kontente tebes tanba Gail sempre hanoin kona-ba Jeová no nia sempre kontente ho buat neʼebé nia halo ona ba Jeová. Nia mak folin-boot tebes no pár neʼebé sempre apoia haʼu.

Iha tinan 1986, haʼu no Gail hetan knaar atu vizita kongregasaun sira no mós nafatin halaʼo haʼu-nia knaar nuʼudar membru husi Komisaun ba Sukursál. Knaar atu vizita kongregasaun sira mak inklui atu bá iha rai balu neʼebé sukursál Kénia mak tau matan.

Hatoʼo diskursu iha reuniaun boot iha Asmara, tinan 1992

Haʼu hanoin-hetan oinsá halo preparasaun ba reuniaun boot iha Asmara (iha Eritreia) iha tinan 1992 bainhira ita seidauk hetan bandu. Ami hetan deʼit armazén ida neʼebé haree aat tebes. Maibé, bainhira reuniaun boot halaʼo, haʼu orgullu tanba irmaun sira hadiʼa fatin neʼe sai fali fatin neʼebé kapás atu uza hodi adora Jeová. Família barak lori hena atu halo furak fatin neʼe no taka buat neʼebé haree la jeitu. Ami halaʼo ami-nia reuniaun ho kontente tebes ho ema naʼin-1.279.

Knaar atu vizita kongregasaun sira mak mudansa boot mai ami tanba fatin neʼebé  ami hela sempre troka kada semana. Dala ida ami hela iha uma neʼebé furak besik tasi; iha tempu seluk, ami hela deʼit iha uma kaleen neʼebé simples, no ho hariis-fatin neʼebé dook metru 100. Maibé iha ami-nia knaar sira-neʼe, ami iha esperiénsia neʼebé lori kontente mai ami tanba sempre okupadu ho pioneiru sira no haklaken-naʼin neʼebé laran-manas. Bainhira ami simu fali knaar foun, ami tenke husik hela ami-nia belun sira neʼebé ami hadomi tebetebes.

SIMU BENSAUN IHA RAI-ETIÓPIA

Durante tinan 1987 no 1992 nia laran, ita-nia serbisu haklaken sai legál iha rai balu neʼebé sukursál Kénia mak tau matan. Rezultadu mak, iha ona sukursál foun neʼebé harii iha fatin sira-neʼe. Iha tinan 1993, ami hetan knaar atu serbí iha eskritóriu iha Addis Ababa, Etiópia, neʼebé durante tinan barak hetan bandu no agora sai legál ona.

Iha knaar atu vizita kongregasaun sira iha Etiópia, tinan 1996

Jeová haraik ona bensaun ba serbisu neʼebé halaʼo iha Etiópia. Irmaun-irmán barak mak serbí nuʼudar pioneiru. Porsentu 20 liu husi haklaken-naʼin sira mak foti pioneiru kada tinan hahú husi tinan 2012. No mós, ita hetan ona treinu husi eskola Bíblia sira, no harii ona Reuniaun-Fatin foun 120 liu. Iha tinan 2004 família Betel muda ba fatin foun no neʼe diʼak tanba fatin atu halaʼo reuniaun boot sira mós harii iha neʼebá.

Tinan barak nia laran, haʼu no Gail sai besik ho ami-nia belun irmaun-irmán sira iha Etiópia. Ami hadomi sira tanba sira-nia laran-diʼak no domin. Agora ami iha problema ho ami-nia saúde neʼebé halo ami tenke fila fali atu serbí iha sukursál Europa Sentrál. Irmaun-irmán sira tau matan didiʼak mai ami iha neʼe, maibé ami sempre hanoin kona-ba ami-nia belun sira iha Etiópia.

JEOVÁ HALO MORIS

Ami hasoru ona esperiénsia kona-ba oinsá Jeová halo ninia serbisu laʼo ba oin. (1 Kor 3:6, 9) Porezemplu, dala primeiru haʼu haklaken ba ema Ruanda neʼebé mai Kongu atu buka riti, seidauk iha haklaken-naʼin iha Ruanda. Agora iha ona haklaken-naʼin 30.000 liu. Iha tinan 1967, Kongu (Kinxasa) iha haklaken-naʼin maizumenus 6.000. Agora iha ona maizumenus 230.000 liu no ema besik millaun ida liu mak tuir Memoriál iha tinan 2018. Iha rai hotu neʼebé sukursál Kénia tau matan, haklaken-naʼin aumenta barak liután hamutuk 100.000 liu.

Iha tinan 50 liubá, Jeová uza irmaun oioin ajuda haʼu atu hahú serbí nuʼudar pioneiru. Maski agora haʼu nafatin iha sentimentu moe, haʼu aprende atu tau fiar tomak ba Jeová. Buat neʼebé haʼu aprende iha Áfrika ajuda haʼu atu bele haburas pasiénsia no kontente ho buat neʼebé haʼu iha. Haʼu no Gail admira ho irmaun-irmán barak neʼebé hatudu ona laran-diʼak mai ami atu bele tahan hasoru problema boot sira no tau fiar ba Jeová. Haʼu agradese tebetebes ba Jeová nia laran-diʼak. Jeová haraik ona mai haʼu bensaun neʼebé haʼu labele imajina.—Sal 37:4.

^ par. 11 Ikusmai bolu neʼe nuʼudar Ita-nia Serbisu Kristaun, no agora troka ba Moris Kristaun no HaklakenPrograma no nota.

^ par. 23 Iha língua Swahili, “Kitawala” katak “okupa, dirije, ka ukun.” Grupu neʼe nia objetivu mak atu hetan independénsia husi rai-Béljika. Grupu Kitawala hetan, aprende, no fahe publikasaun sira husi Testemuña ba Jeová no halo kleʼuk Bíblia nia hanorin hodi apoia sira-nia polítiku, ideia, no moris neʼebé la morál.