Skip to content

Skip to table of contents

 LISAUN ESTUDU 30

Haklaken ba ema neʼebé la iha relijiaun

Haklaken ba ema neʼebé la iha relijiaun

“Haʼu sai buat hotu ba ema oioin, atu nuneʼe liuhusi dalan oioin haʼu bele salva sira balu.”​—1 KOR 9:22.

KNANANUK 65 Laʼo ba oin!

IHA LISAUN NEʼE *

1. Mudansa saida mak akontese ohin loron?

ULUK ema barak iha mundu sai parte ba relijiaun. Maibé agora iha mudansa boot. Ema barak liután la iha relijiaun. Tuir loloos, iha rai balu, populasaun barak dehan katak sira la iha relijiaun. *Mt 24:12.

2. Tanbasá ema barak la iha relijiaun?

2 Tanbasá mak ema barak liután dehan katak sira la iha relijiaun? * Ema balu karik fokus liu atu buka ksolok ka fokus ba sira-nia problema. (Lc 8:14) Ema balu tan uluk fiar Maromak maibé agora la fiar ona Maromak. Ema seluk fiar Maromak maibé hanoin katak relijiaun mak antigu ona, la ajuda ema, la apoia siénsia no la lójiku. Karik sira rona beibeik husi sira-nia belun, mestre, ka ema husi média katak moris mai husi evolusaun, maibé karik sira ladún rona razaun tanbasá sira bele fiar katak Maromak iha. Ema seluk tan hakribi ulun-naʼin relijiaun tanba kaan osan no podér. Iha rai balu, governu bandu atividade relijiaun nian.

3. Saida mak objetivu husi lisaun neʼe?

3 Jesus haruka ita atu ‘hanorin ema husi nasaun hotu atu sai ninia dixípulu’. (Mt 28:19) Oinsá mak ita bele ajuda ema neʼebé la iha relijiaun atu aprende hadomi Maromak no sai Kristu nia dixípulu? Ita tenke rekoñese katak ema nia moris-fatin bele afeta dalan neʼebé sira simu ka la simu mensajen neʼebé ita haklaken. Porezemplu, ema husi Europa karik la hanesan ho ema husi Ázia. Tanbasá? Iha  Europa, ema barak hatene informasaun balu kona-ba Bíblia no rona ona katak Maromak mak kria buat hotu. Maibé iha Ázia, ema barak hatene uitoan ka la hatene buat ida kona-ba Bíblia, no karik sira la fiar ba Kriadór. Objetivu husi lisaun neʼe mak atu ajuda ita haklaken iha dalan neʼebé book ema nia laran, no la haree ba sira mai husi neʼebé no sira-nia fiar mak saida.

IHA HANOIN NEʼEBÉ POZITIVU

4. Tanbasá ita bele nafatin iha hanoin pozitivu?

4 Hanoin pozitivu. Tinan-tinan, ema barak neʼebé uluk la iha relijiaun sai Testemuña ba Jeová. Sira barak iha ona morál neʼebé diʼak no hakribi ulun-naʼin relijiaun tanba laran-makerek. Sira seluk la iha morál no presiza husik hahalok aat. Ho Jeová nia ajuda, ita bele fiar katak ita sei hetan ema “neʼebé prontu atu simu lia-loos neʼebé lori ba moris rohan-laek”.—Após 13:48; 1 Tim 2:3, 4.

Troka Ita-nia dalan atu haklaken bainhira Ita koʼalia ho ema neʼebé la fiar Bíblia (Haree parágrafu 5-6) *

5. Saida mak book ema atu simu ita-nia mensajen?

5 Hatudu laran-diʼak no respeitu. Dala barak, ema simu mensajen neʼebé ita haklaken, laʼós tanba ita-nia liafuan, maibé tanba dalan neʼebé ita hatoʼo. Sira gosta bainhira ita hatudu laran-diʼak, respeitu, no interese ba sira. Ita la obriga sira atu rona ba ita. Maibé, ita koko atu komprende tanbasá sira la iha relijiaun. Porezemplu, ema balu lakohi atu koʼalia kona-ba relijiaun ho ema oin-foun. Ema seluk dehan katak la diʼak atu husu ema nia hanoin kona-ba Maromak. Ema seluk tan sente moe bainhira ema haree sira lee Bíblia, liuliu lee hamutuk ho Testemuña ba Jeová. Maski iha razaun oioin, maibé ita hakaʼas an atu komprende sira-nia sentimentu.—2 Tim 2:24, nota.

6. Oinsá mak apóstolu Paulo hatudu katak nia halo mudansa tuir ema nia situasaun? Oinsá mak ita bele banati-tuir nia?

6 Saida mak ita bele halo se ema sente la diʼak bainhira ita uza liafuan hanesan “Bíblia”, “kriasaun”, “Maromak”, ka “relijiaun”? Ita bele banati-tuir apóstolu Paulo no troka dalan neʼebé ita koʼalia ba sira. Bainhira Paulo koʼalia ho ema Judeu, nia uza Eskritura. Maibé, bainhira nia koʼalia ba ema Gregu iha Areópago, nia la dehan katak nia foti liafuan sira husi Bíblia. (Após 17:2, 3, 22-31) Oinsá mak ita bele banati-tuir Paulo? Se Ita hasoru ema neʼebé la fiar Bíblia, diʼak atu la dehan katak Ita-nia liafuan mai husi Bíblia. Se Ita nota katak ema ida sente la diʼak bainhira ema seluk haree nia lee Bíblia hamutuk ho Ita, koko atu hatudu eskritura iha dalan neʼebé la dada ema nia atensaun, hanesan liuhusi sasán eletróniku.

7. Ita presiza halo saida atu banati-tuir Paulo hanesan temi iha 1 Korinto 9:20-23?

7 Komprende ema no rona didiʼak. Ita tenke hakaʼas an komprende tanbasá sira hanoin hanesan neʼe. (Prov 20:5) Hanoin fali Paulo nia ezemplu. Nia sai boot iha ema Judeu nia leet. Entaun nia presiza troka ninia dalan atu haklaken bainhira koʼalia ho ema jentiu neʼebé hatene uitoan ka la hatene buat ida kona-ba Jeová no Eskritura. Karik ita presiza halo riset ka husu ema neʼebé iha esperiénsia iha ita-nia kongregasaun atu ita bele komprende ema nia hanoin iha ita-nia haklaken-fatin.—Lee 1 Korinto 9:20-23.

8. Saida mak dalan ida atu komesa koʼalia ho ema kona-ba Bíblia?

8 Ita-nia objetivu mak atu buka ema neʼebé “merese” atu ita vizita. (Mt 10:11) Atu bele hetan rezultadu, ita tenke husu sira-nia hanoin no rona didiʼak ba sira.  Irmaun ida iha Inglaterra husu ema nia hanoin kona-ba oinsá atu halaʼo moris kaben nian neʼebé kontente, oinsá atu haboot oan, ka oinsá atu tahan maski ema la hatudu hahalok justisa. Depois rona tiha ba sira-nia opiniaun, irmaun neʼe dehan: “Ita hanoin oinsá kona-ba konsellu ida-neʼe neʼebé hakerek besik tinan 2.000 liubá?” Tuirmai, maski nia la temi liafuan Bíblia, maibé nia hatudu ba sira eskritura neʼebé nia prepara ona iha ninia telefone.

BOOK EMA NIA LARAN

9. Oinsá mak ita bele ajuda ema neʼebé baibain lakohi koʼalia kona-ba Maromak?

9 Maski baibain ema lakohi koʼalia ho ita kona-ba Maromak, maibé ita bele book sira-nia laran hodi koʼalia kona-ba buat neʼebé sira gosta. Porezemplu, ema barak admira natureza. Entaun ita bele dehan: “Karik Ita hatene ona katak sientista sira inventa buat oioin hodi kopia buat neʼebé iha natureza. Porezemplu, ema neʼebé halo mikrofone estuda animál nia tilun, no ema neʼebé halo kámera estuda animál nia matan. Entaun Ita hanoin oinsá kona-ba natureza? Tuir Ita-nia hanoin, natureza mosu mesak deʼit, iha Ida neʼebé mak kria, ka buat seluk?” Depois rona didiʼak tiha ba sira-nia opiniaun, ita bele dehan: “Bainhira matenek-naʼin sira aprende kona-ba animál nia tilun no matan, karik ita hanoin: ‘Sira aprende husi sé?’ Haʼu admira ho poezia antigu ida neʼebé dehan: ‘Ida neʼebé kria tilun, nia labele rona ka? Ida neʼebé kria matan, nia labele haree ka? . . . Nia mak Ida neʼebé hanorin koñesimentu ba ema!’ Sientista balu konkorda ho liafuan sira-neʼe no fiar katak iha Kriadór.” (Sal 94:9, 10) Tuirmai ita bele hatudu vídeo husi jw.org® ho títulu “Ita-nia kolega hanoin saida—Fiar ba Maromak”. (Klik BÍBLIA NIA HANORIN > JOVEN SIRA.) Ka karik ita bele fó sira broxura Moris Hotu Mosu Mesak Deʼit ka lae? Ka broxura Asal Mula Kehidupan—Lima Pertanyaan yang Patut Direnungkan.

10. Oinsá mak ita bele komesa haklaken ba ema neʼebé lakohi koʼalia kona-ba Maromak?

10 Ema hotu hakarak atu iha futuru diʼak. Maibé, ema barak taʼuk katak mundu sei lakon ka ema sei estraga mundu toʼo ema labele hela tan. Katuas área ida iha rai-Noruega hatete katak dala barak ema neʼebé lakohi koʼalia kona-ba Maromak, prontu atu koʼalia kona-ba  mundu nia situasaun. Depois kumprimenta tiha ema, nia dehan: “Tuir Ita-nia hanoin, oinsá Ita bele hetan futuru neʼebé diʼak? Ita bele hetan futuru diʼak liuhusi polítiku-naʼin, sientista, ka ema seluk?” Depois rona didiʼak tiha, nia lee ka fó sai liafuan husi eskritura ida neʼebé hatudu kona-ba futuru neʼebé diʼak. Ema balu gosta Bíblia nia promesa kona-ba mundu sei nunka lakon no ema diʼak sei hela iha mundu ba nafatin.—Sal 37:29; Ecle 1:4.

11. Tanbasá mak ita tenke uza dalan oioin atu komesa koʼalia ho ema? Oinsá mak ita bele banati-tuir apóstolu Paulo nia ezemplu hanesan hakerek iha Roma 1:14-16?

11 Ita tenke uza dalan oioin atu komesa koʼalia ho ema. Tanbasá? Tanba ema ida-idak la hanesan. Buat neʼebé ema ida gosta karik ema seluk la gosta. Ema balu kontente atu koʼalia kona-ba Maromak ka Bíblia, maibé ema seluk gosta atu koʼalia uluk kona-ba informasaun seluk. Maski nuneʼe, ita tenke koʼalia ba ema hotu. (Lee Roma 1:14-16.) Tuir loloos, ita mós tenke hanoin-hetan katak Jeová mak halo lia-loos moris iha ema laran-loos sira-nia laran.—1 Kor 3:6, 7.

FAHE LIA-LOOS BA EMA HUSI ÁZIA

Haklaken-naʼin barak hatudu interese ba ema husi rai sira neʼebé la fiar Maromak no sira fó sai oinsá Bíblia bele ajuda ema nia moris loroloron (Haree parágrafu 12-13)

12. Iha rai balu iha Ázia, ema barak nunka hanoin kona-ba Kriadór. Ita bele halo saida atu book sira-nia laran?

12 Iha mundu tomak, haklaken-naʼin barak hasoru ema husi nasaun sira iha Ázia, inklui ema neʼebé mai husi rai sira neʼebé governu bandu atividade relijiaun nian. Iha rai balu iha Ázia, ema barak nunka hanoin kona-ba Kriadór iha ka lae. Ema balu hakarak hatene no simu kedas estuda Bíblia, maibé ema seluk foufoun la interese ba ideia foun. Saida mak ita bele halo atu book sira-nia laran? Irmaun-irmán balu neʼebé iha esperiénsia hetan susesu hodi koʼalia halimar uluk, hatudu interese, no tuirmai kuandu tempu diʼak, esplika oinsá halo tuir Bíblia nia prinsípiu ajuda ona sira.

13. Saida mak bele halo ema interese ba Bíblia? (Haree foto iha livru oin.)

13 Ema barak gosta Bíblia nia prinsípiu neʼebé diʼak ba moris loroloron nian. (Ecle 7:12) Irmán ida iha Novaiorke, baibain vizita ema neʼebé koʼalia língua Xinés atu fahe Bíblia nia mensajen, no nia hatete: “Haʼu hakaʼas an atu hatudu interese no rona didiʼak ba ema. Se haʼu hatene katak sira foin muda mai husi rai seluk, haʼu husu sira: ‘Ita toman ona ho situasaun foun neʼe ka lae? Ita hetan ona serbisu ka lae? Ema haree Ita ho diʼak ka lae?’” Dala ruma, neʼe loke dalan atu fó sai Bíblia nia hanorin. Bainhira tempu diʼak, irmán neʼe dehan: “Tuir Ita-nia hanoin, saida mak xave atu iha relasaun diʼak ho ema seluk? Haʼu bele hatudu ba Ita lia-dadolin ida husi Bíblia ka lae? Neʼe dehan: ‘Hahú istori malu mak hanesan loke odamatan neʼebé tahan netik bee-lihun boot ida; tan neʼe, diʼak liu husik tiha fatin neʼe antes mosu istori malu.’ Tuir Ita-nia hanoin, konsellu neʼe bele ajuda ita atu iha relasaun diʼak ho ema seluk ka lae?” (Prov 17:14) Ida-neʼe bele ajuda ita hatene sé mak gosta atu ita vizita fali.

14. Oinsá mak irmaun ida iha Ázia parte leste haklaken ba ema neʼebé la fiar Maromak?

14 Oinsá ho ema sira neʼebé dehan katak sira la fiar Maromak? Irmaun ida iha Ázia parte leste, iha esperiénsia atu haklaken ba ema neʼebé la iha relijiaun, nia hatete: “Baibain kuandu ema ida dehan: ‘Haʼu la fiar Maromak’, neʼe signifika nia la adora maromak sira neʼebé ema barak adora iha área neʼe. Entaun dala barak  haʼu konkorda katak baibain ema mak halo maromak sira no neʼe laʼós maromak. Baibain haʼu lee Jeremias 16:20: ‘Ema bele halo maromak sira ba ninia an ka lae? Tuir loloos buat neʼebé ema halo laʼós maromak.’ Tuirmai haʼu husu: ‘Oinsá ita bele hatene maromak ida-neʼebé mak loos no ida-neʼebé mak ema halo?’ Haʼu rona didiʼak ba sira, no tuirmai haʼu lee Isaias 41:23: ‘Konta ba ami buat neʼebé sei akontese iha futuru, atu nuneʼe ami bele hatene katak imi mak maromak.’ Depois neʼe, haʼu hatudu ezemplu ida kona-ba oinsá Jeová fó-hatene nanis kona-ba futuru.”

15. Saida mak ita aprende husi irmaun ida tan iha Ázia parte leste?

15 Irmaun ida seluk iha Ázia parte leste uza dalan tuirmai bainhira nia halo vizita fali. Nia dehan: “Haʼu hatudu ezemplu balu kona-ba matenek husi Bíblia, profesia neʼebé kumpre ona, no ukun-fuan neʼebé kontrola universu. Tuirmai, haʼu esplika oinsá buat hotu neʼe hatudu katak iha Kriadór neʼebé moris no matenek. Bainhira ema komesa simu ideia katak Maromak iha, haʼu hatudu buat neʼebé Bíblia koʼalia kona-ba Jeová.”

16. Tuir Ebreu 11:6, tanbasá estudante Bíblia presiza fiar Maromak no Bíblia? Oinsá ita bele ajuda sira haburas sira-nia fiar?

16 Bainhira ita estuda Bíblia ho ema neʼebé la iha relijiaun, ita tenke kontinua ajuda sira hametin sira-nia fiar katak Maromak iha. (Lee Ebreu 11:6.) No ita presiza ajuda sira atu hametin sira-nia fiar ba Bíblia. Karik neʼe katak ita tenke repete beibeik hanorin balu. Tempu ida-idak neʼebé ita estuda Bíblia ho ema, karik ita presiza koʼalia kona-ba evidénsia neʼebé hatudu katak Bíblia mak Maromak nia Liafuan. Karik neʼe inklui koʼalia kona-ba Bíblia nia profesia neʼebé kumpre ona, oinsá Bíblia apoia siénsia no fó sai istória neʼebé loos, ka oinsá Bíblia bele ajuda ema nia moris loroloron.

17. Oinsá mak ita-nia domin bele book ema?

17 Ita ajuda ema sai Kristu nia dixípulu liuhusi hatudu domin ba sira, maski sira iha relijiaun ka lae. (1 Kor 13:1) Bainhira ita hanorin sira, ita-nia objetivu mak atu hatudu katak Maromak hadomi sira no nia hakarak sira hadomi nia. Tinan-tinan ema rihun ba rihun neʼebé uluk iha interese uitoan ka la iha interese ba relijiaun hetan batizmu tanba sira haburas domin ba Maromak. Tan neʼe, mai ita hanoin pozitivu, hatudu domin no interese ba ema hotu, rona didiʼak no hakaʼas an atu komprende sira. Hanorin sira atu sai Kristu nia dixípulu liuhusi Ita-nia ezemplu.

KNANANUK 76 Ita sente oinsá?

^ par. 5 Karik agora ita hasoru ema barak liután neʼebé la iha relijiaun. Lisaun neʼe sei esplika oinsá ita bele fahe lia-loos husi Bíblia ba sira no oinsá ita bele ajuda sira atu haburas fiar ba Bíblia no ba Maromak Jeová.

^ par. 1 Tuir peskiza, rai sira-neʼe balu mak Albánia, Alemaña, Austrália, Áustria, Azerbaijaun, Dinamarka, España, Fransa, Honkóng, Irlanda, Izraél, Japaun, Kanadá, Koreia Súl, Noruega, Olanda, Reinu Unidu, Repúblika Xeka, Suésia, Suisa, Vietname, no Xina.

^ par. 2 ESPLIKASAUN BA FRAZE: Iha lisaun neʼe, fraze la iha relijiaun refere ba ema neʼebé la sai parte ba relijiaun ida ka la fiar Maromak.

^ par. 54 ESPLIKASAUN BA DEZEÑU: Irmaun ida haklaken ba ninia kolega serbisu iha ospitál, no ikusmai kolega neʼe loke ita-nia sítiu jw.org®.